تجربة السنة التحضيرية في جامعة الدمام #تحذير :تدوينة طويلة جدًا وحتى انقطاع النفس .


بسم الله الرحمن الرحيم

تحية طيبة ، سلام الله عليكم ورحمته وبركاته .

تدوينة اليوم اعتبرها إكمال لمسيرة ذكر التجارب لمرحلة التخرج من الثانوية والمرور بتجربة التحصيلي والقدرات في تدوينتين ( هنا ، هنا ) والتي اعتقدها جدًا مفيدة واستمتع وانا أقرأها في مدونات أخرى .

ولكن –ويالها من لكن كبيرة- هذه السنة بالذات لم أكن متحمسة جدًا للكتابة عنها إلا في اول شهر من الفصل الدراسي الأول . بعدها أختفى كل شيء وستعلمون لم هذا خلال استمراركم في قراءة هذه التدوينة والتي أحذركم أنها طويلة جدًا جدًا وحتى إنقطاع النفس . ما جعلني أحسم أمري بكتابتها هو أن الكثير –وهذا مافاجأني- طلب مني إياها وكان يسأل عن موعدها وينتظرها بفارغ الصبر ، حتى أن صديقات لأختي ، وأناس من أطراف صديقاتي طلبوها . خجلت أن أبخل بأي معلومة عنهم ، فهذا ما سأبحث عنه لو كنت أنوي الدخول لهذه السنة أيضًا .قراءة تجارب ! كما أن طلبهم لي نوعًا ما أشعرني بالسعادة –بغض النظر عن كم التوتر والمسؤولية الذي شعرت بهما – أن تعتقد أن صوتك مسموع ، يجلب السعادة ولو أنكرنا .

تحذير آخر : هذا التدوينة صادقة جدًا ربما لا تكون متفائلة بقدر ما تتوقعون ، ولن تكون محبطة كما ستخشون بعد قراءة الجملة التي قلتها للتو .

تحذير آخر آخر : هذه التدوينة بحسب رأيي الشخصي ، وبحسب النظام اللي استخدم معانا ، غير مسؤولة عن أي تغير قد يطرأ على نظام الجامعة . والخطأ وارد في التدوينة لكني حاولت قدر الامكان احتراز الدقة .

بسم الله الرحمن الرحيم فلنبدأ !

قبل سنة و عشرة أيام . حصلت على رسالة قبولي في المسار الصحي في جامعة الدمام . والذي كنت أطمح من خلاله أن أنتقل لكلية طب الأسنان التي افتتحت منذ سنة –في ذلك الوقت- قسم البنات .


  • نبذة من موقع الجامعة ذاته :

image

المختصر المفيد :

  • السنة التحضيرية في جامعة الدمام تابعة لعمادة السنة التحضيرية والكليات المساندة ، أستحدث هذا النظام على سنة تخرجي –للأسف لأن لولاه كنت بوفر سنة من الضغط النفسي كون نسبتي كانت جدًا عالية وتدخلني الكلية اللي أبي بدون منافسة ثانية- ( ونقول أنا وصديقاتي أنه استحدث نحسًا وحسدًا من الدفعات اللي أصغر منا كوننا نفذنا بجلدنا من تطوير المناهج) .
  • السنة التحضيرية هي نظام يجمع كل الكليات المتشابهه في مجالها مع بعض في مسار واحد . حيث أن جميع الكليات المشتركة في مسار تدرس نفس المواد للسنة الأولى ، فيجمعونهم في مسار الهدف منه أن يكون الدخول للـكلية بحسب بعض الشروط التي يحتاج الطالب إجتيازها بجانب المفاضلة على المعدل العام .
  • تنقسم السنة التحضيرية إلى ثلاثة مسارات ، يحتوي كل مسار فيها مجموعة من الكليات :
  • الصورة من موقع الجامعة

image

image

نظام الدراسة سنوي . بحيث في بعض المواد يكون إختبارها النهائي للفصلين نهاية السنة . ويعني في نفس الوقت أنك ماتقدر تخلص سمستر وتاخذ عليه شهادة ، فمثلا تكون المادة 60% من درجتها من السمستر الأول و 40% على السمستر الثاني . بعض المواد تكون فصلية تدرسينها في سمستر واحد بس وتنزل درجتك فيها .

كنا 460 بنت ، مقسمين على 14 شعبة . 33 طالبة في الشعبة –أكثر أو أقل- .

في اليوم التعريفي بـيعطونكم الجداول للشعب . تختارون اللي تبون وتسجلون موادكم بحسب اللي بيعلمونك في الشعبة اللي تبونها . لكن في السمستر الثاني بيكون تقسيم الشعب مختلف .

image

  • الفصل الدراسي الأول

1- كيمياء (  محاضرة –ساعة واحدة- في الإسبوع )

  • درسنا عن الكيمياء الغير عضوية ، حسابات وما إلى ذلك . نفس منهج ثانوي بالضبط بس إنجليزي . فيه كتاب لكن مااحتجناه .
  • المحاضرات تتوفر في الكوبي سنتر كل أسبوع وكانت مذاكرتنا منها كلها إلا اللي ماتفهم ترجع للكتاب .
  • اختبرنا فيه إختبار شهري . وإختبار فاينل . كلها كانت موضوعية ( إختياري ) . من المفترض كونه نظام سنوي ان الإختبار النهائي يكون نهاية السنة عن الفصلين لكن قسم الكيمياء الطيب قرر يكون فصلي بحجة أننا كلنا بنرسب في الكيميا لو كان سنوي هههه وبصراحة احس صج !
  • الدرجة ما تنزل بنهاية الفصل الدراسي الأول على السستم لأن المادة بنكملها السمستر الثاني . السمستر الأول عليه 40% . في نفس الوقت كان القسم يزودك في الاختبار بنموذج اجابة إضافي ، تعبينه وتاخذينه معاك . بعد الإختبار يعلقون نموذج الإجابة فتصححين لنفسك .
  • اللي درستنا إياه اسوء دكتورة في القسم ، البقية كلهم كويسات مرة مرة مرة مرة . احنا ابتلينا برئيسة القسم الكسول جدًا والباردة . وعشان كذا كانت تغيب واجد فيجمعونا مع كلاسات ثانية ونستمتع بالشرح الحقيقي . عمومًا مهما كان الدكتور سيء غالبًا مابيأثر لأن المنهج معيود ! ولو فاهم في ثانوي حتفهم في الجامعة بنسبة 85% بدون شرح إضافي .

2. فيزياء ( محاضرة-ساعة واحدة- في الإسبوع )

  • درسنا اشياء اساسية جدًا جدًا جدًا جدًا . منهج سهل بشكل كبير ! عن الوحدات ، قوانين نيوتن ، والطاقة والشغل ! بس ! إعادة لثانوي !
  • المحاضرات تتوفر في الكوبي سنتر اسبوعيًا . لكن مذاكرتنا كانت 90% منها من نوت الأولاد أوضح وأشمل . كان في تواصل بيننا وبين الأولاد عن طريق قروب الفيس بوك وكنا نوصل لهم نوتنا ويوصلون لنا نوتهم .
  • الكتاب تشترونه لو تبون أولا لا ! الحاجة الوحيدة له قراءة اسئلة المسائل والأمثلة .
  • اختبرنا إختبارين شهريين . نص السنة ، ونهايتها . كل إختبار شهري نسبته من 10-20% يعتمد على جزئية الإختبار والمستوى العام للدرجات . لو كل الدفعة درجاتها سيئة يخفضون من النسبة عليها . الإختبارات كانت موضوعية ( إختياري) .
  • الدرجات تنزل ، وتثبت على لوحة الإعلانات لكل إختبار شهري . لكنهم كانوا يطولون في التصحيح .
  • اللي درستنا كانت بروفيسورة سودانية خلوقة وحبوبة جدًا جدًا جدًا . تستحين من كثر خفة دمها وأخلاقها . بس الشرح :\ . كانت ذكية لكن ماعندها إسلوب توصيل معلومة كويس . لو رحتي لها على جنب تشرح لك كويس لكن في الكلاس لا ! عمومًا المنهج مرة سهل وماكان محتاج ذاك الشرح أصلًا .

3.  أحياء  ( محاضرة –ساعتين- في الإسبوع ) .

  • بدأنا بدراسة الخلية مكوناتها ووظائفها ، الأنسجة وانواعها ، بعدين إنقسامات الخلية . المنهج معيود صح لكن مليء جدًا بالمصطلحات الانجليزية الجديدة اللي تحتاج حفظ . لكنها سهله بالمجمل العام .
  • بالنسبة للمحاضرات أنا جاني إكتئاب وصيحة بعد أول كلاس . لأن قسم البايولوجي يمنع إعطاء المحاضرات للطلاب مهما كان لأسباب مجهولة ! فكانت الدكتورة تعرض السلايدات واحنا ننقلهم وراها كلمة كلمة . أول محاضرة ماكنت قادرة ألحق أكتب وأسمع في نفس الوقت . مع الوقت ومع الممارسة نسرع في الكتابة ونركز أكثر ويكون الشي روتيني سهل.
  • الكتاب يعطونكم أسمه . مهم جدًا جدًا لأن سلايدات الدكاترة ماتلم كل الموضوع والإختبار يجي اشياء من الكتاب ! تعلمنا الدرس هذا بعد ماكان إختبار البايولوجي الأول كارثة ! كنا قرأنا الكتاب قبل النوم بشكل سريع ورحنا الإختبار و مفااجأة ! نص الإختبار مو عارفين نحله وكان اسوء درجة في البايولوجي منه .
  • اختبرنا إختبارين بنفس إسلوب الفيزياء . والنهائي نهاية السمستر الثاني .
  • درستنا أحسن دكتورة في القسم . أو بالأحرى أكثرهم *دفارة* . نوتها أكمل نوت ، تعطيك معلومات زيادة وتخليك تذاكرين زيادة وما يكون في الكتاب اشياء اكثر بواجد من اللي تشرحه . درجات طالبتها حسب اللي تقول عادةُ أعلى .

4.  مهارات إتصال ( محاضرة –ساعتين- في الإسبوع)

  • مادة الترويح عن النفس وكل شي . بالعربي ، عن مهارة الإستماع ، لغة الجسد ، طرق الإتصال ، مهاراته ، طرق التأثير . مهارة كتابة السيرة الذاتية . المقابلة الشخصية . مادة خفيفة دم وسهلة جدًا . وغالبيتها أشياء تعلمناها .
  • الكتاب توفره الجامعة . المذاكرة منه بطريقة الفهم . لأنه محشو بشكل هائل وحفظه مستحيل . الكتاب كان مليء بأخطاء املائية مضحكة ، وجمل خفيفة دم . كان امتع مادة ذاكرناها من كثر ما ضحكنا .
  • اسلوب الدراسة ، اول كم محاضرة الدكتورة تشرحها ، بعدين تبدأ تطلب منكم تقسيكم مجموعات . تسوون مع بعض شرح لفصل من فصول الكتاب في المحاضرة وهي تشرف فقط . وتسوون عرض آخر عن موضوع خارجي له علاقة بتطوير الذات ، تقيمون فيه على اسلوب الإلقاء ومهارات الاتصال ولغة الجسد اللي تعلمتوها .
  • في تكليفات فردية ، كل بنت مطالبة فيها . ( كتابة سيرة ذاتية مستقبلية لبعد 10 سنوات ، قراءة كتاب عن تطوير الذات وكتابة ملخص عنه ، بحث عن أحد مواضيع المقرر ) .
  • الإختبارات . فقط نهائي واحد آخر السنة عليه 40-50% ، البقية على التكاليف الجماعية والفردية .
  • اللي درستنا خفيفة دم . كل دكتورات القسم كانوا جدد من مصر . كنا ناخذ راحتنا معاها واجد ونضحك وياها ونعصبها ونراضيها بكم كلمة , كانت حتى لما تعصب تقول ” انتوا حتى لما الواحد عاوز يعيط عليكوا بتدحكوه ! وتضحك ” – بقية الدكتورات كلهم كويسات ما عدا وحدة يقولون كانت شديدة في تقييم المهارات وتدقق واجد على لغة الجسد حتى خلال قعدتك في المحاضرة .

5. حاسب آلي ( محاضرة عن ألف –4ساعات في الإسبوع)

  • هذي المادة تاخذون عليها شهادة معترف فيها عالميًا أسمها ICDL وهي تعني : الرخصة الدولية لقيادة الحاسب ( ادري ادري الأسم يضحك ههههههه ) . مفيدة تحطينها في السيرة الذاتية بعدين .
  • الكتاب توفره الجامعة لكن تبيعه لكم بـ 100 ريال .
  • محاضرتها متعبة لأن مدتها طويلة مع أن المادة سهلة ، لكن من 1 إلى 5 نكون مرهقين بشكل كبيير . تدرسون فصل نظري حفظ ، مكونات الحاسب وما إلى ذلك . بعدين تبدؤون عملي عن نظام الويندوز بعدين برامج المايكروسوفت اوفس ، وورد ، باوربوينت ، إكسل .
  • الإختبارات تنقسم قسمين ، قسم من الدكتورة نفسها ، وقسم من الشركة المسؤولة برة عن الآي سي دي إل . اللي من الدكتورة إما نظري ، أو عملي تعطيك أوامر وطلبات تنفذينها على ملف في الجهاز وتحفظينه وتصححه .
  • قسم الشركة وهذا اللي عليه الشهادة ، تختبرين بعد كل فصل إختبار تكون فيه الاجهزة موصله اون لاين مع الشركة . بحيث الشركة تعطي موعد للجامعة انه الاختبار يبدأ هالوقت . تدخلون بحسابات يسجلونها لكم الجامعة ، وتبدؤون اختبار من ثلاث اقسام كل قسم 12-15 سؤال . يكون الجهاز يتحسس حركة الماوس ، ولو طلب منك أمر وتحركتي ودرتي واجد تنقص درجتك ، لازم تكون خطواتك واضحة ومباشرة . نتيجة الإختبار اما تكون 5 لما تكونين طبقتي نسبه 70او 75% (نسيت كم بالضبط) صح !  أو تكون صفر لو طبقتي أقل من النسبة . فلو جبتي 100 او 80 نفس الشي . ولو جبتي 50 او 10 نفس الشي . اللي ماتعدي الإختبار لها فرصة ثانية بشرط تدفع قيمه الإعادة مو اكثر من 100 اعتقد 50 لأن الجامعة تكون دافعة للمركز قيمة محاولة لكل شخص فقط . واجهتنا مشكلة انه السستم كان احيانا يكون سيء جدًا ، فتعلق الأجهزة ومايكتمل تصحيح كافة اقسام الإختبار فترسب البنت . وتضطر تدفع وتعيده . عمومًا لا تحاتون مافي ولا بنت ماعدت المرة الثانية .
  • فيه بعض التكاليف تطالبكم فيها الـدكتورة مثل مشروع للوورد ، مشروع للإكسل ومشروع للباوربوينت .

6.  ثقافة إسلامية ( محاضرة – ساعتين – في الإسبوع )

  • تدرسون منهج عن مفهوم الثقافة الإسلامية ، الغزو الفكري ، الصهيونية ، الإستشراق ، الإحتلال ومواضيع على هذا المنوال . بالعربي .
  • الملزمة موحدة لعدد من الأستاذات ، وقد تختلف من أستاذة لأخرى وهي المصدر للمذاكرة بالإضافة لبعض الـمراجع اللي بيوفرونها لكم في الكوبي سنتر .
  • بيكون فيه حفظ حزب من جزء عمَّ ، والتسميع يكون خلال فترة معينة عليه 20 درجة . فيه مناقشة لجزئية كتاب ، تعطيكم اسمه وجزئية المناقشة . تقرأينها وتسألك كم سؤال سهل عليها ، وفيه درجة المشاركة اللي لازم تشاركين بمعدل 3 محاضرات كل شهر ويختلف من دكتورة لأخرى .
  • الإختبارات 2 . شهري ، ونهائي . ويكون غير موحد . كل شعبة والأستاذة الخاصة فيها ، اسلوبها كيف ، عدد الأسئلة ، كل شي !
  • اللي درستنا كانت الدكتورة الوحيدة اللي تدرس سنة أولى . دكتورة جداوية :”) كانت لهجتها تجيب لي السعادة ! مثقفة ومخها نظيف واسلوبها ممتع حتى لو المحاضرة موضوعها ممل ! اسلوبها في اشراك البنات في الحديث مذهل ! ولأنها كانت ممتعة وتتوسع وتعطي أمثله ، كانت تطول شوي في المحاضرة وان كانت قصيرة . والبنات مايعجبهم  لأنها “تتفلسف” من وجهة نظرهم ، اما أنا فهذي قمة المتعة .

7- إنجليزي ينقسم إلى كلاسين ورا بعض باعتبره كلاس واحد فيكون( 5 محاضرات – 20ساعة – في الإسبوع )

  • *قلوب أبديه* ، هذي المادة تشكر السنة التحضيرية عليها مع قبلة على الرأس . بيان اللي دخلت تحضيري مو نفس اللي طلعت أبدًا في الإنجليزي .
  • ينقسم الإنجليزي لقسمين ، انجليزي عام تدرسونه السمستر الأول ، وانجليزي تخصص خاص بالمسار حقكم يتخصص بمصطلحات طبية لو صحي وهكذا ، تاخذونه بالإضافة للعام في الستمستر الثاني .
  • كانوا كل اللي يدرسوننا أجانب ، هنديات ، باكستانيات ، امريكيات ، نيوزلانديات ووو ! يجنووون اللي يدرسون بشكل هائل ! هذا الكلاس اللي تاخذ راحتك فيه . تحسين انك في معهد مو جامعة . ممتع ممتع ممتع للأبد ! يطورك بشكل هائل ! 20 ساعة أسبوعيًا من الحديث والكتابة بالإنجليزية . بتطورك بشكل هائل !
  • طبعًا أول اسبوع بيكون في إختبار تحديد مستوى للإنجليزي . بحيث تقسمون في كلاسات الإنجليزي إلى 3 مستويات ، متقدم ، متوسط ، مبتدئ . ولا علاقة له بالدرجات ولا الأفضلية في المنافسة . فقط عشان تكون في الـمستوى المناسب وتستفيد بالشكل المناسب .
  • كلاسات الإنجليزي ، بتكون بحسب مستواك في الإنجليزي مع مجموعة بنات . بقية المواد تاخذينها مع شعبتك اللي سجلتي فيها مع قروبك . فاللي معاك في الإنجليزي مو شرط نفسهم .
  • الكلاسات تنقسم لقسمين . قراءة وكتابة ، تدرسكم إياها استاذه . بعدين تبدلون الكلاسات وتاخذون إستماع ومحادثة . يوفرون لكم الكتب بحسب مستوياتكم . كتب خاصة بتعلم الإنجليزي تابعة لـ أوكسفورد . كل مستوى بيدرس مجموعتين كتب . المبتدئ البيسك +1 . المتوسط 2+3 . المتقدم 4+5 . كل مجموعة يكون لها كتابين واحد للقراءة والكتابة والثاني محادثة واستماع .
  • تقدرون تسوون “إسقاط” للكلاس ، فما تحضرون ولا تدرسون ولا تختبرون ، وتاخذون كامل في الدرجات هذي . لكن بعد ماتجيبون الدرجة المطلوبة في إختبار التوفل أو الأيلتس . وتقدمون اوراقكم للجامعة . في التوفل أعتقد كانوا طالبين 350 وفوق . والايلتس 5.5 وفوق !
  • الغياب عندك 20 ساعة غياب . بعدين تاخذين حرمان . وماتحضرين الاختبار النهائي . فتحملين المادة .
  • لكن انا ما أنصح تكنسلون كلاسات السمستر الأول ! لأنها جدًا مفيدة وممتعة . وحتى لو إنجليزيتك ممتازة ماتتصورين شكثر بتضيعين عليك فرصة مذهلة في تطويرها أكثر .
  • أخذت الآيلتس وقدمته انا ، لكن في السمستر الثاني وأقول لكم بعدين ليش .

وبكذا تكون مواد السمستر الأول خلصت . فيكون مجموع الساعات 32 ساعة إسبوعيًا .

  • الفصل الدراسي الثاني

1- الكيمياء ( محاضرة ، ساعة إسبوعيًا + معمل ، ساعتين إسبوعيًا )

  • درسنا الكيمياء العضوية ، لو كنتوا شاطرين فيها في الثانوي مافي مشاكل لأنها إعادة .
  • نظام المحاضرات نفسه . الكتاب جديد لكن ما استخدمناه أيضًا . والإختبارات نفس النظام.
  • الدكاترة نفسهم ، وابتلينا بنفس الدكتورة . لكنا الحمد لله عدينا وفهمنا .

المعمل .

  • تاخذونه أسبوع وأسبوع . تاخذون تجارب ممتعة منوعة .
  • بيكون عندكم ملازم للمعامل بتنزل في الكوبي سنتر بعد .
  • ولأن القسم طيب ، مافي فاينل بمعنى فاينل . فيه درجات على الحضور و الأوراق اللي تسلم كل محاضرة . فيه إختبارات قصيرة على تجارب تسوونها بنفسكم . والفاينل –بمعنى موحقيقي- تكون تجربة شوي كبيرة مع حفظ لبعض الادوات في المختبر .
  • تحتاجون لاب كوت . واللي تنساه تتهزأ XD  .
  • المعمل ممتع وسهل عمومًا . واللي يدرسكم معمل غير المحاضرات . و رئيسة القسم ماتعطي معامل هيييه ! فارتحنا ههههه .

2- الفيزياء ( محاضرة ، ساعة إسبوعيًا + معمل ، ساعتين إسبوعيًا )

  • درسنا الموائع ، الحرارة ، وما إلى ذلك .
  • نظام المحاضرات نفسه ، الكتاب نفسه .
  • الإختبارات ، اختبار شهري . ونهائي : النهائي تختبرون عن الفصلين ثنينهم .

المعمل

  • اسبوع واسبوع . تجارب سهله و بصراحة ماكانت تشكل فرق واحيانا مو مفهومة تماما كيف بتجي في النهائي . وغالباً ماجات هالنوع هههه .
  • بيكون اوراق المعمل كل محاضرة بمحاضرتها تنزل في المعمل .
  • اللاب كوت غير مطلوب . لكن اللي ماتلبسه لازم ماتلبس عباية ولبسها مايكون مخالف.
  • فيه إختبار فاينل ، لكنه على ورق . كان سهل مجملًا . بعدين تفهمون قصته . يعطونكم مراجعة تذاكرون منها له .

3- الأحياء ( محاضرة ، ساعتين إسبوعيًا + معمل ، ساعتين إسبوعيًا )

  • درسنا بقية الـأجهزة في الجسم . كلهم كلهم !
  • المحاضرات بنفس الأسلوب ، وبتلاحظون أنكم تتمرسون وتسهل عليكم المصطلحات وفهم المحاضرة بسرعة وَالكتابة بعد .
  • الإختبارات ، واحد شهري . والنهائي للسمسترين .

المعمل

  • اللاب ممتع جدً جدًا ! تشوفون الصفات الوراثية ، تقيسون الضغط ، تشوفون بالمجهر عينات ، تسوون فحص زمرة الدم . أشياء جميلة بصراحة .
  • اللاب كوت مطلوب . المانول (ملزمة المعمل ) مطلوبة متوفرة في الكوبي سنتر .
  • فيه نهائي . عبارة عن محطات تمرون عليها وتجاوبون عنكم في الورقة باجابات قصيرة ، عن اسماء اداوت ، معرفة فصيلة الدم ، الصفة الوراثية والصيغة لها ، شرائح في المجهر تتعرفون على العضو ، او نوع الخليلة او نوع النسيج . سهل بشكل عام .

4- مهارات تعلم وبحث ( محاضرة ، ساعتين أسبوعيًا )

  • هذي المادة تشبه مهارات الإتصال من حيث سهولتها . اشياء عامة ، كيف نتعلم ، كيف ننشئ خريطة ذهنية ، انواع الذكاء ، كيف نعد البحث العلمي وهذا شي مهم . بالعربي
  • الكتاب توفره الجامعة .
  • فيه بحث علمي كامل شامل عليه 20% . تختارون موضوع وتسوون بحث حقيقي بفصوله بمراجعه بمحاوره . متعب لكن في النهاية تشعرون بالإنجاز . الأستاذة تتابعكم فيه خطوة بخطوة .
  • فيه تكليفات بعد كل بضعة فصول . تكونون مطلوبين تجاوبون سؤال او مجموعة اسئلة . فيه 3 تكليفات علما اتذكر ، كل واحد 7 درجات .
  • المادة سهلة عمومًا ، بس البحث يحتاج له متابعة .

5- التربية البدنية والصحية ( ساعتين ، محاضرة اسبوعيًا )

  • تنقسم المادة لقسمين . نظري (صحي ) . وعملي (بدني ) . بالعربي
  • الصحي ، نص السمستر تدرسون فيه اشياء عامه عن الغذاء ، التغذية ، الاطفال ، المرأة الحامل ، سرطان الثدي ، الصحة النفسية ، الاسعافات الأولية . سهل عمومًا لكن معلوماته كثيرة جدًا .وفي نهاية الصحي تكونون مطالبين بإنشاء حملة صحية توعوية عن اي مرض أو مشكلة صحية في الجامعة . تقيمون على صحة معلوماتكم ، اسلوبكم ، تنظيمكم وحتى لغة جسدكم حيث يحضرون أساتذة مهارات الإتصال . لكن احنا لأن عددنا كبير وتأخرنا في التقديم وكنا نحتاج نخلص بسرعه المجموعات الاخيرة سوته في الكلاس .
  • البدني ، تدرسه لكم استاذة ثانية ، اول محاضرتين نظرية عن العضلات والغذاء وما إلى ذلك . بعدها تبدؤون أمتع جزء في التحضيري كله . الريااضة !!
  • فيه صالة رياضة في الجامعة . كلاس عادي تقريبًا بس مزود بجدار مرايا . فيه السجادات اللي تسوون عليها رياضة ونسيت اسمهم صراحة . وتبدأون تسوون رياضة ماعمركم سويتوها في حياتكم . ممتع ومضحك ومخجل اننا بسرعه نتعب ههههه . كنا نطلع من الجامعة واحنا مهدودين !
  • تلبسون فيه ملابس رياضة . بس ماتتمشون فيها في الجامعة .
  • في النهاية في فاينل بدنية عملي . وكان عبارة عن عدد معين من البوش أب خلال 30 ثانية + عدد معين من الست  أب خلال 30 ثانية + إختبار الوثب من الثبات ( تقفزين بدون ركض لمسافة معينه ) + تمارين رياضية تسوينها مع قروب بنات يراعى فيها صحة الـتمارين وَ تناغم المجموعة وهي تسويها .
  • ونهاية السنة فيه نهائي نظري للقسمين ، موضوعي ، اختياري وصح وخطأ كان سهل بشكل عام . لكن مذاكرته متعبة لأن المادة طويلة .

6- العقيدة والأخلاق ( محاضرة ، ساعتين أسبوعيًا )

  • مادة سهله جدًا جدًا هذا السمستر ، كل محاضرة عبارة عن ركن من اركان الإيمان ، وفي النهاية محاضرة عن اخلاق المسلم . بالعربي
  • حفظ حزب من جزء 28 ، نفس نظام المناقشة والمشاركة والإختبارات .

7- إنجليزي ( 5 محاضرات ، 20 ساعة أسبوعيًا )

  • هذا السمستر بعكس السمستر الأول ، كلاسات الإنجليزي صارت تاخذينها مع شعبتك . لأن تسجيل الشعب تغير ، بحيث مثلاً البنات ذوات المستوى المتقدم في الإنجليزي ، يسجلون في شعبة 10 – 11 – 12 . المتوسط في 5 – 6- 7- 8 –9 وهكذا ! فيكون اللي معاك في كلاس الإنجليزي معاك في بقية المواد .
  • هذا السمستر ، تدرسون في نصفه الأول أنجليزي عام ،بنفس الاسلوب للسمستر الأول . لكن اللي في المستوى المبتدئ يصيرون متوسط ويدرسون كتبهم . المتوسط يدرسون للمتقدم . المتقدم ياخذون كتب جديدة .
  • النصف الثاني من السمستر . تاخذون الانجليزي العام في كلاس واحد . اما الكلاس الثاني فهو إنجليزي التخصص .
  • في نهاية السنة بتكونون مطالبين بـ إختبار إنجليزي عام + اختبار توفل تبع الجامعة + إختبار إنجليزي التخصص . اللي يكونون ماخذين آيلتس او توفل ومقدمينه قبل نهاية الوقت اللي يستقبلون فيه –ويحددونه لكم- . مايحضرون في كلاسات الانجليزي العام في النصف الثاني من السمستر . فيكون عندك بريك تقدرين تستغلينه خصوصًا أنه الـسمستر الثاني ادسم من الأول . بالاضافة أنك بس تختبرين اختبار التخصص والباقي تضمنين فيه الفل مارك !
  • انا السمستر الثاني اخذت ايلتس (ولو تقدرون أخذوه بأقرب وقت وخلوا الشهادة عندكم ، ولو طلبوه ودوه لأن بنات كثير قرروا متأخر انهم يبون يختبرون ولكن ماكان فيه مواعيد شاغرة لعقد الإختبار ) قدمته وماكنت احضر الكلاسات للنصف الثاني من الـسمستر للإنجليزي العام .
  • طبعًا طوال السنة ، الحضور عليه درجات ، في واجبات و تكاليف ، كتابية وشفوية عليها درجات .

image

  • كلية الطب تشترط أولا : حصولك على تقدير B في المواد  العلمية والإنجليزي ، ثم تكون المفاضلة بالمعدل العام .
  • كلية طب الأسنان تشترط أولًا : حصولك على تقدير C+ في المواد العليمة والإنجليزي ، ثم تكون المفاضلة بالمعدل العام .
  • كلية الصيدلة الإكلنيكية تشترط أولًا : حصولك على C+ أو B –نسيت صراحة- في الكيمياء والأحياء ، ثم تكون المفاضلة بالمعدل العام .
  • كلية العلوم الطبية وكلية التمريض : لا شروط لهم ، المفاضلة بالمعدل العام فقط .

image

  • الدوام من 8 الصباح
  1. السمستر الأول ( يوم إلى 12 ، يومين إلى 3 ، يومين إلى 5 )
  2. السمستر الثاني ( يومين الى 3 ، ثلاث ايام إلى 5 )
  • البريك ثابت للصلاة والغداء والراحة وكل شي ، ساعة كل يوم من 12 إلى 1 .
  • الدوام يكون في مبنى 350 ، بتضيعيون أول شي بس بيعطونكم خريطة في اليوم التعريفي ههههه . عدا الإسلاميك في مبنى الاسلاميك . واللابات في مبنى 65 الطب.
  • يتوفر خزانات ( لوكرز ) تستأجرونهم لمدة سنة بـ100 ريال . بتحويل بنكي للجامعة بيقولون لكم التفاصيل بعدين .
  • فيه كوبي سنتر (قرطاسية وتبيع المحاضرات )
  • فيه مكتبة لإستعارة الكتب خاصة بالجامعة . ومكتبة في الجامعة تبيع كتب دراسة .
  • فيه مطعم الجامعة يقدم وجبات فطور وغداء بسعر رمزي . جربنا الغداء مرة وكان بعشرة ريال وكميته مرة ممتازة . الأكل جيد نوعًا ما .
  • فيه دانكن دونتس و جوفريز –جدد مافتحوهم إلا آخر السنة – وفي مبنانا بعد كانوا قاعدين يجهزون كوستا كوفي لكن مافتحوه لنا : (
  • فيه كافتيريا الجامعة .
  • افتتحوا مطعم leaves السمستر الثاني ،في مبنانا وقدام كلاسنا بالضبط هههه  واللي كان يوفر فطور لذيذ ، وغداء مناسب.
  • فيه الناعورة . مخبز وبقالة تبيع كل الأشياء الضارة واللذيذة القديمة من شبسات وشوكولاته وو .
  • الإدارة حبّابة ، تقدرين تدخلين عنهم وتشتكين وتشتكين وتشتكين وتتحلطمين وهم يبتسمون لك ويهدونك ، مو شرط يسوون شي بصراحة ، لكنهم خلوقين وتقدرين تفرغين طاقتك عندهم .
  • اللبس ، تنورة طويلة بأي لون لا يشترط + بلوزة أو قميص نصف كم –أقل شيء- . لا تتهورون وتقصرون التنورة واجد –تهوروا شوي بس هههه- انا من اول شهرين اخذت مخالفة زي ههههه – بس أول مرة يكون كتنبيه بس .
  • بالنسبة للجوالات المزودة بالكاميرا . نظامًا ممنوعة . لكن الجميع كان يحضرها الجامعة .
  • ابراز البطاقة الجامعية مطلوب عند الدخول للجامعة – لو طلب منك – وفي حال ما أبرزتيها يسجل أسمك .
  • الجامعة لها نشاطات جميلة كل ثلاثاء –عادة- . يوم رياضي ، يوم مفتوح ، يوم التوعية بسرطان الثدي .
  • الجامعة لنا نوادي جميلة ، نادي عون للعمل التطوعي ، نادي للرسم ،  نادي التصوير ، نادي قراءة جماعية – سجلت في نادي عون ، لكن لم نكن نملك وقتًا للمشاركة للأسف ، بقية النوادي لا اعرف ان كانت قامت بنشاطاتهم او لا-

image

هذي التدوينة صريحة جدًا ! ما بزكي هذي السنة لاني ضدها ! لكن مابظلمها .

إيجابيات للسنة التحضيرية وقرارات جيدة أتخذت .

  1. تطوير في الإنجليزي بشكل ممتاز فعلًا .
  2. تعويد الطالبة على النظام الجامعي . في البداية كنا نتوقع أن زي المدرسة تسمعين المحاضرة وتفهمينها وخلاص ! لكن لا ! إذا ماتعلمتي تجدين أول سنة مابتجدين لآخر سنة .
  3. تجمعك بصديقاتك اللي بيختارون تخصصات ثانية لسنة زيادة !
  4. يفتح المجال لطالبات ماعندهم فكرة عن الجامعة في إختيار تخصصهم بشكل أدق بعد هالسنة . يمكن بعد هالسنة تشعر البنت انها ماتقدر تستمر في تخصص صعب كالطب ، فتدخل علوم طبية . ممكن تكون تبي صيدلة لكن تكون مو شاطرة في الكمستري وتفكر مرة ثانية وتشوف نفسها في التمريض . –حتى وإن كنت مو من هذا النوع لأن رغبتي ماتغيرت لكن مانقدر ننكرها-
  5. افتتاح المقاهي والمطعم الجديد . تحسب لهم نقطة جيدة .
  6. كتاب البايولوجي ، اشتريناه من المكتبة الموجودة في المكتبة بـ300 ريال وتزيد . الجامعة تفاهمت مع الشركة وخفض لنا إلى سعر 35 ريال فقط !!! –بيد أننا سمعنا اشاعات ان الجامعة وقعت في مشاكل مع الشركة لأن الشركة أعطت تخفيضًا وشعرت أنها خسرت أو الجامعة خسرت ، المهم بقية الكتب لم تخفض بعدها ههههههه –
  7. وفرت لنا الإدارة في مبنانا مؤسسة تسمى بـ “رجل التوصيل” كان يقدم لنا مجموعة من المطاعم المختارة ، يطلب منها مانريد ، ويأخذ أجره للتوصيل 25 ريال . كان مفيدًا جدًا في أوقات الأزمات وخصوصًا دوام الساعة الخامسة .
  8. السنة التحضيرية سنة الضغط والصبر والأعمال الجماعية . فيها تعرفين من يساندك ومن يعيقك . من العمل معه في مجموعة مريح ومن هو صعب وكسول . يعرفك من يكون سلبيًا متكاسلًا ومن العكس . السنة التحضيرية تفتح العينين تمامًا لمن ستتخذين رفيقًا بقية السنوات.

السلبيات

  1. كوننا أول سنة يطبق النظام عليها ، فنحن عانينا الأمرين . القرارات متخبطة جدًا جدًا , قرار اليوم يمحوه قرار الغد . انظمة تتغير ، نسب على إختبارات تتغير ، مواعيد تتغير . كل شي بشكل مختصر ! لكني اتوقع بشكل كبير أن هذي أغلاط السنة الأولى فقط والوضع بيتحسن في السنة الجاية . لأن كانوا حتى الدكاترة مو متعودين على النظام . والمسؤولات قسم كبير منهم جديد فيعني !
  2. قسم الأولاد كان له السلطة العليا ! وغالبًا كل التغييرات تأتي من عنده ! دائمًا كنا مسيرين لهم . كانوا معترضين مثلًا على أن المعامل تكون كل أسبوعين . وطالبوا بوضع نظام ينص على وجودها أسبوعيًا وفعلًا حدث هذا لكن لم يطبق فيما بعد لأن الدكتورات ذاتهم لم يكن يحتجن أكثر من معمل كل أسبوعين . مثال آخر : في اختبار الرياضة . كان من المفترض أن يكون المطلوب في إختبار “البوش أب” . 18 مرة في 30 ثانية . وعندما طبقناها فوجئنا بدرجاتنا منخفضة وصلنا أن قسم الأولاد قرر رفع المعايير . عمومًا وعدتنا الدكتورة برفع الدرجات ولا أعلم إن فعلت أو لا .
  3. الدوام طويل جدًا . كنا نصل للبيت الساعة السادسة –مشوار الطريق- ونكون منهكين تمامًا . ماكنا اجتماعيين مع اهلنا كما سابقًا . كنت اضحك مع صديقاتي واقول ” أهلي صاروا اصدقائي ، وصديقاتي صاروا أهلي ” .
  4. سنة ضغط نفسي وجسدي وعقلي . الدوام الطويل ، المنافسة القوية على المقاعد ، القلق من عدم القبول  . كلها كانت متعبة ولكنها مفيدة على المدى الطويل . تخرج طاقاتكم وعزيمتكم الدفينة .
  5. السستم كان مرة تعبان خلال إختبار الاي سي دي ال . نخاف اننا نرسب في الإختبار من السستم اكثر من خوفنا من مذاكرتنا .
  6. رفضهم فتح الأوراق النهائية لإعادة التصحيح . لي صديقة لم تقبل في التخصص التي تريد فقط بسبب مادة واحدة كانت الدرجة فيها منخفضة بطريقة غريبة مقارنة بالبقية خصوصًا وانها متأكدة من مستواها ! لكن رفضوا فتح الورق !!! وهنا أكبر × !

image

نقاط عفوية ، لكِ أنت !

  • إياكِ إياكِ إياكِ باليأس والعيش في فكرة ” مابنقبل اللي أبي أصلًا ” ، السنة سنة ضغط نعم ، لكنها غير مستحيلة ! شيء طبيعي ستشعرين بالإكتئاب ليوم يومين ، تكلمي مع أحد ما قريب ، اتخذي صديقة متفائلة فصدقيني من حولك هم بالضبط من سيزرعون في عقلك القوة وفي قلبك الأمل او سيزرعون شوكًا محطمًا . حتى ولو جائت درجة هذه الإختبار اقل من المتوقع تستطيعين دائمًا أن تعوضي !
  • لا تتهاوني في المذاكرة ! صدقيني ستفاجئين ، نظام الجامعة مختلف . انا كنت في المدرسة من الطالبات اللاتي تعتمد80% على مايقال في الدرس واستطيع استرجاعه . أما في الجامعة الوضع مختلف ، اللغة مختلفة ، مستوى الطالبات معك مختلف ، هدفك مختلف ، لا تستهيني بهدفك !
  • ضعي جدول مذاكرة أنتِ وصديقاتك . لي بضع صديقاتي وضعنا لنا جدولًا لنذاكر قبل الإختبارات وخصوصًا في الفصل الدراسي الثاني كون أننا نختبر في مادة لفصلين دراسيين . كنا نلتزم به وندرس بجد ، وكنا من الفئات القليلة التي لا تذهب للإختبار دون نوم أو وهي تشعر بالضياع كونها تأخرت في الدراسة .
  • أهتمي بغذائك ، تأنقي وألبسي ملابس جميلة ، أضحكي مع صديقاتك . عيشي هذه السنة بمتعة ! لأنها لن تتكرر . صدقيني سنة متعبة لكنها ممتعة جدًا . في الإجازة كنت وصديقاتي نسترجع الصور فيها ونضحك وقلبنا يتفتفت على جمال تلك الأيام .
  • ثقي بالله ثقة تامة صادقة . ان الخير هو ماكتبه . لا تقنطي ولا تيأسي من روح الله . أستودعي الله امانيك وحلمك وهدفك ! قومي بالأسباب ولا تنسي أن توفيق الله هو أول سبب .
  • تكلمي مع أمكِ ، اشكي لها ، اطلبي دعائها ، ارضيها بقدر ما تستطيعين . أجزم أنه بعد توفيق الله تعالى . قبولي في التخصص الذي ارغب جاء من دعاء امي أولاً ثم جدي واجتهادي .
  • الجامعة مو زي المدرسة . اذا غبتي في من يحاتيك وياخذ الواجبات عنك ! أبدًا لا تعتمدين على أحد يكتب عنك ، أو ياخذ عنك أو أو . اعتمدي على نفسك ولا تدخلين نفسك في دوامات .
  • الجامعة ماتدرسين بس من الدفتر . الدكاترة أساليبهم مختلفة وتلخيصهم مختلف . حاولي تعرفين بالضبط ايش تحتاجين تدرسينه في نفس الوقت لا تدوخين نفسك وتدرسين كل محاضرة أي دكتورة تنزلها ! شوفي بالضبط ايش تحتاجين .
  • عرفي كل دكتورة ايش اسلوبها . في دكتورة عصبية ماتدخل بعد عشر دقايق ، دكتورة ماترضى تطلعين من المحاضرة ولو بإذن ، دكتورة تحب تكونون مطلعين على الدرس السابق ، دكتورة تسأل في الدرس السابق ، دكتورة ماتدري عن الدرس السابق .
  • خلك واثقة بنفسك ، إيجابية ، وساعدي الناس كثر ماتقدرين . لا تصيرين طماعة على أحد بمعلومة ولا تبخلين عليهم 10 دقايق تشرحين لهم فيها مسألة . ساعدي الناس ، الله يساعدك .
  • قروب الفيس بوك لو كان موجود مفيد جدًا . لكن مثلاً – في حالة دفعتنا – كان القروب يوترني . لما أدخل الناس تكون سلبية ، اشاعات ، توتر ، تضخيم الأمور . كنت اتوتر ولما ادخل قبل إختبار احس اني مو مذاكرة . القروب مفيد ، فيدي ، استفيدي ، لكن لو كان فيه مثل اللي فوق ، لا تدخلين عليه يوميًا ، ولا حتى تهتمين لأي خبر مو أكيد فيه . كوني مطلعة لكن  لا تكتأبين منهم .
  • خلي علاقتك بالجميع محترمة . وكوني واثقة انك بتشوفين شخصيات غريبة وناس من خلفيات مختلفة . بتصير مشاكل صغيرة , وكبيرة , لا تتفاجئين .
  • في النهاية . استمتعي ولا تسمعين كلام المحبيط –يمكن قلتها الف مرة لأنها صج حقيقية-

تمت بحمد لله أطول تدوينة على مر التاريخ !

ماذكرت تجربتي بشكل حقيقي واضح ، لكن رأيي موجود وحاولت أحط كل شي مهم او الناس اللي طلبت مني التدوينة تعتقده مهم فطالت التدوينة شوية ؛) .

اتمنى تكون تدوينة مفيدة ومابقول خفيفة لأن أكيد تدوينة بهالطول مستحيل تكون خفيفة . بس ماقدرت اختصر للأسباب اللي قلتها فوق .

اتمنى لكم سنة موفقة سعيدة ، ويارب تدخلون اللي تبون .

أي سؤال بيان موجودة دائمًا ؛)

تحية طيبة .

118 thoughts on “تجربة السنة التحضيرية في جامعة الدمام #تحذير :تدوينة طويلة جدًا وحتى انقطاع النفس .

  1. آدور تجربتش من زمان بس نسيت آسمش في المدونة ههههههه <3 انسانة رائعة جدا جدا واتمنى اجي الجامعة والتقيش والحمد لله اني من خريجات العام الماضي وانقبلت السنة – مسار صحي واكيد مابنسى نصائحش وبخليها بعين الاعتبار اسآل الله لك التوفيق في الدارين في الدنيا والاخرة <3

    • هههههههه أهلا وسهلا ♡
      اسعدتني فعلا بهذا الرد اللطيف ، وسعيدة انه كان مفيد ؛)
      خلاص اذا بدأت الدراسة وداومت جهة مبانينا القديمة ﻻزم احط اعلان :p
      موفقة مسددة يارب ♥

  2. يعطيك العافيه جهد تشكرين عليه بس حبذا لو كان الكلام بشكل عام مثال بسيط يوضح فكرتي انه اغلب الطلاب اللي درسوا هالسنة بيجتمعون ان الفيزياء صعب او بالاصح اصعبهم سواء كان صعب اوسهل عند البعض لكن من كلامك واضح انها تجربتك فقط اتمنى تتقبلين تعليقي

    • اهلا وسهلا ، العفو
      بالنسبة لنقطة لو تكلمت بشكل عام ، على كذا يمكن كنت كتبت زي ماكل الناس طول الوقت تقول : ماانصح احد يدخل . وزي ما قلت انت وذكرت انا فوق التجربة شخصية وبصراحة مادة الفيزيا كانت سهلة عندي و تقريبا سهلة عند جميع الطﻻب خلال المذاكرة . المشكلة واللي حتى انا واجهتها كانت في مستوى الاسئلة – وﻻحظ اني ماكتبت شي عن مستوى الاسئلة ﻷنه يتفاوت من اختبار لثاني وجزئية الاختبار-
      نقطة اخيرة ، ايش الهدف اني ازرع فكرة ان المادة صعبة عند اشخاص لسه ماجربوها ؟ احسه بس تحطيم .

      رأيك على عيني وراسي وصدقني كنت متوقعة احد يخطر بباله هالفكرة وكان ودي اوضحهها ، فشكرا
      حياك الله .

  3. يا عمممممري تجنني انتين ♥
    مرررره مررررررره شكرا على التفصيل الممل الجميل ♥♥
    عن ججد كنت ادور شي نفس اللي كتبتيه ♥
    يارب يوفقش وييسر أمورش وتصيري أحلا دكتوره ♥
    اني انقبلت مسار صحي هالسنه وأكيد ما بنسى نصايحش وباخليها قدامي على طول ♥♥
    دعواتش ♥

  4. أهلا بيان كيف حالك ، أَنـآ مره معجبه بكلأمك وأسلوبك وشخصيتك ، وبعثتي لي الأمل يعطيك العافيه ، أَنـآ انقبلت بالدمام مسار هندسي وهذا حلمي أني اتخصص هندسه ، عندي سؤال ، هل الحصول علئ معدل عالي صعب ؟ لأن صراحه بالمدرسه نقدر نجيب ال100 گلْ شي سهل وبسيط بس شلون بالنسبه للسنه التحضيريه ؟

    • اهلًا وسهلًا منى ، ألف مبروكة وعسى ربي يوفقك ويحقق لك أمانيك .
      شكرًا جزيلًا على كلامك اللطيف أسعدتني والله ♡

      بالنسبة للمعدل لا مو صعب أبدًا , شوفي المعدل العام في الجامعة من 5 اوكي ؟
      عندك مواد عليها نقاط واجد وهي غالبا نقاط المواد الدسمة للتخصص . وعندك مواد سهلة مرة وعليها نقاط اقل . لكن في التحضيري مثلاً الإنجليزي عليه أعلى نقاط . والإنجليزي سهل جدًا تجيبين فيه A+ ليش ؟ لأنه كل ماتعبتي على روحك وطورتي أنجليزيتك وبدأي من الحين وتاخذين الأيه بلس . فالمواد السهلة ترفع المعدل .
      وفيه نقطة في الجامعة مو بالدرجات الحساب .
      يعني مثلًا في الإنجليزي جبتي 96 ، ماتنحط 96 لأ تنحط A+
      الايه بلس = 100 إلى 95 . اذا جبتي بين هالقيمتين تاخذين كامل تعتبرين
      الأيه = 95 إلى 90 . وهكذا كل معدل 5 درجات

      وهذا يسهل الموضوع ويرفع الدرجات .
      وصدقيني كثر ماوثقتي بنفسك وحددتي لنفسك معدل ماتنزلين عنه وكررتيه في مخط طول الوقت . كل ما حققتيه .
      ثقي بالله ، وضغطي على نفسك شوي ومافي شي صعب 3>
      موفقة مسددة ♡

  5. تدوينة جمييلة كجمآل أسلوبك ♥ – ♥
    أنا خلصت المسار أصلاً بس حبيت تجربتك ونشرتهآ لبنآت بيكونوا في المسآر الصحي :)
    موفقة حبيبتي :*

  6. أبدعتي أخت بيانة طرحاً و أسلوباً .
    لكِ من القلبِ جزيل الشكرِ
    أشبعتِ فضولي من جميع نواحي السنة التحضيرية بالمسار الصحي =P
    وفقكِ الكريم لما يحب و يرضى
    مع تمنياتي لكِ عزيزتي بمستقبلٍ مشرق و الوصول لمبتغاكِ .
    أنا و لله الحمد قُبلت بالمسار الصحي و أتمنى أن أتشرف بمقابتكِ في يوماً ما .
    نسألكم الدعاء ♥

  7. مرره جميلة تجربتش جبتي ليي السعادة <3
    انشاء الله بنشرها لصاحباتي عشان يستفيدوا ;)
    اني من المقبولات في المسار الصحي سجلت في الدمام لأن الكل بيسجل مو لأنها رغبتي ف قلت ما برسل أوراقي لأن نظامها مسار و بعدين نحدد التخصص و هالشي يصعب تحقيق حلمي , بعد ما قريت كلامش حسيت السنة جميلة و خلاني أفكر في الأمر مره ثانية , تمنيت لو في مدونات عن جامعات ثانية زي مدونتش <3
    يعطيش العافية و الله يوفقش عزيزتي <3 !

    • وردك جلب لي السعادة ♡
      شكرا كثيرا وعملاقة ، هي سنة جميلة عموما بس ﻻزم يكون عندك رغبة
      مابقول لك غلطتي لما سجلتي بدون رغبتك . ﻷن تعليم جامعة الدمام ممتاز وغالبا بس فيصل الباقية بدون تحضيري -على مستوى الجامعات الحكومية الممتازة- بس لو صار ودخلتيها اول شي ﻻزم تشيلينه من بالك انها مو رغبتك ومو خيارك وو عشان ماتكون حاجز قدامك .
      الله يكتب لك اللي فيه الخير يارب ويوفقك وين ماكنت ♡

  8. هلاا خيتو كيفك ان شا الله طيبه بصرااحه بالرغم من انو مدونتك طويله بس ماحسيت بالملل ابدا وانا اقراها وتمنيت لو كااانت اطووول من هيك ابداع ف الكتابه والطرح ووضحتي نقااط
    جداا مهمه اتمنى من كل قلبي اتعرف عليك لاني ادور علا انسانه طموحه وايجايبه بس سؤال اذا مافيه احراج على ايش تخصصتي ؟!

  9. مشكورة كثير على اللي قدمتيه بس عندي سؤال حول قروبكم بالفيس الخاص بالسنة التخضيرية اذا ممكن تحطين الرابط هنا لأني سويت قروب و لكن كلنا بحاجة لشخص يرشدنا و يكون عنده خبرة زيك
    مشكورة من اعمال قلبي .. عطيتيني صورة واضحة حول كل شي و كل مادة و غير كذا عرفت الميزانية اللي محتاجتها
    موفقة يا رب في كل خطوة و أفدتي الكثيرين

    • عفوا كثيرا ♡
      امممم صعبة شوي اني اعطيك اياه كون القروب سري وماتقدرين تدخلين له . زائد مابيفيدك كثير هالفترة ﻷنه مليان اشياء تو الناس تقرأين عنها وتتأزمين منها .
      ممكن بعد ماتبدأون دوام باسبوع وحسيتي صج تحتاجون احد يفيدكم ، اطلب من احد انه ينضم لقروبكم اسهل كذا . او نشوف حل .
      عموما فيه طرق كثير للتواصل مع الدفعة الاكبر غير مسأله القروب ﻷنها احسها عفسة شوي . واساسا دفعتي اكيد بتتواصل معاكم ﻷنها مجمعه لكم كل نماذج الاسئلة ووو .
      اي شي ثاني موجودة للمساعدة ♡

  10. أهلا بيان , شكرا على اجابتك , وان شاء لله كلنا نقدر نجيب المعدل العالي والله يوفقك ي رب !
    عندي سؤال ادري تعبتك معاي ! كثير سمعت وكثير يقولون من واقع تجربتهم بعد
    ان بجامعة الدمام في ظلم للدرجات ويصححون دون مايشوفون الاوراق والدرجات يحطونها من كيفهم
    او على حسب اذا عاجبتهم البنت ولا لا ! انتي تحسين هذا الكلام صحيح ؟ مو شرط حرفيا ! حتى لو بطريقة ما ؟ او جزء منه ؟

    • عفوا ولو ، ♡
      اهلا وسهلا مرة ثانية ﻻ تعب وﻻ شي ♡
      حسب السنة التحضيرية ، واتكلم عن التحضيري فقط ﻷن ماعندي علم بالباقي
      هالشي اقدر اقولك اياه بالفم المليان “خرافة’
      طلعت من تحضيري ومااتوقع فيه دكتورة حافظة اسمي اصلا عشان اصير عاجبتها وﻻ ﻻ !
      رقم 2 التصحيح الكتروني فاهم مايشوفون الاوراق .
      الظلم والخطأ موجود في اللي ذكرته فوق ، انه اخر اختبار في الفيانلز للفيزيا والاحياء صارت درجات مجموعه من الطلاب منخفضة باقل من المتوقع ، انعاد تصحيح قسم كبييير ، وقسم مانعاد ومنهم صديقتي .
      الغلط الوحيد رفضهم فتح الاوراق ! اما مسأله يحطونها من كيفهم فلاتصدقينها .
      ونصيحة ﻻ تحطين ببالك هالموضوع وتشيلين همه ، الخير الله كاتبه وكل اللي تعبوا حصلوا تعبهم في مكان او اخر . ﻻ تحاتين ♡

  11. يعطيج العافية خيتي ماقصرتي .. جزاج الله خير على التوضيح وبالعكس مب طويلة ولا شي الا تونس وتوسع الصدر *-*
    بس عفيه عندي سؤالين .. – تعرفين (اي احد) دخلت وياج سنة تحضيري وعندها تحضيرية من قبل وعادلولها المواد او شي ؟
    – انا اختبرت آيلتس والحمدلله نتيجتي اعلى من المطلوب تنصحيني اقدمها لهم من اول السمستر ؟

    شاكرة لج دكتوره .. 3> :$

    • الله يعافيك ، اسعدتيني ♡
      السؤال الاول : ﻻ والله ماعرف ، اعرف بس بنات كانوا في العالمية طب، جابوهم الجامعة ورجعوهم سنة فدخلوا تحضيري اللي كانوا سنة ثانية .
      السؤال الثلني ، انا برايي الشخصي لو كنت ممتازة جدا في الانجليزي وتجيدينها تماما كمتحدثة باللغة الام . ايه . اذا كانت انجليزيتك لسه في مجال تتطور اقول لك ﻻ تفوتين الكلاسات خصوصا اول سمستر جدا مفيدة .
      ممكن تقديمنها وتتمين تحضرين كلاسات عشان تتطمنين على درجاتك ، بس اتوقع لو قدمتيها بتتكاسلين تحضرين . وممكن تقدمينها نهاية السمستر الاول بعد ماتحضرين الكلاسات وتستفيدين .
      هذا كله يعتمد تبين تطورين لغتك او انت مكتفية .
      حياك الله ♡

    • حقيقي عيشتيني جوا الجامعه انا كنت خايفه من السنه التحضيريه لكن الحين حماسي و ثقتي تخطت الخوف والمشاعر السلبيه

  12. ماشاا الله عليش ، اول مره اقرا لش + استمتعت وانا اقراا ~ احس ان السنة الجاية بتكون شي مو طبيعي بتكون كمية سعاااااااادة مجمعة على بعضها
    الله يعطيش الف عافية ومااقصرتي ع المعلومات اللي بجد كنت ادور احد يقولها لي ويخليني اخفف التفكير شويي ~
    الله يوفقش ..

    • اهﻻ وسهﻻ ♡
      شكرا للرد اللطيف ، اسعدتيني والله ♡
      بتطون سعادة بس فيها ضغط وتعب فتجهزي للجانبين وﻻ ترفعين سقف توقعاتك واجد ؛)
      سعيدة اني قدرت اساعد .
      موفقة مسددة يارب ، شكرا مجددا ♥

  13. أختي بالنسبة للجدول شنو الجدول إلي تنصحينا فيه بشكل عام؟ وأختي كم عدد مقاعد طب الأسنان والطب البشري وكم عدد الطلاب المقبولين بالمسار الصحي ؟ هذي السنة؟

    • اهلا وسهلا
      الجدول مااقدر انصحك بشي ، عدد الساعات ثابته والمواد ثابته . وحتى ترتيب المواد نفسه . بس يختلف من يوم ليوم . فهالشي يعتمد عليك . تبين بداية الاسبوع خفيف وﻻ نهايته ، تبين تطلعين متأخر اول الاسبوع او النص . يعتمد عليك .
      عدد المقاعد بالنسبة للبنات ، -تقريبا ﻷن الجامعة ماصرحت بالضبط بعدد المقاعد-
      البشري : 90 الى 120 مقعد طالبات
      اسنان : 30 الى 60 مقعد طالبات

      عدد طالبات المسار الصحي في دفعتنا – بداية السنة قبل ماتصير انسحابات-
      460 طالبة .

  14. السلام عليكم
    إختي عادي تقولين عن أسماء المعلمات الي تنصحين إنا نسجل عندهم بالشعب وعادي تقولين لنا عن طريقت الجدول حق شعبتك وجزاك الله خير

    • وعليكم السلام ورحمة الله وبركاته
      بالنسبة لهالموضوع مااقدر افيدك كوني ببساطة مااجربت كل الدكاترة , وغير انه فيه دكتورات يعجبوني وبنات يكرهونهم , اللي يناسبني يمكن مايناسبك والعكس . واساسا حسب نظامنا كنا ماانقدر نختار الدكاترة نختار الجدول في السمستر الأول وضربة حظ الدكاترة , السمستر الثاني حتى جدول مااخترناه كنا نختار شعبة والدكاترة والجدول بالحظ .
      بالنسبة لجدولي ، ما كان عاجبني جدًا , لكنه جيد نوعًا ما . وبصراحة يختلفون السمسترين فجدًا مااتذكر آسفة .
      حياك الله .

  15. ماشاء الله , استفدت حقًا من تجربتك !
    برغم أني لا ازال بالثانويه لكن وددت الاطلاع على تجربتك
    مميزه حقًا اسلوبك سهل وواضح جدًا 3>

    الله يوفقك

  16. السلام عليكم اختي بيان صراحة ابدعتي جدددا جميع تساؤلاتي لقيت اجوبتها عندك عمل تشكرين عليه :) بسألك يا بيان بالنسبة للأحياء في السنه التحضيرية قصدك نعتمد على الكتاب بشكل اكبر؟ وبالنسبه للجروب من اي ناحية حسيتيها مفيدة وممكن نلاقي تجميع لأسئلة الاختبارات الي كانت تجيكم ؟ شاكرة لك جهودك :)

    • رديت على تعليقك رد طوييل ووافي وينه *لحظة صدمة* يلا نعيد مافي مشكلة :)
      وعليكم السلام ورحمة الله وبركاته . شكرًا كثيرًا كثيرًا 3> سعيدة بذلك .
      اي بالضبط . الأحياء -بالنسبة للمواد العلمية- أكثر مادة تعتمد على الكتاب . أنا أقول لك ليش . لأن الأحياء عبارة عن كلام وحفظ تقريبًأ ، بس بالنسبة للفيزيا والكيميا فهو فهم وتطبيق امثلة . فكتاب الاحياء مليان معلومات ، كتب الفزكس والكيميا مليانه امثله وتطبيقات واسئلة .
      الأحياء زي ماذكرت كل دكتور يلخص اللي يحسه مفيد وتنقلونه ، فاللي يحسه مفيد هذا الدكتور يمكن يحسه مو مفيد هذاك الدكتور ، فالتلخيصات تختلف . والمرجع الأساسي اللي بتجي منه الأسئلة هو الكتاب ! فدائمًا بتحصلين معلومات ما انكتبت في الملخص وممكن تكون موضع اسئلة . فالأفضل دائمًا الرجوع للكتاب كالمرجع رقم 1 .

      القروب : مفيد من نواحي عديدة ، عندك سؤال ليلة الإختبار ، سؤال عن نظام معين ، سؤال عن اي شي بتشوفين ناس تساعدك – بغض النظر البعض معلوماته موثقة والبعض اشاعات- . لما احد يسمع عن خبر مفيد ولا يسأل مسؤول عن شي ويجي يكتبه ، لما أحد يبغى تلخيص لمادة معينه ولا شرح لنقطة معينه ، لما يكون فيه تعاون واتفاقات ووو . كلها تكونين على علم فيها .
      ماكنت عضوة فعالة جدًا بصراحة أكثر من كوني مطلعة بس عشان اعرف ماذا يدور حولي ، لكن الشي الأكيد أنه كان في مسؤولين من طالبات وطلاب عن تجميع الأسئلة للإختبارات اللي اختبرناها وحفظها عشان تستفيدون بعدنا وهذا كان هدفهم . فأتوقع بشكل شبه جازم أنهم بيوصلونهم لكم بطريقة أو بأخرى :) .
      اهلًا وسهلًا حياك الله حبابة ♥

  17. السلام عليكم ورحمه الله وبركاته

    بيان ماتتصورين كيف تدوينتك اسعدتني، الله يفرحك يارب،

    سؤالي بس، انتي من سكان أي مدينة؟

    • وعليكم السلام ورحمة الله وبركاته
      وماتتصورين شكثر أسعد انا بهذي التعليقات ، الله يسعدك أضعاف مضاعفة ♥ ♥
      انا -احب أقول- اني من الدمام الجهة القريبة من القطيف وسيهات وو . لكني بشكل مؤقت أسكن سيهات .

  18. سؤال ثاني بيان، أنا انقبلت في المسار الصحي لكن من سكان مدينة الجبيل،،
    كثير نبهوني اني ماراح اتحمل الطريق لكن جامعة الدمام هي الأمل الوحيد في اني احقق حلمي بدراسة الطب،،

    عندك أي نصائح لي عزيزتي؟ ترا اعتبرتك اختي الكبيرة من الحين

    • شوفي حبابة ، بالنسبة للمواصلات اسألي مجرب ! أنا اطلع من بيتنا 6وربع ، عشان دوامي الساعة 8 . وطريق العودة ياخذ بالراحة ساعة إلي ساعه ونص ووصلت مرة لساعتين .
      وانا كثيير كنت أول مادخلت الجامعة ” ها كيف الطريق المتعب السيء الطويل ال ال ال معاك ؟ ”
      وبصراحة مااخفي عليك انا ماحسيته بهالتحطيم . صح الطريق طويل وممل ومتعب ولكن – ويالها من لكن كبيرة –
      قدرت أستفيد جدًا من الطريق .
      الفترة الصباحية كنت في بدايتها اقرأ قرآن او أسمع ادعيه الصباح او اقرأ . لكني للأسف توقفت عن هذا وصرت أقضيه بالنوم -خصوصًا في الليالي اللي أكون سهرانه فيها ومو نايمة كويس – وصدقيني نومة الباص تصحصح الواحد صح ! أو اقضيها في مراجعة للإختبار وهي مدة ممتازه انك تراجعين فيها في الهدوء قبل ماتدخلين للـزوبعة التوتر من الإختبار في الجامعة .

      طريق العودة يختلف حسب المزاج ، انام لو نعسانه أو راجعة متأخر وتعبانه ووراي شغله لازم اخلصها . أو اقرأ -وجدًا مفيد الطريق في القراءة ، اخلص كتاب في يومين ثلاث ايام – ، أو اسالف مع البنات ونضحك ونغير جو ، او استخدم الإنترنت واشوف الدنيا . وهالشي مفيد ليش ، لأن هالساعة اللي كنت بقضيها وانا احوس في النت في البيت لما ارجع اكون قضيتها وخلصتها واقدر استثمر الوقت في شي ثاني .

      مااقول لك في ناس كان الطريق من اسوء كوابيسها ، لكن انا ماكنت أخذها من هالجانب فكنت مااتضايق من الطريق كطريق ، أتضايق ممكن من السايق لما يتأخر ، الباص الفوضى ، الاشياء الثانوية .
      كله يعتمد عليك أنت ! كون حلمك طب . طريق بو ساعه او ساعتين حتى مايشكل لك عائق .

      ولكن اذا كان ولابد شوفي سكن الجامعة اذا تبين وتحسين ماتقدرين -اذا مشمولة الجبيل كمدينة بعيدة ماادري- ، لكن نصيحتي جربي ، ولا تخلين هالموضوع يخرب عليك حلمك ولا نفسيتك ولا حماسك للجامعة .

      اهلاً وسهلًا ، وان شاء الله تكون نصائحي مفيدة ♥ ♥

  19. حبيبتي بيان
    مشكورة على هالتدوينة الرائعة افادتني كثيير
    لكن عندي بعض الاسئلة :
    بمقرر الأحياء الترم الثاني قلتِ بأن أختبار النهائي يكون عن الترمين يعني معقولة بختبر عن الترم الأول بعدين أرجع اتخبر فيه من جديد مع الترم الثاني جداً ضضعط !!

    و كم المعدل المطلوب بالنسبة لتخصص الطب ؟

    شاكرة لكِ ♥

    • اهلًا وسهلًا ، نورتي الحتة ؛)
      شكرًا لك للرد السعيد هذا ♥

      هالموضوع مضحك ويمكن ماتصدقيني ، طوال السنة كان كابوسنا هالموضوع هذا . وتعبنا واحنا نقول لهم حددوا لنا أحذفوا ووو . لكن مافيش فايدة .
      السمستر الأول كانت درجاتنا مو ممتازة كوننا مو متعودين على النظام وكنا نحس المنهج طويل ومتعب ويبي له .
      لما قربت الإختبارات النهائية انا وصديقاتي خصصنا اسبوعين عشان نذاكر المواد وخصوصًا الأحياء كونه مادة دسمة وأثقل مادة علمية . تصدقين كانت محاضرة السمستر الأول شربة مااي ! شي تافه وبديهي وسهل واحنا نذاكره مرة ثانية . تصدقين في فصل من الفصول السمستر الأول احتجنا فيه 3 الى 4 ايام عشان نخلصه من ثقله ، والله لما ذاكرته السمستر الثانية 3ساعات كانت أقصى مدة احتجتها !
      لما تروحين السمستر الثاني تحسين شكثر السمستر الأول كان تافه وسهل ، كنا نضحك على انفسنا لما نكون مترجمين كلمات في النوتز مالنا . ونحسها كلمة سخيفة بديهيه , ونحس انفسنا كنا اغبياء هههه !

      لا تحاتين هالموضوع ، وصدقيني بيمر بسلاسة حتى في النهائي بتتمنين تكون جزئية السمستر الأول هي الأكبر في الاختبار ؛)
      ،
      المعدل المطلوب للطب مافي شي محدد . اهم شي تحققين الشروط وهي تجيبين B في المواد العلمية ولا ترسبين في كل مادة ، بعدين تدخلين منافسة الطب .
      لو فرضنا الطب يبون 120 مقعد ، وفيه 300 شخص محقق الشروط تبدأ مفاضلة المعدل العام ، ويبدؤون ياخذون الأفضل . ممكن بنت جايبة 4.85 ماتنقبل ، لأن فيه 120 وحدة قبلها فوق 4.85 . وممكن الأولاد يبون 120 مقعد ، وفيه 400 واحد محقق الشروط لكن ولد جايب 4.85 يدخل ، ليش ؟ لأنه من أحسن 120 طالب في دفعته .
      ان شاء الله فهمتيني ؟

      وبالنسبة للمعدل اللي وقف عليه الطب في دفعتنا للأسف مااعرفه ، لأن الجامعة مااصرحت بالمعلومة ولا اعلنت عنها .

      العفو ولو ♥ ♥

  20. مشكورة على النصائح المفيدة
    بس بغيت أستفسر إذا جبت مثلا 5 بالأيلتس يعطوني 70 بالمية من الإنجليزي ولا لازم 5.5 ؟ لأني استفسرت من طلاب قالوا يصير فحبيت أستفسر منك ؟

    • اهلا وسهلا .
      اللي اعرفه لازم تحققين الدرجة اللي طلبوها منك ، اللي اتذكره -لوماخانتني ذاكرتي – اننا كنا مطالبين بال5.5 ، مااعرف إذا تم التغاضي عن البعض اللي جابوا درجات قريبه ؟ حقيقة ماادري بس جربي اسئلي الإدارة .

  21. يعطيكك ألف عافيه بيان كان جداً كلامك شامل لكل الأسئلة الي كانت تدور برأسي ،، الحمد الله انقلبت بالمسار الصحي وأتمنى تمر سنه حلوه علي وع الجميع ، أنا شوي شايله هم أني ماعرف احد بالجامعة كل صديقاتي بالعلوم والآداب ولكن تتدبر زي مايقولون ،،يشرفني والله اقابل وحده زيك *ايجابيه ، طموحه ، متفايله ،وطموحها نفسي طب أسنان :$ * والله يوفقك ويجزيك خير افدتي ناس كثير

    • الله يعافيك ويخليك ، اسعدتني الله يسعدك اضعاف مضاعفة ♥
      اطمنك البنات مرة حبوبات وفيه ناس تحسين انك تعرفينهم من فترة طويلة ، خصوصًا أكيد فيه كثير مايعرفون احد في الجامعة ؛)
      احرجتني جدًا جدًا ، الله يوفقك ويسهل عليك وان شاء الله تنقبلين اسنان ♥ ♥

  22. الله يجزاك خير فتحتي عيونا على اشياء كنا غافلين عنها بس حبيت أسالك هل من الأفضل أني استعد لاختبار تحديد المستوى يعني أراجع القرمر وكذا ولا مايحتاج استعداد وسؤال ثاني كم معدل طب الاسنان من 5 ؟! الله يسعدك وشكرا

    • اهلًا وسهلًا ♥ شكرًا جزيلًا
      بالنسبة لإختبار تحديد المستوى ابدًا ماانصح ان تستعدين له ، كونه تحديد مستوى لغتك بشكل عام ، لو استعديتي له وعلى مستواك فيه عن اللي اصلًا انت عليه ، ممكن تنحطين في مستوى اعلى من مستواك في الكلاسات وبكذا مابتستفيدين احسن فائدة كون كل مستوى له كتبه وطريقة تدريس ومعاملة .

      المعدل اللي ثبت عليه القبول مااعرفه كون الـجامعة مااعلنت ، لكن مافي شي ثابت يطبق على كل السنين ، كله حسب تحقيق الشروط بعدين يشوفون من اعلى معدل بحسب المقاعد اللي يبونها -وضحت النقطة في رد فوق شوي لو مافهمتي علي –

      وانتِ بعد دنيا وآخره يا رب , حياك الله ♥

  23. السلام عليكم

    أشكرك جزيل الشكر على هذا النوع من التدوين، فعلاً احنا بحاجة ماسة لها.

    ودي أسألك عن كم شيء، وأتمنى ألقى الجواب:
    ١- أنا انقبلت مسار هندسي، هل إذا جبت معدل عالي في السنة التحضيرية أقدر أحول للأقسام الطبية ، وهل عندك فكرة عن تخصص الهندسة الطبية ؟

    ٢- تكوين الصداقات كان سهل ؟

    ٣- تعاون الدكتورات والأساتذة كان سلس ؟

    ٤- كيف أتعامل مع خوفي من الوضع الجديد والمعدل، وكيف كان نظام دراستك ؟

    عذرا على الإطالة ، وشكراً

    • وعليكم السلام ورحمة الله وبركاته ، العفو ولو . سعيدة حقًا انه افادك ♥

      1- اللي اعرفه انه للأسف لا ، مافي تحويل بين المسارات ، اعرف ناس يبون يحولون من صحي لـعلمي وهندسي ومانفع . لكن مااجزم كون الأنظمة ممكن تتغير . تخصص الهندسة الطبية حسب اللي اعرفه والله اعلم هو الناس اللي تصمم وممكن تصنع الأجهزة لـلمسار الطبي ومااعرف هل تكون بعد مسؤوله عنه . زي اجهزة القلب وكذا . وحسب اللي سمعته انه تخصص جديد .
      2- اممم بصراحة انا لما رحت الجامعة كنت اعرف مجموعة كبيرة جدًا من البنات ، معظمهم صديقاتي في المدرسة او في مدرسة ثانية أو قريباتي من مدن ثانية فما اضطريت كثير جدًا أكون صداقات . لكني كونت كون كثير ماشاءا الله بنات حبوبات وتحسين انك تعرفينهم من زمان وكان الموضوع معاهم سهل ، البعض لا لأن زي ماقلت جو الجامعة غير ومافيها قرب الجامعة وناس ماتعرفينهم عدل لآخر يوم ، وناس من أول يوم تحسينك تعرفينهم من سنين .
      3- يعتمد على الدكتورة ، وطريقة تعاملك معاها . في ناس كانت تسيء التعامل مع الدكاترة فتجيها ردات فعل قوية ، وفي ناس تفهم الدكتورة وطبيعتها وتصير الدكتورة حبوبة معاها . مع هذا ترى في التحضيري ماتحتاجين ذاك الإحتكاك بالدكاترة مو زي ابلات ثنوي تصادقينهم . كل علاقتك معاهم تصير رسمية ومحدودة واهم شي محترمة .
      4- التوكل على الله ، النفسية الجيدة والتفكير الإيجابي ، الصحبة الجيدة ، الإهتمام والجد !
      بإختصار . هذي النقاط اللي بتساعدك .
      نظام دراستي ماكان جيد بصراحة وخصوصًا السمستر الأول كنت مااذاكر أول بأول وانتظر للإختبار واتعذر بالوقت وانه ضغط ووو . وتعلمت درس قاسي أنه في الجامعة حاولي قد ماتقدرين تراجعين اول بأول حتى لو ماامداك الوقت ، لو بس تقرين المحاضرة السابقة وتترجمين الكلمات الغير مفهومة يساعد . اهم شي ماتاخذين اي شي بسخف وتفاهه ، لأن المواد السهلة يمكن هي اللي ترفع معدلك ، ويمكن استهانتك بدرجة حضور هي اللي تحرمك من تخصص تحبينه .

      وعذرا للجواب الأطول ، ان شاء الله كل شي مفيد ، وحياك الله♥ ♥

  24. أسلوبك سلس ماشاء الله ومنظم , أبداً ما حسيت بالوقت وأنا اقرأ رغم أن لي نفس التجربة بس استمتعت بالقراءة ,,
    أعجبني كثير طريقة سردك للسلبيات وأشكرك من الأعماق على الطريقة اللي وصلتي بها المعلومات وان كنت أختلف معك في بعض النقاط بشكل بسيط بس بالنهاية لكل تجربته وهدفك أجمل من هذا كله ,, ربي يعطيكِ العافية على جهدك ,,

    شريكة دراسة ;)

  25. السلآم عليكم ..
    فعلآ مدونة تجلب السعآدة و الراحة و درزن تفاؤل :)
    قريت المدونة لآول مرة من فترة .. و مازلت أعيد قراءتها ,
    قرآتها يمكن 10 مرات هههه < لآنها فعلا تجلب السعآدة ..
    … راح أخوض تجربة المسار الصحي هذي السنة ..
    بنفس مرتاحة و متفائلة من كلماتك الحلوة :)
    موفقة .. و هالعمل الجميل بميزان حسناتك ان شاء الله

    • وعليكم السلام ورحمة الله وبركاته ♥
      شكرًا لردكِ اللطيف هذا ، أسعدتني وأخجلتني , جعل ربي السعادة رفيقكِ دنيا وآخرة ؛)
      يا رب تكون سنة جميلة عليك ، وتجتازينها بالنجاح اللي تطمحينه .
      موفقة أنتِ أيضًا ومسددة ♥

  26. السلام عليكم
    صراحة أني في مسار هندسي ..
    بس مدوونة رائعة جدا وقراتها ما أختلاف المسارات بيننا ..
    بس أحب أسأل لو ما أختبرت أختبار تحديد المستوى في ويوم ألي حددوه
    هل بأمكاني الاختبار في يوم التهيئة ..؟؟
    وماذا عن السبيقنق ألي يكون في يوم آخر بكون مع إعدة الاختبار إذا عادووه ألي .؟؟؟
    ومشكوووره خيتوو على المدونة

    • وعليكم السلام ورحمة الله وبركاته .
      شكرًا شكرًا اسعدتني ♥
      أعتذر للتأخر في الرد ، حسب علمي كان يوم الأربعاء المنصرم ، يمكنك سؤال الإدارة يوم الأحد القادم إن لم تكوني قد إختبرتي للآن .
      عذرًا

  27. لغتك رائعة, كلامك بسلاسته لم تر عيني منذ زمن ♥
    أحببت كل حرف كتبته أناملك, وقرأت تجربتك الآن للمرة الثالثة. حقاً, انا بك معجبة ♥

    بيان, بخصوص اختبار الايلتس, سألت الكثير ولم تصلني اجابه واضحة, هل عند تقديمي لدرجة ايلتس مرتفعة, أتمكن من تخطي محاظرات الإنجليزي, تماماً؟ أم سأكون ملزمة بالحظور؟
    أرجو منك إيضاحاً أكبر في هذه الناحية.

    رعاك الله ♥

    • سعيدة جدًا بقراءة ردك اللطيف ، جدًا ممتنة ♥

      بالنسبة لهالذا الموضوع ، ماجاتك الإجابة واضحة لأن الوضع كان مكركب على سنتنا وكل يوم يغيرون رايهم على هالقرار .
      حسب دفعتنا -والأفضل تسألينهم أول يوم ربما تغير الوضع-
      الترم الأول : تلغى جميع كلاسات الإنجليزي والإختبارات وتحصلين على الدرجة النهائية فيها .
      الترم الثاني ينقسم لقسمين :
      القسم الأول – إنجليزي عام – ، تحسب لك درجته ماعدا درجة الحضور ، يجب أن تحضري للكلاسات وبقية الدرجات تحسب لك .
      القسم الثاني -انجليزي عام ، وانجليزي تخصص- : العام ، لا تحضرينه تمامًا .
      التخصص تحضرينه ، ومطالبة بإختباراته وتكاليفه جميعًا .

      موفقة مسددة ♥

  28. شكرا على نشرك لتجربتك افدتتينا كثير
    بس حبيت اسالك لوسمحتي مين هم الدكاترة اللي تشوفينهم الأفضل في التدريس من وجهة نظرك
    الكيمياء\ الاحياء\ الفيزياء\ مهارات الحاسب\ مهارات الاتصال \ العقيدة والاخلاق
    وشكرا مرة ثانية

    • العفو ، سعيدة والله ♥

      هالموضوع أعتذر مااقدر أزكي أحد عن الثاني لحقيقتين :
      1- انا ماجربت الجميع ، فما أعرف اسلوبهم وتكرروا عندي بعض الدكاترة في الترمين فما عندي تجربة واضحة للكل .
      2- فيه دكتورتين انا بالنسبة لي مرة ممتازات ، وانصدمت لما عرفت بنات أبدًا مايفهمون لهم ويحسون اسئلتهم صعبة ومو كويس شرحهم وو ، وفيه بعض الدكاترة أنا مااتقبل أسلوبهم وكثير يحبهم ، فالمسألة نسبية .

      أهلًا وسهلًا ♥

  29. بغيت اسال الحين لو طلع لي مستوى متوسط في تحديد المستوى انجليزي عادي اخذ لي مستوى المبدتئ. عشان اضمن اني اجيب درجات عالية في الانجليزي بدل مادخل متوسط وتنقص درجاتي فيه يمكن وانتي قلتي انو معدل الانجليزي. له قدر كبير

    • تقدر تسوي هالشي ، بس مابيفيدك أبدًا !
      بتصير تاخذ أشياء أقل من مستواك ، فما بتتطور , وزي ماقلت فوق الإنجليزي في التحضيري مررة يتطور لو أنت في مستواك .
      عمومًا ، في بنات سووها ، ولاحظوا ان مستواهم أعلى فرفعوهم , وناس مااكتشفوهم بس مااستفادوا من حركتهم .
      والإنجليزي حتى لو مستواك ونقصت ترى سهله انك تاخذ درجة ممتازة فيه ، مايسوى تسوي هالحركة .

  30. ماشاء الله تحسسين الواحد انه قادر يسوي اي شي جبتيلي التفاؤل بشكل كبييير بس حبيت اسال كم نسبه القبول في المسار الصحي ؟وسوال ثاني انا مييييييح بالانقليزي هل ممكن اني اقدر اكمل بمجرد اعتمد على السنه التحضيريه في الانقليزي ؟؟

    • شكرًا أسعدتيني 3> .
      النسبة تعتمد على درجات المتقدمين ، سنتنا كانت التراكمية المطلوبة
      الدفعة الأولى 89وفواصل ، والدفعة الثالثة 88وفواصل .
      ،
      السنة هذي الدفعة الأولى كانت فيها 86 !
      وما احد يقدر يتكهن هل بتنزل أكثر أو ترتفع ، لأنه يعتمد على المتقدمين .
      لو مثلًا الجامعة تبي 500 بس ، واللي قدموا طلعت نسبهم عاليه فبتعلى النسبة بس لو المتقدمين كانت نسبهم نازلة بتنزلها ، هي تبي أحسن 500 وبحسبهم تتحدد “اتمنى فهمتي علي ” .

      ماافي أحد ميححح مرة , كلنا تعليمنا في المدارس مااكان ذاك الزود ، وعادي جدًا بنات كان مستواهم مبتدئ في التحضيري وتطوروا مرة ؛)
      هل يكفيك او لا ، يعتمد عليك وعلى اللي بيدرسك واهتمامك وو
      بس أحسن لو حاولتي تتطورين خارج الجامعة بعد ، قصص قصيرة إنجليزي ، أفلام بس تطولين على الصوت عشان تسمعين النطق ، مواقع تعليم وو :)
      موفقة مسددة 3>

  31. السلام عليكم ،
    مدونتك ممتازة مرة ومتفائلة ما شاء الله عليك

    بس عندي سؤال عن اختبار الايلتس
    وش هو بالضبط ؟ كيف استعديتي له ومن وين ذاكرتي ؟ وهل اقدر اختبره باي وقت ولا مع بداية السمستر الثاني ؟
    انا مستواي متوسط حالياً وودي اقلل من حضوري
    كون الدوام اطول بالترم الثاني ،

    وشكرراً جزيلا مقدماً ،

    • وعليكم السلام ورحمة الله وبركاته
      شكرًا كثيرًا ، أسعدتيني 3>

      إختبار الآيلتس هو إختبار عالمي يقيس مستوى اللغة الإنجليزية لغير الناطقين فيها يوازي التوفل لكنه النسخة البريطانية .
      يختلف عن التوفل بأنه ينقسم اربعة أقسام ” قراءة , كتابة ، محادثة وإستماع ” يقيس مستواك بإستخدامهم . بينما التوفل يركز على القواعد والمفردات .
      مافيه درجة نجاح ورسوب لأنه بس يحدد المستوى . الآيلتس أعلى درجة فيه 9 .
      واللي كان مطلوب ماادري 5 او 5.5 في الجامغة .

      بصراحة انا مااستعديت له إلا في بعض الجزئيات ، مثل في الكتابة فيه فقرة انهم يجيبون رسم بياني ولازم توصفينه ، فتدربت على هالجزتية من هناك ، قرأت عن اهم المواضيع اللي يناقشونها في المحادثة , اخترت كتاب بتكلم عنه لو طلب مني ، مكان زرته ، فلم شفته ، عشان ماافكر واجد هناك .
      واعتقد كان الإنجليزي كوننا ناخذ 20 ساعة أسبوعيًا تعتبر تدريب لي ؛)

      تقدرين تختبرين بالوقت اللي تبين إذا كان متوفر مقاعد في مواعيد الإختبار اللي يحددونها القنصلية .

      لكن اللي سمعته من بنات السنة أنه لغوا عنكم التوفل هالسنة ، ولأنه ملغي مافيه حركة انه تاخذين ايلتس وتقللين حضورك . بس ماادري اسألي وتأكدي أحسن :)
      ** على سنتنا اللي مستواهم متوسط واخذوا توفل يودونهم مستوى مرتفع مايلغون عنهم الحضور ، بس سألي بعد :)

      عفوًا واهلًا وسهلًا :)

  32. بالصراحة جدا جدا تحمست اني اجتهد مع انه في ثاني ثانوي واطمح ان اكون طبيبة ناجحة واخدم الناس ؛؛؛؛ ف شكرا شكرا لطرحك لهذه المدونه جعلها الله في ميزان حسناتك …. موفقـــــــة

  33. سلاام.. كيفك بيان؟؟
    مرره استفدت من تدوينتك..راح اتخرج هالسنه وودي ادخل هالجامعه..
    بس في كم سوال حابه اسالك ايها
    من شروطهم انو ما اكون مقبوله في جامعه اخرى.. يعني ماقدر اقدم عليها وعلى جامعه الملك عبدالعزيز في نفس الوقت واختار اللي قبلتني صح؟؟!

    ثانيا كم النسبه الموزونه اللي تدخلي طب ولو كانت اقل معناته مافيه امل انقبل؟؟! <<فيس حزين
    صراحه القدرات والتحصيلي لعبت في حسبتنا

    مشكووووره مقدما

    • وعليكم السلام، أهلًا وسهلًا بجود

      أي، هو هالشرط صحيح موجود، ما أقدر أجزم لك لو فعلًا يكتشفون لو الشخص مسجل في جامعة ثانية أو لا. كأن ناس قدروا بس أهم شي مايوودون شهاداتهم لذيك الجامعة لما تطلبها جامعة الدمام. بس فعلًا مااقدر أضمن لك السنة طريقتهم.

      ثانيًا/ النسبة الموزونة تدخلك مسار صحي ماتدخلك طب على طول، وبعد السنة التحضيرية حسب معدلك تدخلين طب أو لا.
      كم النسبة الموزونة اللي تدخلك صحي؟ هذا شي مانقدر نحدده، كله يعتمد على شكثر شطار دفعتكم.
      مثلًا الجامعة عندها 500 مقعد مسار صحي، بتشوف مين أعلى 500 من المتقدمين وتحدد النسبة المطلوبة.
      لو المتقدمين شطار، بترتفع النسبة
      لو مو شطار مرة، بتنزل النسبة.
      فعلى حسب.

      دفعتنا كان القبول في المسار الصحي أقل شي 89%
      الدفعة اللي بعدنا إذا ما خانتني ذاكرتي 86
      مع انه المقبولين نفس العدد، فمعناها أحنا كنا أشطر. فهمتي علي ؟

      موفقة يارب ♥

  34. السلام عليكم

    احسك واجد متفائلة في المدونة الا كتبيها =D ، مع ان النظام الا اتبعته الكلية شوي ظالم
    يعني يجي شخص نسبته المركبة 91 و ما ينقبل طب ،، هنا ظلم بالنسبة للشخص

    بالاخير كانت مدونة جميلة و استمتع ب قرائتها
    بس ،، اهم شي دخلتي التخصص الا تبينه؟؟ =)

    مع تحيات طالب طب اسنان =S

    • وعليكم السلام. أنا كتبت أن التدوينة صادقة. كتبت السلبيات فيها والإيجابيات.
      نظام السنة التحضيرية مطبق في كثير جامعات، فمسألة أني أناقش السنة التحضيرية ظلم أو لا ما أعتقدها مجدية.
      زائد الآن لما أفكر أكثر، الجامعة غير الثانوي ولو هالطالب اللي مركبته ٩١ ما قدر يتحمل تحضيري كيف بيتحمل يدرس طب؟ فأنا ما أجدها ظلم بالعكس صرت داعمة لها. صح فيه قرارات متخبطة وفيها سلبيات لكن مانكون سوداويين.
      أفضل أكون متفائلة، أفضل من أكون متذمرة ومحطمة.

      والحمدلله انقبلت في اللي أبيه، وكتبت هالشي في صفحة التعريف.

      شكرًا لك.

  35. السلام عليكم بيان، شخبارك؟
    ودي أسألك عن تخصص الهندسة الطبية اذا عندك معلومات عنه أو تعرفين أحد يقدر يفيدني فيه
    تسجيل الجامعة ما بقى عليه شي وأنا الى الان محتارة جداً مب عارفة ايش ادخل
    ياليت تفيديني، واذا عندك آسك ياليت تعطيني إياه
    ربي يجزاك خير

  36. شكرا عالمدونه المفيده
    بس عندي كم سؤال انا حابه ادخل مسار صحي مره ووددي بطب اسنان بس اذا ما جبت معدل ياهلني لطب الاسنان هل غصب اكمل بالتخصص اللي دخلوني فيه ؟والا اعيد السنه والا شالسالفه ؟
    وبالنسبه للانقليزي اعتقد هو اللي راح ينزل نسبتي كيف الوضع للي ما يعرف شي ؟
    شاكره لك كثيييير

  37. هدف الجامعه على حسب ما اعتقد انك تستمر بالكفاح
    التحصيلي – القدرات – الثانوية كلهم فقط تدخلك التحضيريه
    وفي التحضيريه انت لحالك كل الثلاثه الي سويتهم ما يشفعون لك بشيء

  38. التنبيهات: تجربة سنة ثانية طب أسنان 3> | مُدونَة بيَان علي ♥

  39. استمتعت و أنا أقرأ، موفقة بأذن الله

    لدى سؤال / أنا قبلت في كلية العلوم الطبية بحفر باطن لكن هذه ليست أمنيتي لأني أريد إن أدرس طب
    هل أستطيع بعد إنهائي السنة التحضرية بمعدل عالي دخول الطب ؟
    لأنني أود إن أدرس جراحة :(
    و شكرًا

  40. كلاام جدا جميل وراقي ،، عندي سؤال صغير اتمنى تكون اجابته نعم
    انا انقبلت بجامعة الدمام لكن مسار علمي ورغبتي طبعا صحي انقبلت اقل من رغبتي سؤالي ،، هل في تحويل الا المسار الصحي حتى،لو كان عليي ادرس المسار العلمي بعدين احول ،، وشكرا جزيلا مقدماً

  41. جزاش المولى ورحم الله والديش اذا ممكن رابط مجمعين فيه محاضرات وا ختبارات اخي انقبل هالسنة والله يستر منه

  42. السلام عليكم ، يعطيك العافيه على التفاصيل مره استفدت ، بغيت اسألك اختبار تحديد المستوى كيف ؟ فيه وقت ؟ ايش يشمل ؟ Vocab ? grammar ? writing ? listening? و مره شكرا صدق والله استفدت

  43. السلام عليكم ورحمة الله وبركاته
    منذ الأمس و أنا اسرح في أرجاء مدونتك من عنوان لآخر ،
    فعلاً مدونة ممتعة ومفيدة . . جزاك الله خيراً وجعله في ميزان حسناتك
    اريد ان اسالك عن شيءٍ بما انك اخترتي جامعة الدمام للدراسه

    لدي طموح أكبر من أن احمله ، وأعظم من أن ادعه يسقط عن كتفي
    طموح يثقل كاهلي و مع ذلك اعتز به واعتزم حمله إلى النهاية “طموح علمي”

    أنا من اهل الشرقيه واريد دراسه الطب
    فهل جامعة الدمام ، بطاقمها التدريسي و ومنشآتها ، هل تكون صرحٌ علمي يرضي غروري طمعي و جشعي العلمي ؟
    لماذا كنتي ترغبين بها اكثر من جامعة الملك سعود ؟

  44. التنبيهات: تجربة سنة تحضيرية مسار صحي جامعة الدمام 215 3>. | بشائر أحمد

  45. التنبيهات: تجربة سنة تحضيرية مسار صحي جامعة الدمام 215 3> | بشائر أحمد

  46. السلام عليكم ورحمة الله وبركاته.
    شكرًا جزيلًا وجزاك الله خير على هالمعلومات المفيدة جدًا، الله يرفع قدرك ()*
    ،
    ما أدري إذا بتردين علي أو لا بس أتمنى جعلك للجنة ! ):
    أنا انقبلت مسار صحي ولله الحمد، وخلفيتي عن دراسة المسار الصحي صفر، كان في بالي أشياء ويوم قريت كلامك طلع غير تماما عن إللي في بالي، الحمدلله افدتيني كثير كثير.
    في شي أعآني منه كثير ودايم هو إللي يخليني أيأس واتحطّم إللي هو “الانجليزي” إنتِ ماشاء الله مبيِّن أنك تعرفين انقلش وتفهمينه، بس أنا لا مراا مراا انجليزيتي سيئة وممبتدأ جدًا ما اعرف سبيكنق ولا رايتنق وحتى اللسننق إذا ما كانت معلومات مباشرة ما اعرف، المدارس إللي درس فيها ابتدائي ومتوسط ما تعلم انقلش ابدًا يا دوب حروف وأرقام، والله أن الاشياء إللي اعرفها ألحين تعلمتها من الثانوي لأن دخلت نظام مقررات، وكنت لما اجي اذاكر ابكي ابكي )” اذاكر ودموعي اربع اربع والله وفي النهاية اجيب في ال 70 من 100 )))))))=
    حتى ألحين وأنا اكتب لك احس ببكي مراا شايلة هم واحس ماراح اقدر اكمل واحقق حلمي ( طب عيون )
    تتوقعين راح أتعلم في السنة التحضيرية وراح اقدر اكمل ولا صعب على من هم مثلي، وهل صادفتي بنات نفسي ضعيفين جدًا بالانقلش؟؟
    أتمنى تردين والله ماتدرين اشقد أنا محتاجة أحد يجاوبني ! وشكرًا جزيلًا الله يسعدك (:

    • وعليكم السلام ورحمة الله وبركاته
      اهلًا فيكِ
      اولًا مبروك عليكِ القبول، والله يوفقك ويبارك لك
      ثانيًا، ان شاء الله من اكثر الاشياء اللي حتتطورين فيها في تحضيري الانجليزي. اهم شي همتك وتكونين مستعدة تبدلين مجهود مضاعف، لأن خلال فترة تعلمك الانجليزي حيكون فيه مواد اخرى تدرس بالانجليزي فتحتاج منك شوي جهد.
      الانجليزي ممارسة أقترح من الان تبدأين تطورين نفسك بالانجليزي، شوفي افلام كثير هذي الاجازة وحاولي تسمعين كويس شيقولون مو بس تقرين الترجمة، ما اعرف لو حطيتي ترجمة انجليزية بمستواك حتفهمين او لا بس على الاقل بدأي بالسماع
      ثانيًا حاولي تقرين بالانجليزي ممكن قصص قصيرة ممكن تدخلين النت وتبحثين عن مواضيع بسيطة بالانجليزي كلش بسيطة مثلًا طبخة او كيف تصنعين شي بنفسك او عن كيف تطور نفسك اي موضوع بسيط
      الانترنت مايقصر فيه برامج على الجوال، فيه فيديوات في يوتيوب بس كتبي كيف تتعلم انجليزي؟ وفيه بحر طرق
      ما اقول لك حتكون الامور سهلة وماحتواجهين صعوبات، بس اقول حاولي لا تسكرينها في وجه نفسك قبل ما تحاولين. أكثر شي ممكن يوقف في وجهك انك تعتقدين بالنهايى السيئة قبل ما تجربين حتى. خلي املك بالله كبير، وشدي على نفسك وفالك التوفيق ان شاء الله.

      • شكرًا من أعمااق أعماق قلبي ♥
        ربي يسعدك ويوفقك ويفتح لك أبواب الخير والرزق ياارب ()
        حمشي خطوة خطوة وحطبق كلامك بإذن الله، الله يجزاك خير (=

  47. التنبيهات: سنة تالتة طب أسنان (سنة المُنحدر) | مُدونة بيان علي ♥

  48. التنبيهات: سنة تالتة طب أسنان (سنة المنحدر) ♥ | مُدونة بيان علي ♥

  49. السلام عليكم جزاك الله خير بس بغيت اسألك عن جزء السبيكينق اللي بيصير بأول محاضرة عن ايش بالضبط يسألونك تكلمي عنه بالمختصر المفيد والله يعطيك العافية

  50. السلام عليكم اختي انا تخصصي رياضيات وادرس سنه ثانيه كتخصص باسالك ابي احول لجامعة الدمام وابي اغير تخصص تمريض مختبر . سؤالي هل تقبلني الجامعه وكم المعدل والسنه التحضيريه اعيدها من اول . وايش الاختبارات اللي تاختبروها بالتمريض يعني اختبار يكون في اللغه واللي ماينجح يغيرون تخصصه .او دراسه للمواد وانتقال للمستوى اللي بعده . تكفون ساعدوني ما اعرفاحد اساله

  51. السلام عليكم اختي انا تخصصي رياضيات وادرس سنه ثانيه كتخصص باسالك ابي احول لجامعة الدمام وابي اغير تخصص تمريض مختبر . سؤالي هل تقبلني الجامعه وكم المعدل والسنه التحضيريه اعيدها من اول . وايش الاختبارات اللي تاختبروها بالتمريض يعني اختبار يكون في اللغه واللي ماينجح يغيرون تخصصه .او دراسه للمواد وانتقال للمستوى اللي بعده . تكفون ساعدوني ما اعرفاحد اساله

    • لسلام عليكم اختي انا تخصصي رياضيات وادرس سنه ثانيه كتخصص باسالك ابي احول
      لجامعة الدمام وابي اغير تخصص تمريض مختبر . سؤالي هل تقبلني الجامعه وكم
      المعدل والسنه التحضيريه اعيدها من اول . وايش الاختبارات اللي تاختبروها
      بالتمريض يعني اختبار يكون في اللغه واللي ماينجح يغيرون تخصصه .او دراسه
      للمواد وانتقال للمستوى اللي بعده . تكفون ساعدوني ما اعرفاحد اساله

  52. السلام عليكم ورحمة الله وبركاته
    جميلة المدونة يعطيك العافية عليها واستفدت كثير من كلامك
    بس كنت ابي اسألك عن الفحص الطبي للقبول في الجامعة للكليات الطبية
    ايش الاشياء اللي تمنع قبولك او تخلي الطالبة غير لائقة طبيا؟

  53. يا أخوان , أنا انقبلت مسار صحي الصحة العامة في جامعة الدمام , هل استطيع التحويل إلى كلية الطب بعد ماخلص تحضيري مسار صحي صحة عامة إذا جبت المعدل المطلوب لتخصيص طلاب كليات الطب , أفيدوني الله يجزاكم ألف خير

  54. التنبيهات: تجربة السنة التحضيرية للمسار الهندسي بجامعة الدمام 216، تحذير: تدوينة طويلة – فاطمة

  55. مرحبا. جميلة تدوينتك استفدت منها. لدي سؤال هل نظام الجامعة متشدد بخصوص اللبس والمظهر وقصة الشعر وهل المظهر يأثر على تعامل الأساتذة مع الطالب، لا أتحدث عن المظهر الغريب جدا لكن اقصد شعر قصير انا طالبة بجامعة الملك خالد بأبها و فية تشدد غير طبيعي بخصوص المجال هذا. اتمنى الرد لاني بحول لديكم وانا متخوفة من هالشي .شكرا مسبقا

  56. عندي استفساره بسيط
    جدًا مهم بالنسبه ليه ما تتخيل قد ايش تعبت وانا ادور للاجابه عن ذا السؤال جتني اجابات بس مو وافيه ما فهمت وش السالفه.

    *السؤال : الان بالنسبه للكيمياء والفيزياء والاحياء والحاسب
    (هل تفتحون الكتب ولا تلقون كلمه عربي كذا كله دش انجليزي ؟
    هل الدكاتره يشرحون لكم بالانجليزي؟ واذا ايه كيف تفهمون والله منتو جايين من امريكيا ولا بريطانيا انتي عافه بعد كيف مستوياتنا بالمدرسه في الانجليزي !! ولما تجين تذاكرينها كيف تحفظين التعاريف والشروحات والتعداد والقوانين بالانجليزي ! اصلا بالعربي يالله نحفظ كيف بالانجليزي! )*

    شي ثاني بعد : كيف كان مستواك بالانجليزي لما دخلتي السنه التحضيرية هل كان مستواك مره ممتاز عشان كذا مشيتي في الكيمياء والفيزياء والاحياء

    الان اللي مستواها تعتبر مستوى مبتدا او اول بالانجليزي
    كيف رح تقدر على الكيمياء والفيزياء والاحياء بالانجليزي شي غير معقول !

    تكفين وضحي لي بشكل مفصل هذي النقطه جدًا متخوفه منها انا شطوره الحمدلله بدروسي كلها بشكل عام لكن متخوفه جدا من ناحيه الاحياء والكيمياء والفيزياء كيف تكون بالانجليزي كيف رح اقدر!؟؟

    ماده الانجليزي نفسها احسني ان شاءالله بمشي فيها لكن كيف امشي في ماده صعبه بالانجليزي خاصه ان انجليزيتي مو مره كويسه وانتي تعرفين كيف تدريس الانجليزي بالمدارسه انا احاول اطور لغتي الانجليزيه دخلت دوره اولاين واختبرت اختبار تحديد مستوى ودخلني بالمستوى الاول وماشيه فيه

    فالله يسعدك وضحي لي هذي النقاط اللي سألت عنها جدًا يهمني عشان اعرف احدد وجهتي هل انا ادخل طب او تخصص انجليزي

    والله يسعدك ويوفقك استفدت من قراءة كلام الله يسعدك وضحتي كل شي حسيت اني عشت التجربه من القراءة فقط بس ياليت توضحين النقاط اللي سألت عنها فوق باقرب وقت لو تقدرين اليوم الله يسعدك لاني جدا مستعجله انا حاليا ٣ ثانوي ادبي واحتمال احول الاحد علمي فعلى حسب ردك بقرر واخر مجال لي يوم الاحد لازم اقرر واكلم اداره المدرسه واختبر اختبار الاجتياز عشان احول علمي لاني اصلا ميويلي علمي بس تحت ضغط من امي واختي وتحت تحطيم و و و دخلت ادبي وتخليت عن حلمي اني اكون طبيبه بس ربي بفضله طلعت لي معلمه في طريقي ووعتني وشارت علي انو لو ميولي علمي احول واتمسك بحلمي فانا قاعده استخير واستشير وابحث ومع الاسف محد جاوب على استفساري هذا ولا فادني هالموضوع ولا لي الا الله ثم انتي فتكفين ردي علي اليوم ورح اكون ممتنه لك وادعي لك طول عمري 😭😭😭💔

ساهِم في التغيير ، أترك لي ردًا ♥

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s