تجربة السنة التحضيرية في جامعة الدمام #تحذير :تدوينة طويلة جدًا وحتى انقطاع النفس .

بسم الله الرحمن الرحيم

تحية طيبة ، سلام الله عليكم ورحمته وبركاته .

تدوينة اليوم اعتبرها إكمال لمسيرة ذكر التجارب لمرحلة التخرج من الثانوية والمرور بتجربة التحصيلي والقدرات في تدوينتين ( هنا ، هنا ) والتي اعتقدها جدًا مفيدة واستمتع وانا أقرأها في مدونات أخرى .

ولكن –ويالها من لكن كبيرة- هذه السنة بالذات لم أكن متحمسة جدًا للكتابة عنها إلا في اول شهر من الفصل الدراسي الأول . بعدها أختفى كل شيء وستعلمون لم هذا خلال استمراركم في قراءة هذه التدوينة والتي أحذركم أنها طويلة جدًا جدًا وحتى إنقطاع النفس . ما جعلني أحسم أمري بكتابتها هو أن الكثير –وهذا مافاجأني- طلب مني إياها وكان يسأل عن موعدها وينتظرها بفارغ الصبر ، حتى أن صديقات لأختي ، وأناس من أطراف صديقاتي طلبوها . خجلت أن أبخل بأي معلومة عنهم ، فهذا ما سأبحث عنه لو كنت أنوي الدخول لهذه السنة أيضًا .قراءة تجارب ! كما أن طلبهم لي نوعًا ما أشعرني بالسعادة –بغض النظر عن كم التوتر والمسؤولية الذي شعرت بهما – أن تعتقد أن صوتك مسموع ، يجلب السعادة ولو أنكرنا .

تحذير آخر : هذا التدوينة صادقة جدًا ربما لا تكون متفائلة بقدر ما تتوقعون ، ولن تكون محبطة كما ستخشون بعد قراءة الجملة التي قلتها للتو .

تحذير آخر آخر : هذه التدوينة بحسب رأيي الشخصي ، وبحسب النظام اللي استخدم معانا ، غير مسؤولة عن أي تغير قد يطرأ على نظام الجامعة . والخطأ وارد في التدوينة لكني حاولت قدر الامكان احتراز الدقة .

بسم الله الرحمن الرحيم فلنبدأ !

قبل سنة و عشرة أيام . حصلت على رسالة قبولي في المسار الصحي في جامعة الدمام . والذي كنت أطمح من خلاله أن أنتقل لكلية طب الأسنان التي افتتحت منذ سنة –في ذلك الوقت- قسم البنات .

---

• نبذة من موقع الجامعة ذاته :

المختصر المفيد :

• السنة التحضيرية في جامعة الدمام تابعة لعمادة السنة التحضيرية والكليات المساندة ، أستحدث هذا النظام على سنة تخرجي –للأسف لأن لولاه كنت بوفر سنة من الضغط النفسي كون نسبتي كانت جدًا عالية وتدخلني الكلية اللي أبي بدون منافسة ثانية- ( ونقول أنا وصديقاتي أنه استحدث نحسًا وحسدًا من الدفعات اللي أصغر منا كوننا نفذنا بجلدنا من تطوير المناهج) .
• السنة التحضيرية هي نظام يجمع كل الكليات المتشابهه في مجالها مع بعض في مسار واحد . حيث أن جميع الكليات المشتركة في مسار تدرس نفس المواد للسنة الأولى ، فيجمعونهم في مسار الهدف منه أن يكون الدخول للـكلية بحسب بعض الشروط التي يحتاج الطالب إجتيازها بجانب المفاضلة على المعدل العام .
• تنقسم السنة التحضيرية إلى ثلاثة مسارات ، يحتوي كل مسار فيها مجموعة من الكليات :
• الصورة من موقع الجامعة

نظام الدراسة سنوي . بحيث في بعض المواد يكون إختبارها النهائي للفصلين نهاية السنة . ويعني في نفس الوقت أنك ماتقدر تخلص سمستر وتاخذ عليه شهادة ، فمثلا تكون المادة 60% من درجتها من السمستر الأول و 40% على السمستر الثاني . بعض المواد تكون فصلية تدرسينها في سمستر واحد بس وتنزل درجتك فيها .

كنا 460 بنت ، مقسمين على 14 شعبة . 33 طالبة في الشعبة –أكثر أو أقل- .

في اليوم التعريفي بـيعطونكم الجداول للشعب . تختارون اللي تبون وتسجلون موادكم بحسب اللي بيعلمونك في الشعبة اللي تبونها . لكن في السمستر الثاني بيكون تقسيم الشعب مختلف .

• الفصل الدراسي الأول

1- كيمياء (  محاضرة –ساعة واحدة- في الإسبوع )

• درسنا عن الكيمياء الغير عضوية ، حسابات وما إلى ذلك . نفس منهج ثانوي بالضبط بس إنجليزي . فيه كتاب لكن مااحتجناه .
• المحاضرات تتوفر في الكوبي سنتر كل أسبوع وكانت مذاكرتنا منها كلها إلا اللي ماتفهم ترجع للكتاب .
• اختبرنا فيه إختبار شهري . وإختبار فاينل . كلها كانت موضوعية ( إختياري ) . من المفترض كونه نظام سنوي ان الإختبار النهائي يكون نهاية السنة عن الفصلين لكن قسم الكيمياء الطيب قرر يكون فصلي بحجة أننا كلنا بنرسب في الكيميا لو كان سنوي هههه وبصراحة احس صج !
• الدرجة ما تنزل بنهاية الفصل الدراسي الأول على السستم لأن المادة بنكملها السمستر الثاني . السمستر الأول عليه 40% . في نفس الوقت كان القسم يزودك في الاختبار بنموذج اجابة إضافي ، تعبينه وتاخذينه معاك . بعد الإختبار يعلقون نموذج الإجابة فتصححين لنفسك .
• اللي درستنا إياه اسوء دكتورة في القسم ، البقية كلهم كويسات مرة مرة مرة مرة . احنا ابتلينا برئيسة القسم الكسول جدًا والباردة . وعشان كذا كانت تغيب واجد فيجمعونا مع كلاسات ثانية ونستمتع بالشرح الحقيقي . عمومًا مهما كان الدكتور سيء غالبًا مابيأثر لأن المنهج معيود ! ولو فاهم في ثانوي حتفهم في الجامعة بنسبة 85% بدون شرح إضافي .

2. فيزياء ( محاضرة-ساعة واحدة- في الإسبوع )

• درسنا اشياء اساسية جدًا جدًا جدًا جدًا . منهج سهل بشكل كبير ! عن الوحدات ، قوانين نيوتن ، والطاقة والشغل ! بس ! إعادة لثانوي !
• المحاضرات تتوفر في الكوبي سنتر اسبوعيًا . لكن مذاكرتنا كانت 90% منها من نوت الأولاد أوضح وأشمل . كان في تواصل بيننا وبين الأولاد عن طريق قروب الفيس بوك وكنا نوصل لهم نوتنا ويوصلون لنا نوتهم .
• الكتاب تشترونه لو تبون أولا لا ! الحاجة الوحيدة له قراءة اسئلة المسائل والأمثلة .
• اختبرنا إختبارين شهريين . نص السنة ، ونهايتها . كل إختبار شهري نسبته من 10-20% يعتمد على جزئية الإختبار والمستوى العام للدرجات . لو كل الدفعة درجاتها سيئة يخفضون من النسبة عليها . الإختبارات كانت موضوعية ( إختياري) .
• الدرجات تنزل ، وتثبت على لوحة الإعلانات لكل إختبار شهري . لكنهم كانوا يطولون في التصحيح .
• اللي درستنا كانت بروفيسورة سودانية خلوقة وحبوبة جدًا جدًا جدًا . تستحين من كثر خفة دمها وأخلاقها . بس الشرح :\ . كانت ذكية لكن ماعندها إسلوب توصيل معلومة كويس . لو رحتي لها على جنب تشرح لك كويس لكن في الكلاس لا ! عمومًا المنهج مرة سهل وماكان محتاج ذاك الشرح أصلًا .

3.  أحياء  ( محاضرة –ساعتين- في الإسبوع ) .

• بدأنا بدراسة الخلية مكوناتها ووظائفها ، الأنسجة وانواعها ، بعدين إنقسامات الخلية . المنهج معيود صح لكن مليء جدًا بالمصطلحات الانجليزية الجديدة اللي تحتاج حفظ . لكنها سهله بالمجمل العام .
• بالنسبة للمحاضرات أنا جاني إكتئاب وصيحة بعد أول كلاس . لأن قسم البايولوجي يمنع إعطاء المحاضرات للطلاب مهما كان لأسباب مجهولة ! فكانت الدكتورة تعرض السلايدات واحنا ننقلهم وراها كلمة كلمة . أول محاضرة ماكنت قادرة ألحق أكتب وأسمع في نفس الوقت . مع الوقت ومع الممارسة نسرع في الكتابة ونركز أكثر ويكون الشي روتيني سهل.
• الكتاب يعطونكم أسمه . مهم جدًا جدًا لأن سلايدات الدكاترة ماتلم كل الموضوع والإختبار يجي اشياء من الكتاب ! تعلمنا الدرس هذا بعد ماكان إختبار البايولوجي الأول كارثة ! كنا قرأنا الكتاب قبل النوم بشكل سريع ورحنا الإختبار و مفااجأة ! نص الإختبار مو عارفين نحله وكان اسوء درجة في البايولوجي منه .
• اختبرنا إختبارين بنفس إسلوب الفيزياء . والنهائي نهاية السمستر الثاني .
• درستنا أحسن دكتورة في القسم . أو بالأحرى أكثرهم *دفارة* . نوتها أكمل نوت ، تعطيك معلومات زيادة وتخليك تذاكرين زيادة وما يكون في الكتاب اشياء اكثر بواجد من اللي تشرحه . درجات طالبتها حسب اللي تقول عادةُ أعلى .

4.  مهارات إتصال ( محاضرة –ساعتين- في الإسبوع)

• مادة الترويح عن النفس وكل شي . بالعربي ، عن مهارة الإستماع ، لغة الجسد ، طرق الإتصال ، مهاراته ، طرق التأثير . مهارة كتابة السيرة الذاتية . المقابلة الشخصية . مادة خفيفة دم وسهلة جدًا . وغالبيتها أشياء تعلمناها .
• الكتاب توفره الجامعة . المذاكرة منه بطريقة الفهم . لأنه محشو بشكل هائل وحفظه مستحيل . الكتاب كان مليء بأخطاء املائية مضحكة ، وجمل خفيفة دم . كان امتع مادة ذاكرناها من كثر ما ضحكنا .
• اسلوب الدراسة ، اول كم محاضرة الدكتورة تشرحها ، بعدين تبدأ تطلب منكم تقسيكم مجموعات . تسوون مع بعض شرح لفصل من فصول الكتاب في المحاضرة وهي تشرف فقط . وتسوون عرض آخر عن موضوع خارجي له علاقة بتطوير الذات ، تقيمون فيه على اسلوب الإلقاء ومهارات الاتصال ولغة الجسد اللي تعلمتوها .
• في تكليفات فردية ، كل بنت مطالبة فيها . ( كتابة سيرة ذاتية مستقبلية لبعد 10 سنوات ، قراءة كتاب عن تطوير الذات وكتابة ملخص عنه ، بحث عن أحد مواضيع المقرر ) .
• الإختبارات . فقط نهائي واحد آخر السنة عليه 40-50% ، البقية على التكاليف الجماعية والفردية .
• اللي درستنا خفيفة دم . كل دكتورات القسم كانوا جدد من مصر . كنا ناخذ راحتنا معاها واجد ونضحك وياها ونعصبها ونراضيها بكم كلمة , كانت حتى لما تعصب تقول ” انتوا حتى لما الواحد عاوز يعيط عليكوا بتدحكوه ! وتضحك ” – بقية الدكتورات كلهم كويسات ما عدا وحدة يقولون كانت شديدة في تقييم المهارات وتدقق واجد على لغة الجسد حتى خلال قعدتك في المحاضرة .

5. حاسب آلي ( محاضرة عن ألف –4ساعات في الإسبوع)

• هذي المادة تاخذون عليها شهادة معترف فيها عالميًا أسمها ICDL وهي تعني : الرخصة الدولية لقيادة الحاسب ( ادري ادري الأسم يضحك ههههههه ) . مفيدة تحطينها في السيرة الذاتية بعدين .
• الكتاب توفره الجامعة لكن تبيعه لكم بـ 100 ريال .
• محاضرتها متعبة لأن مدتها طويلة مع أن المادة سهلة ، لكن من 1 إلى 5 نكون مرهقين بشكل كبيير . تدرسون فصل نظري حفظ ، مكونات الحاسب وما إلى ذلك . بعدين تبدؤون عملي عن نظام الويندوز بعدين برامج المايكروسوفت اوفس ، وورد ، باوربوينت ، إكسل .
• الإختبارات تنقسم قسمين ، قسم من الدكتورة نفسها ، وقسم من الشركة المسؤولة برة عن الآي سي دي إل . اللي من الدكتورة إما نظري ، أو عملي تعطيك أوامر وطلبات تنفذينها على ملف في الجهاز وتحفظينه وتصححه .
• قسم الشركة وهذا اللي عليه الشهادة ، تختبرين بعد كل فصل إختبار تكون فيه الاجهزة موصله اون لاين مع الشركة . بحيث الشركة تعطي موعد للجامعة انه الاختبار يبدأ هالوقت . تدخلون بحسابات يسجلونها لكم الجامعة ، وتبدؤون اختبار من ثلاث اقسام كل قسم 12-15 سؤال . يكون الجهاز يتحسس حركة الماوس ، ولو طلب منك أمر وتحركتي ودرتي واجد تنقص درجتك ، لازم تكون خطواتك واضحة ومباشرة . نتيجة الإختبار اما تكون 5 لما تكونين طبقتي نسبه 70او 75% (نسيت كم بالضبط) صح !  أو تكون صفر لو طبقتي أقل من النسبة . فلو جبتي 100 او 80 نفس الشي . ولو جبتي 50 او 10 نفس الشي . اللي ماتعدي الإختبار لها فرصة ثانية بشرط تدفع قيمه الإعادة مو اكثر من 100 اعتقد 50 لأن الجامعة تكون دافعة للمركز قيمة محاولة لكل شخص فقط . واجهتنا مشكلة انه السستم كان احيانا يكون سيء جدًا ، فتعلق الأجهزة ومايكتمل تصحيح كافة اقسام الإختبار فترسب البنت . وتضطر تدفع وتعيده . عمومًا لا تحاتون مافي ولا بنت ماعدت المرة الثانية .
• فيه بعض التكاليف تطالبكم فيها الـدكتورة مثل مشروع للوورد ، مشروع للإكسل ومشروع للباوربوينت .

6.  ثقافة إسلامية ( محاضرة – ساعتين – في الإسبوع )

• تدرسون منهج عن مفهوم الثقافة الإسلامية ، الغزو الفكري ، الصهيونية ، الإستشراق ، الإحتلال ومواضيع على هذا المنوال . بالعربي .
• الملزمة موحدة لعدد من الأستاذات ، وقد تختلف من أستاذة لأخرى وهي المصدر للمذاكرة بالإضافة لبعض الـمراجع اللي بيوفرونها لكم في الكوبي سنتر .
• بيكون فيه حفظ حزب من جزء عمَّ ، والتسميع يكون خلال فترة معينة عليه 20 درجة . فيه مناقشة لجزئية كتاب ، تعطيكم اسمه وجزئية المناقشة . تقرأينها وتسألك كم سؤال سهل عليها ، وفيه درجة المشاركة اللي لازم تشاركين بمعدل 3 محاضرات كل شهر ويختلف من دكتورة لأخرى .
• الإختبارات 2 . شهري ، ونهائي . ويكون غير موحد . كل شعبة والأستاذة الخاصة فيها ، اسلوبها كيف ، عدد الأسئلة ، كل شي !
• اللي درستنا كانت الدكتورة الوحيدة اللي تدرس سنة أولى . دكتورة جداوية :”) كانت لهجتها تجيب لي السعادة ! مثقفة ومخها نظيف واسلوبها ممتع حتى لو المحاضرة موضوعها ممل ! اسلوبها في اشراك البنات في الحديث مذهل ! ولأنها كانت ممتعة وتتوسع وتعطي أمثله ، كانت تطول شوي في المحاضرة وان كانت قصيرة . والبنات مايعجبهم  لأنها “تتفلسف” من وجهة نظرهم ، اما أنا فهذي قمة المتعة .

7- إنجليزي ينقسم إلى كلاسين ورا بعض باعتبره كلاس واحد فيكون( 5 محاضرات – 20ساعة – في الإسبوع )

• *قلوب أبديه* ، هذي المادة تشكر السنة التحضيرية عليها مع قبلة على الرأس . بيان اللي دخلت تحضيري مو نفس اللي طلعت أبدًا في الإنجليزي .
• ينقسم الإنجليزي لقسمين ، انجليزي عام تدرسونه السمستر الأول ، وانجليزي تخصص خاص بالمسار حقكم يتخصص بمصطلحات طبية لو صحي وهكذا ، تاخذونه بالإضافة للعام في الستمستر الثاني .
• كانوا كل اللي يدرسوننا أجانب ، هنديات ، باكستانيات ، امريكيات ، نيوزلانديات ووو ! يجنووون اللي يدرسون بشكل هائل ! هذا الكلاس اللي تاخذ راحتك فيه . تحسين انك في معهد مو جامعة . ممتع ممتع ممتع للأبد ! يطورك بشكل هائل ! 20 ساعة أسبوعيًا من الحديث والكتابة بالإنجليزية . بتطورك بشكل هائل !
• طبعًا أول اسبوع بيكون في إختبار تحديد مستوى للإنجليزي . بحيث تقسمون في كلاسات الإنجليزي إلى 3 مستويات ، متقدم ، متوسط ، مبتدئ . ولا علاقة له بالدرجات ولا الأفضلية في المنافسة . فقط عشان تكون في الـمستوى المناسب وتستفيد بالشكل المناسب .
• كلاسات الإنجليزي ، بتكون بحسب مستواك في الإنجليزي مع مجموعة بنات . بقية المواد تاخذينها مع شعبتك اللي سجلتي فيها مع قروبك . فاللي معاك في الإنجليزي مو شرط نفسهم .
• الكلاسات تنقسم لقسمين . قراءة وكتابة ، تدرسكم إياها استاذه . بعدين تبدلون الكلاسات وتاخذون إستماع ومحادثة . يوفرون لكم الكتب بحسب مستوياتكم . كتب خاصة بتعلم الإنجليزي تابعة لـ أوكسفورد . كل مستوى بيدرس مجموعتين كتب . المبتدئ البيسك +1 . المتوسط 2+3 . المتقدم 4+5 . كل مجموعة يكون لها كتابين واحد للقراءة والكتابة والثاني محادثة واستماع .
• تقدرون تسوون “إسقاط” للكلاس ، فما تحضرون ولا تدرسون ولا تختبرون ، وتاخذون كامل في الدرجات هذي . لكن بعد ماتجيبون الدرجة المطلوبة في إختبار التوفل أو الأيلتس . وتقدمون اوراقكم للجامعة . في التوفل أعتقد كانوا طالبين 350 وفوق . والايلتس 5.5 وفوق !
• الغياب عندك 20 ساعة غياب . بعدين تاخذين حرمان . وماتحضرين الاختبار النهائي . فتحملين المادة .
• لكن انا ما أنصح تكنسلون كلاسات السمستر الأول ! لأنها جدًا مفيدة وممتعة . وحتى لو إنجليزيتك ممتازة ماتتصورين شكثر بتضيعين عليك فرصة مذهلة في تطويرها أكثر .
• أخذت الآيلتس وقدمته انا ، لكن في السمستر الثاني وأقول لكم بعدين ليش .

وبكذا تكون مواد السمستر الأول خلصت . فيكون مجموع الساعات 32 ساعة إسبوعيًا .

• الفصل الدراسي الثاني

1- الكيمياء ( محاضرة ، ساعة إسبوعيًا + معمل ، ساعتين إسبوعيًا )

• درسنا الكيمياء العضوية ، لو كنتوا شاطرين فيها في الثانوي مافي مشاكل لأنها إعادة .
• نظام المحاضرات نفسه . الكتاب جديد لكن ما استخدمناه أيضًا . والإختبارات نفس النظام.
• الدكاترة نفسهم ، وابتلينا بنفس الدكتورة . لكنا الحمد لله عدينا وفهمنا .

المعمل .

• تاخذونه أسبوع وأسبوع . تاخذون تجارب ممتعة منوعة .
• بيكون عندكم ملازم للمعامل بتنزل في الكوبي سنتر بعد .
• ولأن القسم طيب ، مافي فاينل بمعنى فاينل . فيه درجات على الحضور و الأوراق اللي تسلم كل محاضرة . فيه إختبارات قصيرة على تجارب تسوونها بنفسكم . والفاينل –بمعنى موحقيقي- تكون تجربة شوي كبيرة مع حفظ لبعض الادوات في المختبر .
• تحتاجون لاب كوت . واللي تنساه تتهزأ XD  .
• المعمل ممتع وسهل عمومًا . واللي يدرسكم معمل غير المحاضرات . و رئيسة القسم ماتعطي معامل هيييه ! فارتحنا ههههه .

2- الفيزياء ( محاضرة ، ساعة إسبوعيًا + معمل ، ساعتين إسبوعيًا )

• درسنا الموائع ، الحرارة ، وما إلى ذلك .
• نظام المحاضرات نفسه ، الكتاب نفسه .
• الإختبارات ، اختبار شهري . ونهائي : النهائي تختبرون عن الفصلين ثنينهم .

المعمل

• اسبوع واسبوع . تجارب سهله و بصراحة ماكانت تشكل فرق واحيانا مو مفهومة تماما كيف بتجي في النهائي . وغالباً ماجات هالنوع هههه .
• بيكون اوراق المعمل كل محاضرة بمحاضرتها تنزل في المعمل .
• اللاب كوت غير مطلوب . لكن اللي ماتلبسه لازم ماتلبس عباية ولبسها مايكون مخالف.
• فيه إختبار فاينل ، لكنه على ورق . كان سهل مجملًا . بعدين تفهمون قصته . يعطونكم مراجعة تذاكرون منها له .

3- الأحياء ( محاضرة ، ساعتين إسبوعيًا + معمل ، ساعتين إسبوعيًا )

• درسنا بقية الـأجهزة في الجسم . كلهم كلهم !
• المحاضرات بنفس الأسلوب ، وبتلاحظون أنكم تتمرسون وتسهل عليكم المصطلحات وفهم المحاضرة بسرعة وَالكتابة بعد .
• الإختبارات ، واحد شهري . والنهائي للسمسترين .

المعمل

• اللاب ممتع جدً جدًا ! تشوفون الصفات الوراثية ، تقيسون الضغط ، تشوفون بالمجهر عينات ، تسوون فحص زمرة الدم . أشياء جميلة بصراحة .
• اللاب كوت مطلوب . المانول (ملزمة المعمل ) مطلوبة متوفرة في الكوبي سنتر .
• فيه نهائي . عبارة عن محطات تمرون عليها وتجاوبون عنكم في الورقة باجابات قصيرة ، عن اسماء اداوت ، معرفة فصيلة الدم ، الصفة الوراثية والصيغة لها ، شرائح في المجهر تتعرفون على العضو ، او نوع الخليلة او نوع النسيج . سهل بشكل عام .

4- مهارات تعلم وبحث ( محاضرة ، ساعتين أسبوعيًا )

• هذي المادة تشبه مهارات الإتصال من حيث سهولتها . اشياء عامة ، كيف نتعلم ، كيف ننشئ خريطة ذهنية ، انواع الذكاء ، كيف نعد البحث العلمي وهذا شي مهم . بالعربي
• الكتاب توفره الجامعة .
• فيه بحث علمي كامل شامل عليه 20% . تختارون موضوع وتسوون بحث حقيقي بفصوله بمراجعه بمحاوره . متعب لكن في النهاية تشعرون بالإنجاز . الأستاذة تتابعكم فيه خطوة بخطوة .
• فيه تكليفات بعد كل بضعة فصول . تكونون مطلوبين تجاوبون سؤال او مجموعة اسئلة . فيه 3 تكليفات علما اتذكر ، كل واحد 7 درجات .
• المادة سهلة عمومًا ، بس البحث يحتاج له متابعة .

5- التربية البدنية والصحية ( ساعتين ، محاضرة اسبوعيًا )

• تنقسم المادة لقسمين . نظري (صحي ) . وعملي (بدني ) . بالعربي
• الصحي ، نص السمستر تدرسون فيه اشياء عامه عن الغذاء ، التغذية ، الاطفال ، المرأة الحامل ، سرطان الثدي ، الصحة النفسية ، الاسعافات الأولية . سهل عمومًا لكن معلوماته كثيرة جدًا .وفي نهاية الصحي تكونون مطالبين بإنشاء حملة صحية توعوية عن اي مرض أو مشكلة صحية في الجامعة . تقيمون على صحة معلوماتكم ، اسلوبكم ، تنظيمكم وحتى لغة جسدكم حيث يحضرون أساتذة مهارات الإتصال . لكن احنا لأن عددنا كبير وتأخرنا في التقديم وكنا نحتاج نخلص بسرعه المجموعات الاخيرة سوته في الكلاس .
• البدني ، تدرسه لكم استاذة ثانية ، اول محاضرتين نظرية عن العضلات والغذاء وما إلى ذلك . بعدها تبدؤون أمتع جزء في التحضيري كله . الريااضة !!
• فيه صالة رياضة في الجامعة . كلاس عادي تقريبًا بس مزود بجدار مرايا . فيه السجادات اللي تسوون عليها رياضة ونسيت اسمهم صراحة . وتبدأون تسوون رياضة ماعمركم سويتوها في حياتكم . ممتع ومضحك ومخجل اننا بسرعه نتعب ههههه . كنا نطلع من الجامعة واحنا مهدودين !
• تلبسون فيه ملابس رياضة . بس ماتتمشون فيها في الجامعة .
• في النهاية في فاينل بدنية عملي . وكان عبارة عن عدد معين من البوش أب خلال 30 ثانية + عدد معين من الست  أب خلال 30 ثانية + إختبار الوثب من الثبات ( تقفزين بدون ركض لمسافة معينه ) + تمارين رياضية تسوينها مع قروب بنات يراعى فيها صحة الـتمارين وَ تناغم المجموعة وهي تسويها .
• ونهاية السنة فيه نهائي نظري للقسمين ، موضوعي ، اختياري وصح وخطأ كان سهل بشكل عام . لكن مذاكرته متعبة لأن المادة طويلة .

6- العقيدة والأخلاق ( محاضرة ، ساعتين أسبوعيًا )

• مادة سهله جدًا جدًا هذا السمستر ، كل محاضرة عبارة عن ركن من اركان الإيمان ، وفي النهاية محاضرة عن اخلاق المسلم . بالعربي
• حفظ حزب من جزء 28 ، نفس نظام المناقشة والمشاركة والإختبارات .

7- إنجليزي ( 5 محاضرات ، 20 ساعة أسبوعيًا )

• هذا السمستر بعكس السمستر الأول ، كلاسات الإنجليزي صارت تاخذينها مع شعبتك . لأن تسجيل الشعب تغير ، بحيث مثلاً البنات ذوات المستوى المتقدم في الإنجليزي ، يسجلون في شعبة 10 – 11 – 12 . المتوسط في 5 – 6- 7- 8 –9 وهكذا ! فيكون اللي معاك في كلاس الإنجليزي معاك في بقية المواد .
• هذا السمستر ، تدرسون في نصفه الأول أنجليزي عام ،بنفس الاسلوب للسمستر الأول . لكن اللي في المستوى المبتدئ يصيرون متوسط ويدرسون كتبهم . المتوسط يدرسون للمتقدم . المتقدم ياخذون كتب جديدة .
• النصف الثاني من السمستر . تاخذون الانجليزي العام في كلاس واحد . اما الكلاس الثاني فهو إنجليزي التخصص .
• في نهاية السنة بتكونون مطالبين بـ إختبار إنجليزي عام + اختبار توفل تبع الجامعة + إختبار إنجليزي التخصص . اللي يكونون ماخذين آيلتس او توفل ومقدمينه قبل نهاية الوقت اللي يستقبلون فيه –ويحددونه لكم- . مايحضرون في كلاسات الانجليزي العام في النصف الثاني من السمستر . فيكون عندك بريك تقدرين تستغلينه خصوصًا أنه الـسمستر الثاني ادسم من الأول . بالاضافة أنك بس تختبرين اختبار التخصص والباقي تضمنين فيه الفل مارك !
• انا السمستر الثاني اخذت ايلتس (ولو تقدرون أخذوه بأقرب وقت وخلوا الشهادة عندكم ، ولو طلبوه ودوه لأن بنات كثير قرروا متأخر انهم يبون يختبرون ولكن ماكان فيه مواعيد شاغرة لعقد الإختبار ) قدمته وماكنت احضر الكلاسات للنصف الثاني من الـسمستر للإنجليزي العام .
• طبعًا طوال السنة ، الحضور عليه درجات ، في واجبات و تكاليف ، كتابية وشفوية عليها درجات .

• كلية الطب تشترط أولا : حصولك على تقدير B في المواد  العلمية والإنجليزي ، ثم تكون المفاضلة بالمعدل العام .
• كلية طب الأسنان تشترط أولًا : حصولك على تقدير C+ في المواد العليمة والإنجليزي ، ثم تكون المفاضلة بالمعدل العام .
• كلية الصيدلة الإكلنيكية تشترط أولًا : حصولك على C+ أو B –نسيت صراحة- في الكيمياء والأحياء ، ثم تكون المفاضلة بالمعدل العام .
• كلية العلوم الطبية وكلية التمريض : لا شروط لهم ، المفاضلة بالمعدل العام فقط .

• الدوام من 8 الصباح

1. السمستر الأول ( يوم إلى 12 ، يومين إلى 3 ، يومين إلى 5 )
2. السمستر الثاني ( يومين الى 3 ، ثلاث ايام إلى 5 )

• البريك ثابت للصلاة والغداء والراحة وكل شي ، ساعة كل يوم من 12 إلى 1 .
• الدوام يكون في مبنى 350 ، بتضيعيون أول شي بس بيعطونكم خريطة في اليوم التعريفي ههههه . عدا الإسلاميك في مبنى الاسلاميك . واللابات في مبنى 65 الطب.
• يتوفر خزانات ( لوكرز ) تستأجرونهم لمدة سنة بـ100 ريال . بتحويل بنكي للجامعة بيقولون لكم التفاصيل بعدين .
• فيه كوبي سنتر (قرطاسية وتبيع المحاضرات )
• فيه مكتبة لإستعارة الكتب خاصة بالجامعة . ومكتبة في الجامعة تبيع كتب دراسة .
• فيه مطعم الجامعة يقدم وجبات فطور وغداء بسعر رمزي . جربنا الغداء مرة وكان بعشرة ريال وكميته مرة ممتازة . الأكل جيد نوعًا ما .
• فيه دانكن دونتس و جوفريز –جدد مافتحوهم إلا آخر السنة – وفي مبنانا بعد كانوا قاعدين يجهزون كوستا كوفي لكن مافتحوه لنا : (
• فيه كافتيريا الجامعة .
• افتتحوا مطعم leaves السمستر الثاني ،في مبنانا وقدام كلاسنا بالضبط هههه  واللي كان يوفر فطور لذيذ ، وغداء مناسب.
• فيه الناعورة . مخبز وبقالة تبيع كل الأشياء الضارة واللذيذة القديمة من شبسات وشوكولاته وو .
• الإدارة حبّابة ، تقدرين تدخلين عنهم وتشتكين وتشتكين وتشتكين وتتحلطمين وهم يبتسمون لك ويهدونك ، مو شرط يسوون شي بصراحة ، لكنهم خلوقين وتقدرين تفرغين طاقتك عندهم .
• اللبس ، تنورة طويلة بأي لون لا يشترط + بلوزة أو قميص نصف كم –أقل شيء- . لا تتهورون وتقصرون التنورة واجد –تهوروا شوي بس هههه- انا من اول شهرين اخذت مخالفة زي ههههه – بس أول مرة يكون كتنبيه بس .
• بالنسبة للجوالات المزودة بالكاميرا . نظامًا ممنوعة . لكن الجميع كان يحضرها الجامعة .
• ابراز البطاقة الجامعية مطلوب عند الدخول للجامعة – لو طلب منك – وفي حال ما أبرزتيها يسجل أسمك .
• الجامعة لها نشاطات جميلة كل ثلاثاء –عادة- . يوم رياضي ، يوم مفتوح ، يوم التوعية بسرطان الثدي .
• الجامعة لنا نوادي جميلة ، نادي عون للعمل التطوعي ، نادي للرسم ،  نادي التصوير ، نادي قراءة جماعية – سجلت في نادي عون ، لكن لم نكن نملك وقتًا للمشاركة للأسف ، بقية النوادي لا اعرف ان كانت قامت بنشاطاتهم او لا-

هذي التدوينة صريحة جدًا ! ما بزكي هذي السنة لاني ضدها ! لكن مابظلمها .

إيجابيات للسنة التحضيرية وقرارات جيدة أتخذت .

1. تطوير في الإنجليزي بشكل ممتاز فعلًا .
2. تعويد الطالبة على النظام الجامعي . في البداية كنا نتوقع أن زي المدرسة تسمعين المحاضرة وتفهمينها وخلاص ! لكن لا ! إذا ماتعلمتي تجدين أول سنة مابتجدين لآخر سنة .
3. تجمعك بصديقاتك اللي بيختارون تخصصات ثانية لسنة زيادة !
4. يفتح المجال لطالبات ماعندهم فكرة عن الجامعة في إختيار تخصصهم بشكل أدق بعد هالسنة . يمكن بعد هالسنة تشعر البنت انها ماتقدر تستمر في تخصص صعب كالطب ، فتدخل علوم طبية . ممكن تكون تبي صيدلة لكن تكون مو شاطرة في الكمستري وتفكر مرة ثانية وتشوف نفسها في التمريض . –حتى وإن كنت مو من هذا النوع لأن رغبتي ماتغيرت لكن مانقدر ننكرها-
5. افتتاح المقاهي والمطعم الجديد . تحسب لهم نقطة جيدة .
6. كتاب البايولوجي ، اشتريناه من المكتبة الموجودة في المكتبة بـ300 ريال وتزيد . الجامعة تفاهمت مع الشركة وخفض لنا إلى سعر 35 ريال فقط !!! –بيد أننا سمعنا اشاعات ان الجامعة وقعت في مشاكل مع الشركة لأن الشركة أعطت تخفيضًا وشعرت أنها خسرت أو الجامعة خسرت ، المهم بقية الكتب لم تخفض بعدها ههههههه –
7. وفرت لنا الإدارة في مبنانا مؤسسة تسمى بـ “رجل التوصيل” كان يقدم لنا مجموعة من المطاعم المختارة ، يطلب منها مانريد ، ويأخذ أجره للتوصيل 25 ريال . كان مفيدًا جدًا في أوقات الأزمات وخصوصًا دوام الساعة الخامسة .
8. السنة التحضيرية سنة الضغط والصبر والأعمال الجماعية . فيها تعرفين من يساندك ومن يعيقك . من العمل معه في مجموعة مريح ومن هو صعب وكسول . يعرفك من يكون سلبيًا متكاسلًا ومن العكس . السنة التحضيرية تفتح العينين تمامًا لمن ستتخذين رفيقًا بقية السنوات.

السلبيات

1. كوننا أول سنة يطبق النظام عليها ، فنحن عانينا الأمرين . القرارات متخبطة جدًا جدًا , قرار اليوم يمحوه قرار الغد . انظمة تتغير ، نسب على إختبارات تتغير ، مواعيد تتغير . كل شي بشكل مختصر ! لكني اتوقع بشكل كبير أن هذي أغلاط السنة الأولى فقط والوضع بيتحسن في السنة الجاية . لأن كانوا حتى الدكاترة مو متعودين على النظام . والمسؤولات قسم كبير منهم جديد فيعني !
2. قسم الأولاد كان له السلطة العليا ! وغالبًا كل التغييرات تأتي من عنده ! دائمًا كنا مسيرين لهم . كانوا معترضين مثلًا على أن المعامل تكون كل أسبوعين . وطالبوا بوضع نظام ينص على وجودها أسبوعيًا وفعلًا حدث هذا لكن لم يطبق فيما بعد لأن الدكتورات ذاتهم لم يكن يحتجن أكثر من معمل كل أسبوعين . مثال آخر : في اختبار الرياضة . كان من المفترض أن يكون المطلوب في إختبار “البوش أب” . 18 مرة في 30 ثانية . وعندما طبقناها فوجئنا بدرجاتنا منخفضة وصلنا أن قسم الأولاد قرر رفع المعايير . عمومًا وعدتنا الدكتورة برفع الدرجات ولا أعلم إن فعلت أو لا .
3. الدوام طويل جدًا . كنا نصل للبيت الساعة السادسة –مشوار الطريق- ونكون منهكين تمامًا . ماكنا اجتماعيين مع اهلنا كما سابقًا . كنت اضحك مع صديقاتي واقول ” أهلي صاروا اصدقائي ، وصديقاتي صاروا أهلي ” .
4. سنة ضغط نفسي وجسدي وعقلي . الدوام الطويل ، المنافسة القوية على المقاعد ، القلق من عدم القبول  . كلها كانت متعبة ولكنها مفيدة على المدى الطويل . تخرج طاقاتكم وعزيمتكم الدفينة .
5. السستم كان مرة تعبان خلال إختبار الاي سي دي ال . نخاف اننا نرسب في الإختبار من السستم اكثر من خوفنا من مذاكرتنا .
6. رفضهم فتح الأوراق النهائية لإعادة التصحيح . لي صديقة لم تقبل في التخصص التي تريد فقط بسبب مادة واحدة كانت الدرجة فيها منخفضة بطريقة غريبة مقارنة بالبقية خصوصًا وانها متأكدة من مستواها ! لكن رفضوا فتح الورق !!! وهنا أكبر × !

نقاط عفوية ، لكِ أنت !

• إياكِ إياكِ إياكِ باليأس والعيش في فكرة ” مابنقبل اللي أبي أصلًا ” ، السنة سنة ضغط نعم ، لكنها غير مستحيلة ! شيء طبيعي ستشعرين بالإكتئاب ليوم يومين ، تكلمي مع أحد ما قريب ، اتخذي صديقة متفائلة فصدقيني من حولك هم بالضبط من سيزرعون في عقلك القوة وفي قلبك الأمل او سيزرعون شوكًا محطمًا . حتى ولو جائت درجة هذه الإختبار اقل من المتوقع تستطيعين دائمًا أن تعوضي !
• لا تتهاوني في المذاكرة ! صدقيني ستفاجئين ، نظام الجامعة مختلف . انا كنت في المدرسة من الطالبات اللاتي تعتمد80% على مايقال في الدرس واستطيع استرجاعه . أما في الجامعة الوضع مختلف ، اللغة مختلفة ، مستوى الطالبات معك مختلف ، هدفك مختلف ، لا تستهيني بهدفك !
• ضعي جدول مذاكرة أنتِ وصديقاتك . لي بضع صديقاتي وضعنا لنا جدولًا لنذاكر قبل الإختبارات وخصوصًا في الفصل الدراسي الثاني كون أننا نختبر في مادة لفصلين دراسيين . كنا نلتزم به وندرس بجد ، وكنا من الفئات القليلة التي لا تذهب للإختبار دون نوم أو وهي تشعر بالضياع كونها تأخرت في الدراسة .
• أهتمي بغذائك ، تأنقي وألبسي ملابس جميلة ، أضحكي مع صديقاتك . عيشي هذه السنة بمتعة ! لأنها لن تتكرر . صدقيني سنة متعبة لكنها ممتعة جدًا . في الإجازة كنت وصديقاتي نسترجع الصور فيها ونضحك وقلبنا يتفتفت على جمال تلك الأيام .
• ثقي بالله ثقة تامة صادقة . ان الخير هو ماكتبه . لا تقنطي ولا تيأسي من روح الله . أستودعي الله امانيك وحلمك وهدفك ! قومي بالأسباب ولا تنسي أن توفيق الله هو أول سبب .
• تكلمي مع أمكِ ، اشكي لها ، اطلبي دعائها ، ارضيها بقدر ما تستطيعين . أجزم أنه بعد توفيق الله تعالى . قبولي في التخصص الذي ارغب جاء من دعاء امي أولاً ثم جدي واجتهادي .
• الجامعة مو زي المدرسة . اذا غبتي في من يحاتيك وياخذ الواجبات عنك ! أبدًا لا تعتمدين على أحد يكتب عنك ، أو ياخذ عنك أو أو . اعتمدي على نفسك ولا تدخلين نفسك في دوامات .
• الجامعة ماتدرسين بس من الدفتر . الدكاترة أساليبهم مختلفة وتلخيصهم مختلف . حاولي تعرفين بالضبط ايش تحتاجين تدرسينه في نفس الوقت لا تدوخين نفسك وتدرسين كل محاضرة أي دكتورة تنزلها ! شوفي بالضبط ايش تحتاجين .
• عرفي كل دكتورة ايش اسلوبها . في دكتورة عصبية ماتدخل بعد عشر دقايق ، دكتورة ماترضى تطلعين من المحاضرة ولو بإذن ، دكتورة تحب تكونون مطلعين على الدرس السابق ، دكتورة تسأل في الدرس السابق ، دكتورة ماتدري عن الدرس السابق .
• خلك واثقة بنفسك ، إيجابية ، وساعدي الناس كثر ماتقدرين . لا تصيرين طماعة على أحد بمعلومة ولا تبخلين عليهم 10 دقايق تشرحين لهم فيها مسألة . ساعدي الناس ، الله يساعدك .
• قروب الفيس بوك لو كان موجود مفيد جدًا . لكن مثلاً – في حالة دفعتنا – كان القروب يوترني . لما أدخل الناس تكون سلبية ، اشاعات ، توتر ، تضخيم الأمور . كنت اتوتر ولما ادخل قبل إختبار احس اني مو مذاكرة . القروب مفيد ، فيدي ، استفيدي ، لكن لو كان فيه مثل اللي فوق ، لا تدخلين عليه يوميًا ، ولا حتى تهتمين لأي خبر مو أكيد فيه . كوني مطلعة لكن  لا تكتأبين منهم .
• خلي علاقتك بالجميع محترمة . وكوني واثقة انك بتشوفين شخصيات غريبة وناس من خلفيات مختلفة . بتصير مشاكل صغيرة , وكبيرة , لا تتفاجئين .
• في النهاية . استمتعي ولا تسمعين كلام المحبيط –يمكن قلتها الف مرة لأنها صج حقيقية-

تمت بحمد لله أطول تدوينة على مر التاريخ !

ماذكرت تجربتي بشكل حقيقي واضح ، لكن رأيي موجود وحاولت أحط كل شي مهم او الناس اللي طلبت مني التدوينة تعتقده مهم فطالت التدوينة شوية ؛) .

اتمنى تكون تدوينة مفيدة ومابقول خفيفة لأن أكيد تدوينة بهالطول مستحيل تكون خفيفة . بس ماقدرت اختصر للأسباب اللي قلتها فوق .

اتمنى لكم سنة موفقة سعيدة ، ويارب تدخلون اللي تبون .

أي سؤال بيان موجودة دائمًا ؛)

تحية طيبة .