تجربة سنة ثانية طب أسنان 3>


 

بسم الله الرحمن الرحيم

سلام الله عليكم ورحمته وبركاته..

image

شهر رمضان مبارك عليكم يا سادة

تأملت أن تنزل هذه التدوينة قبل شهر رمضان، وهاهي تنزل في فجر أول ليلة من الشهر.

كتب الله لكن في أيامه كل رحمة، خير، بركة وسعادة ♥

عودة بعد إنقطاع طويل، جاء إثر ضغط الدراسة فالإختبارات، ثم مناسبات عديدة في الإجازة وأخيرًا تعطل جهازي الحاسب. عمومًا لايزال مريضًا لكن آن لهذه التدوينة أن تخرج للعلن.

تقرأون اليوم التدوينة الجديدة في السلسلة السنوية “ سلسلة التجارب الدراسية”. وكما يظهر في العنوان فهي وأخيرًا تجربة سنة ثانية طب أسنان. 

سلسلة التجارب الدراسية :

  1. بيان جامعية ( اختبار القدرات والتحصيلي) … هُنا
  2. بيان جامعية ( مرحلة التسجيل في الجامعة) .. هُنا
  3. تجربة سنة تحضيرية ( مسار صحي في جامعة الدمام) .. هُنا
  • ملاحظات قبل البدء:
  • في هذه التدوينة لن أذكر أبدًا اسم أي دكتور أو دكتورة قاموا بتدرسينا، ولن أبدي رأيي في أسلوب أيٍ منهم.لو كنتِ في جامعة الدمام طب أسنان سنة ثانية حاليًا أهلًا بكِ شخصيًا تسأليني أو بشكل خاص.
  • أيضًا بعض التفاصيل الصغيرة لن تقال علنًا. قديمًا كنت بيان علي بين ألف بيان علي. الآن أنا بيان علي من دفعة 213 في جامعة الدمام في طب الأسنان. فـ … !
  • أنا صادقة في تدويناتي، لا أزخرف ولا أهول أي شيء. أذكره من وجهة نظري أنا. فكل الآراء في هذه التدوينة هي آرائي الشخصية، لست في جريدة يومية ولا في قناة أخبار حتى أكتب رأيًا محايدًا.
  • أنا بشكل عام لست من – المتذمرين-. كثير ناس قالوا لي : تفاؤلك أكثر من المعدل في تدوينة تحضيري. لكن صدقًا! –واسمحوا لي أن اكتب بالعامية هنا- : بالله أيش بيفيد شخص مقبل على مرحلة جديدة أني أقول له : يا ويلك يا سواد ليلك غير أني أسود حياته قبل ماتبدأ! + كثير أشياء كانوا بنات يتذمرون منها ما كنت أشوفها مصدر تذمر، كانت أشياء طبيعية في أي كلية وجامعة، وكنت أشوفها مبالغة واحيانًا تصرفات مؤذية بس تأخرك عن الركب، هذي حياة جامعية مو عبط. أنا ما أكذب في المدح لو مدحت وما ألغي السلبيات. بتشوفون سلبيات مسطرة تحت. لكني مو من النوع التذمري اللي يعمل من الحبة قبة، ويجهز الدوا قبل الفلعة. مش تثق بكلامي؟ لا تأخذ فيها. تحس أني أقول كلام غير صادق واني أشوش الناس؟ هذي مدونتي وهذا كلامي, أفتح مدونة واكتب تجربتك.
  • أنا احب كليتنا. جد جد أحبها ♥ بدأت قصة حبنا لما فتحوا قسم البنات قريب الوقت اللي أنا كنت أفكر فيه “ وين بروح عشان ادرس طب أسنان :(؟” واكتملت لما درست هالسنة فيها ♥♥ كلية تحسينها شباب ♥ مهتمة ومنظمة ولها وجهة وخطة. وحاصلة على الإعتماد الاوربي، وتعمل على انها تحصل على الاعتماد الأمريكي، فجد أحبها ♥
  • بس شكرًا :p

 

 طيب شرايكم تشوفون هذا الفيديو اللي فيه ملخص سريع لهذي السنة؟ –فيه موسيقى-♥

أو هُنا

بسم الله نبدأ..

بدأنا السنة بتسجيل المواد، وفرحة وحب وإمتنان للدوام القصير :”) بعد حرب تحضيري ودوامها اللانهائي لخمس ونوصل 7 وحالة أليمة، أخيرًا دوام أتغدى فيه في البيت. بدأنا نتعرف على ناس جديدة في هذي السنة وبقروب جديد لطب الأسنان وفي الفيس بوك بعد. وبدأنا نسأل مين معانا مين لأ؟ مين انقبل؟ أعرف كم بنت ؟

بدأت السنة فعليًا ليلة أول يوم دراسة لما كنا ماندري نداوم وين؟ مبنى الطب؟ مبنى طب الأسنان؟ خصوصًا أن مبنى الطب، العلوم الطبية، التمريض، التحضيري كلهم نفس الجهة، في نفس المجمع. لكن مبنى طب الأسنان بعيد وبسيارة نروح له يم عيادات الأسنان. فـوين نروح؟

الحمدلله على التكنولوجيا، تواصلنا عبر تويتر مع الدكتورة –حسب ما أذكر- خلود الخاطر وقالت لنا أنه دوامكم صباح في مبنى الطب وبعدها في الأسنان. عانينا الأمرين عشان نعرف كيف نكلم الكلية عشان تجيب لنا باص أول يوم.

–  واللي اكتشفناه بعدين أنه مواد الطب اللي ندرسها ناخذها في مبنى الطب، مواد الأسنان ندرسها في مبنى الأسنان-

الأسبوع الأول كان غريب، كأننا داخلين الجامعة أول مرة. كثيير ناس مانعرفهم. صديقاتي الكثير اللي معاي في تحضيري اختفوا. كنت بس أنا وآلاء. كان الوضع موحش. ومع أني كنت أبي أنقبل طب أسنان، كنت خايفة لأن الوضع ما كان مريح ولا ممتع. كنت أداوم وانا مو متحمسة، متعة تحضيري والبنات كلها أختفت. وبصراحة كنت خايفة من بنات الدفعة اللي بقضي معاهم 5 سنين، مين هم؟ كيف هم؟ 48 بنت، أعرف منهم 5 تقريبًا بس. بعضهم بنات كنت أتوقع أني ما أستلطفهم من تحضيري مع أني ماكنت أعرفهم شخصيًا.

image

كان فيه خلال هذا الأسبوع ساعة-ساعتين تقريبًا إجتماع لنا مع الدكتورة ومنسقة شؤون الطالبات د. مها عبد السلام. أعطتنا فيها نبذة عن الكلية، عن طاقم التدريس، اللبس، الأماكن، الممنوعات، المواد اللي بندرسها وما إلى ذلك. حبابة كانت وقالت لنا ليش تخصصنا مميز وحلو.

طبعًا في طب الأسنان مافيه فترة طويلة لحالة الفزع هذيك. من أول أسبوع أخذنا محاضرات وبدأت الأسايمنتات – الواجبات-، وكانت كلها في مجموعات. فبطريقة أو بأخرى بدأنا نتعود على بعض أكثر. صار عندنا ليدر رئيسية وليدرات أصغر لكل مادة، منسقة للباص وبنات يسوون تفريغات، وهكذا. وبينوا البنات حبوبات الحمدلله ولطيفات. رغم هذا فالنقاشات في سنة ثانية كانت أكثر عمقًا من تحضيري ( الجدول الدراسي، الإختبارات، وكثير أشياء كنا نحتاج نقررها) وكانت النقاشات في قروب الوتس اب أحيانًا توصل مراحل صعبة ومعقدة بس بعدها تفرج الحمد لله.

image

صار عندنا أيام نداوم فيها الصباح في مبنى الأسنان، وبعد الظهر في مبنى الطب، أو العكس. عشان كذا أيام كثير البريك من 12-1 يتبخر بسرعة، إما الباص يتأخر، أو البنات يتأخرون، ومشوار الطريق. يعني إذا كان يوم سعدنا نوصل 12ونص ويبقى لنا نص ساعة بريك. أو أحيانًا بريكنا يصير ركض بس. كان عندنا يوم واحد في الأسبوع نداومه في مبنى الطب كامل، فكان اليوم اللي البريك فيه طويل يعتبر، نقدر نتجمع فيه مع صديقاتنا من كليات ثانية وناكل زين :P

image

في مبنى طب الأسنان – طبعًا بتشوفون التغيير الكبير في هذي السنة- كان فقط قسم منه للطالبات فأحنا ثاني دفعة طالبات أسنان فيه. فيه إدارة شؤون الطالبات تحت ومكان صلاة و شبه كافتيريا –اذا صح التعبير- “ عبارة عن ثلاجة وأكل ومايكرويف وغلاية” الـدفع فيها ذاتي، فيه صندوق ونحط فيه-. (من أكثر الأشياء اللي عجبتني، فيه حس أمانة ومسؤولية) بس الأكل فيها شوي ويخلص بسرعة ._. يارب السنة الجاية ينفتح المبنى كامل ويتحسن الوضع.

image

وطبعًا فيه بهو تحت ومعمل وباب لقسم الأولاد ممنوع أحد يروح له.

فوق مكاتب الدكتورات، معمل وثلاث فصول دراسية. لنا واحد, لسنة ثالثة واحد، والأخير فصل للدراسة فقط. 

أما في مبنى الطب، فكان عندنا كلاس خاص فينا لكل الكلاسات. وكان أصغر كلاس في الدنيا. ونختنق داخله. ولما اشتكينا انه ضيق، قالوا انتوا أقل من شعبة من شعب بنات الطب. فأنتوا لكم أصغر كلاس.

كليتنا كانت جدًا مهتمة، بعد فترة قصيرة جدًا قسمونا لمجموعات وكل بنت عطوها ورقة فيها اسم السوبرفاييزر حقها، ساعاتها المكتبية ومعلومات للتواصل. أيضًا وزعوا علينا اللوكرز كل بنت لها لوكر.

السوبرفايزر حقتي وكم بنت بعد، دكتورة ماتدرسنا لطييييفة. كانت تسوي لنا إجتماع رسمي بداية كل شهر، ولو حبينا أي وقت اضافي. بداية السنة قعدنا نتحلطم كثير عليها وكيف مواد الأسنان أصعب من مواد الطب ونتعب ودرجاتنا تطير ومعدلنا وكانت تسمعنا وتكتب ملاحظاتنا. حبوبة مرة ♥

– اللبس –

في كلية الأسنان: غالبًا لازم تكونين محجبة في المبنى ماعدا البهو اللي تحت مخصص للطالبات وبيتم اعلان مرور أي دكتور\عامل. لكن فوق يجب لبس الحجاب لأن كثير أوقات يدخلون دكاترة.

اللبس عمومًا : تنورة+ حجاب+ لابكوت  أو  سكراب+حجاب+ لابكوت. في حال مو لابسة لاب كوت تتمين بالعباية. السكراب أي لون –ربما يتغير النظام-.

كان عندنا مشكلة في مبنى الطب كونه ممنوع لبس السكراب عندهم، ويبونا نمشي على نظامهم فأحيانًا نكون جايين من الأسنان فبعض البنات يكتبون تعهدات. المهم يُقال بنات سنة ثالثة اشتكوا وكتبوا خطاب وسمحوا لنا.

** أخذوا مقاساتنا  السمستر الثاني عشان يفصلون لنا لابكوتات عليها اسم الكلية وكذا وحركات *رمز لابس نظارة شمسية* لكن للأسف شكلهم ماخلصوا :P 

– الإختبارات-

مواد طب الأسنان عمومًا تعتمد على أعمال السنة أكثر من الإختبار النهائي. يعني أعلى درجة لإختبار نهائي ممكن تكون 40%. 60% تكون إختبارات نصفية، وقصيرة، واجبات، حضور، معامل. وهالنظام أحسه حلو! جيد أنك تقدرين تجمعين درجاتك طول السنة، أحسن من لو النهائي عليه 60% أو 50%.

في كليتنا نظام الإختبارات النصفية كان مرعب مقارنة بتحضيري اللي كان بداية كل أسبوع أختبار. أحنا كان نظامنا “ اسبوعين فيهم كل المواد مرة وحدة” كانوا يحطون لنا الجدول المواد ورا بعض “ احد، أثنين، ثلاثاء ….” بس ليدرنا الله يعطيها العافية كانت تتناقش مع ليدر الأولاد ويحاولون مع العميد بحيث تصير يوم ويوم مثلًا. المهم خلال الإختبارات النصفية طبيعي لو عندك اختبار نصفي وكويز, أو اختبار نصفي وتسليم واجب، أو اختبار نصفي واختبار عملي. مايلغون بعض! انتِ دبري نفسك!

-الدراسة-

بشكل عام الوضع سنة ثانية يختلف عن سنة أولى مية وثمانين درجة بالنسبة للمواد. المواد دسمة! تحتاج تركيز ومذاكرة يومية. بدون هالأمرين، أنسي الأيه بلس. مافي مواد يمديك تطنشينها. حتى المواد اللي عليها وحدة بس في المعدل،  الشغل فيها كثير زي ما بفصل في المواد تحت.

فالضغط اللي كنا نواجهه في سنة ثانية والصدمة هي صدمة معلوماتية عن تحضيري. المواد صعبة، أشياء جديدة عكس تحضيري اللي كان تقريبًا مناهج ثنوي مترجمة. تحضيري الضغط فيها نفسي أكثر من ماهو دراسي. في سنة ثانية العكس. ما أكذب لو قلت فعلًا أحيانًا من الضغط افكر “ انا صج أبي طب أسنان؟” لكنها بس مرحلة ضغط وتعدي واكتشف أني “ أي أبي طب أسنان”

image

أنا خلال هالفترة بدأ عندي التوتر الدراسي يزيد، كانت بالنسبة لي مرحلة جديدة تختلف عن تحضيري، الحين صح مافي شي أنافس عليه، ويكفيني أني أجيب 60 من 100 في المادة عشان أعديها، لكن لا هدفي أني اتخرج بمعدل حلو، ولو مابدأت من الحين أحافظ على المعدل وأنا لسه في السنوات السهلة، فصعب بعدين. كنت أتوتر كثير وبيتنا كله لاحظ هالموضوع. عمومًا جات إجازة اليوم الوطني وصادف أنها بتكون 4 أيام. وفاجئنا بابا أننا بنروح فيها طيبة الطيبة ♥ كانت هذي من أسعد لحظات حياتي، كنت فعلًا أحتاج أطلع واشحن طاقة لأني ماكنت مستعدة لكل هذا.

image

كان عندي أول يوم بعد الإجازة تسليم واجب، واختبار قصير. فيه أحد يذاكر في المدينة يا جماعة .__.” !! لكن الواجب جماعي فاضطريت أحله. لكني قضيت فترة الباص للمذاكرة، كان كابوس! اللقعدة الغير مريحة، الجو المظلم في الباص، إزعاج. ماكانت بيئة مناسبة فعلًا. لكننا وصلنا الفجر وداومت بعدها الجامعة واختبرت وجبت كامل في ذاك الإختبار *-* ما أنسى!

image

طيب أيش أقول بعد؟

نتكلم عن المواد ؟

نبدأ نشرح المواد؟ لأني مو عارفة أيش أقول بعد.

– اسئلة اسلوب الدكتور ومن وين نذاكر تعالوا لي على جنب في الجامعة لما نداوم-

– مواد السمستر الأول –

1- General Anatomy and embryology  (علم التشريح عام وعلم الأجنة) – مادة طب.

هذي مادة تشريح للجسم بشكل عام. عظام، عضلات، أوعية وأعصاب. أخذنا كل الأجهزة الحيوية ، كل جهاز تشريحه. بالإضافة لمعمل نتعرف على الأشياء عمليًا.

درسنا في هذا السمستر دكتور، وفي المعمل دكتورة. المادة حفظ بدرجة أولى، تحتاج مذاكرة يومية لأن في حال تراكموا عليك الاسماء الغريبة الى يوم الإختبار حتبكي بكاء حزين يا حببتي :) ! التركيز في المحاضرة مهم جدًا في هالمادة لأن أحيانًا يقول الدكتور معلومات على الطاير لكنها مهمة وموضع سؤال، يرسم رسمة معينة تساعدك في الحفظ. فيه كتاب ماشريته حقيقة. اعتمدت على السلايدات وكتابة الملاحظات مع الدكتور.

القسم الثاني : الامبريولجي ( كم محاضرة قصيرة) عن الجنين ومتى وكيف يتكون الرأس، الفم، البلعوم وما إلى ذلك

المعمل انقسمنا إلى قروبين لأن عددنا كبير، كل قروب له يوم، أو ساعة بحسب كيف ترتبون الجدول بين بعضكم ومع الدكتورة. ماكنت أقدر أحفظ العدد الكبير للاشياء في المحاضرة لأنها كثيرة وكلها نفس اللون! XD  ففي وقت المراجعات قبل كل إختبار عملي كنت أروح المعمل مرة ومرتين وثلاث وأحفظ. image

المادة بشكل عام مو مستحيلة. تحتاج تركيز، وحفظ، وفهم بعد عشان تربطين الأشياء ببعض. وعلى المادة 5وحدات فهي جدًا مؤثرة في المعدل. بشوية جد في المادة، تحصلين النتيجة فيها.

الاختبارات : اختبارين نصفيين، واختبار نهائي. في الاختبارات النصفية تكون خيارات متعددة، في النهائي تكون فيها مقالي ورسم. مستواها يختلف من إختبار لثاني. الاختبار النهائي دائمًا يعجبني يكون أختبار فيه ذكاء أنا أحس. اطلع منه وانا مبسوطة مو مررررة سهل ولا معقد، مادري كيف ذكي وبس.

 

2- physiology ( علم وظائف الأعضاء) – مادة طب.

مادة ندرس فيها “ أيش الوظائف الجيوية لكل عضو، وكيف يقوم فيه؟ تقريبًا ندرس أيش الطبيبعي اللي مفروض يصير عشان  بعدين نعرف أيش الغير طبيعي)

كانت أول مادة استمتع فيها في أول اسبوع. وأكثر مادة تعتبتني في الإختبارات النهائية. المادة ممتعة بالنسبة لي لكنها تعتمد على مين يشرحها. درستنا فيها أكثر من 5 دكتورات. لكل دكتورة أسلوبها. وطريقة شرحها. نهاية كل نظام فيه مراجعة للنظام بشكل عام. وكل دكتورة لها اسلوبها فيه. بشكل عام الدكتورات كلهم حبوبات وسهل التعامل معاهم. المنهج طوييييييييييل فيحتاج مذاكرة مستمرة وتركيز. ماكنت أركز دائمًا ولا أذاكر بشكل مستمر. واقول لكم: تعبت في المذاكرة جد تعبت. فيه كتاب بس نفس نظام الأناتومي فوق.

image

المعمل : مو كل جهاز حيوي له معمل، حسب الموضوع اللي تدرسونه. ممكن معمل تقيسون فيه الضغط، ممكن معمل عن السكري، ممكن معمل على الأعصاب واختبارها. لطيف المعمل، فيه درجات عليه طبعًا. وله اختبار نهائي على ورق.

الاختبارات نفس الاناتومي : اختبارين نصفيين ، وواحد نهائي. كلهم اختياري. في كل المنهج. فطويل اي، خصوصًا انها مادة فهم.

عليها 5وحدات بعد. فتأثر بالمعمل بشكل قوي. تحتاج تعب عشان الدرجات الحلوة لأن المنهج طويل. لا تتلحطمون عليها واجد. حاولوا تستمتعون وتفهمون و ذاكروا أول بأول!!!!

( عمومًا هالمادتين مواد طب بشري بشكل رئيسي، فأحنا مانتعمق فيهم كثير. لو تقارنون كل محاضرة تاخذونها أنتوا مع بنات الطب بتشوفون فرق كبير. لأن احنا هذي النظرة العامة تكفينا. عندنا مواد تخصص تهمنا أكثر)

3- introduction to dentistry profession ( مقدمة في طب الأسنان)

والله فيني الضحكة مو عارفة شأكتب. هذي المادة خدعة ! اسمها ماله دخل بمحتواها. – كأن قال لنا دكتور أنهم غيروا المحتوى لكن الأسم ماغيروه لسه-

المهم هذي المادة كانت هم لنا. ليش؟ ما كانت دسمة لا! ولا فيها كلام كثير لا! بس كانت متعبة نفسيًا.

image

كانت مادة عن اعداد ابحاث. وكأول خطوة كيف نبحث عن مقالات علمية، ووين – بشكل عملي على أجهزة إلكترونية-. بعدها بدأنا الخطوة الثانية لما نختار مقالات علمية كيف نختصرها. تقريبًا ثلثين السمستر الدكتورة تعطينا أسبوعيًا كمجموعة مقال علمي مكون من 4-7 صفحات. نحتاج نختصرة حسب الطرق العلمية في 500-700 كلمة تقريبًا. وكان فيه معايير لهذي العملية خصوصًا الغش! كيف؟ لو كنتِ تختصرين ونقلتي جملة أو جملتين نصًا. تعتبرين غاشة ومنتهكة لحقوق الكاتب. – وطبعًا درجاتك باي باي- الدكتورة كانت جدًا دقيقة في التصحيح. ممكن تحسونه شي سهل، لكن المقالات كانت علمية في طب الأسنان، نحتاج نفهمها فهم دقيق عشان نعرف بالضبط أيش نختصر. اي معلومة نخلي أي معلومة نحذف. كيف نصيغ الجملة. كانت العملية تاخذ وقت طويل. وكان الواجب كل اسبوع وتسليمه كان غالبًا السبت صباحًا ولا باي باي درجاتكم. فكان الويك اند كله بس نحل أسايمنت ونختصر.

وكأسايمنت نهائي وهذا كان قمة الانجاز والتعب. تعطينا الدكتورة سؤال، واحنا نقوم بالبحث عن مقال علمي مناسب متوفر يـجاوب على هذا السؤال، ثم نختصره ونسوي له عرض كامل قدام الدكتورة\ او الدكتور والبنات. نعرض فيه كل اللي سويناه وايش النتيجة.

كانت مخيفة المادة لأن الدرجات ممكن تضيع بسهولة، تحتاج دقة في العمل وإخلاص مافيها ابدًا مجال “ قص لصق”. كانت تاخذ وقت كون كل اسبوع عندنا واجب.

المادة زي ماقلت فوق كيف نبحث وعملية تقريبًا. فـالاختبار النهائي النظري كان غريب شوي. مادري ماعرف أوصفه. مو صعب بس انه مادة عملية اختبرناها نظري. وكان فيها اختبار واحد نصفي.

المادة عليها وحدة بس! مجهود عملاق، لكن عليها واحد. – أدري أدري *تنهيدة*-

لكن مابكون سوداوية، هالمادة بتطوركم كثيير في قراءة مقالات علمية. في أحد الاجازات، بابا كان عنده محاضرة يحتاج يلقيها، فكان يبحث وعنده مجلات علمية طبية، عطاني مقال وقال لي: اقرأيه وعطيني الملخص. لولا هذي المادة مستحيل عرفت كيف ممكن أنجز هالمهمة. بالاضافة انه هذي المادة لها اخوة في السنوات القادمة لأن كما يقول احد دكاترتنا: لاحظوا أن أطباء الاسنان يقومون بأبحاث ممتازة جدًا كمعلومات، كتقديم وكتابة كانت سيئة. ودكتور آخر كان يمدحنا يقول: لازم تفتخرون بأنفسكم! سنة ثانية وتقرأون أبحاث علمية وتختصرونها. أنا ماقرأت مقال علمي إلا وانا احضر الماجستير وكانت من أصعب مهمات حياتي.

 

4- Basic dental material ( مواد الأسنان الأساسية) –

وقفة حب وأحترام وتحية وتقدير وكل شي جميل لـهذا القسم، شقد منظم!! 3>>>

من بداية الدراسة كنت أكلم صديقاتي اللي مو معاي في الكلية أنه هالمادة أكثر مادة عجبتني لأنها تحسسني أني طب أسنان. هذي المادة عبارة عن دراسة المواد المستخدمة في طب الاسنان مثلًا المعادن، السيراميك،… .ندرس استخداماتها وخصائصها وما إلى ذلك.  يدرسونكم أياها 4 دكاترة (3دكتورات\1دكتور) مستواهم في الشرح يختلف. image

هذي المادة دسمة كمية المعلومات اللي فيها جدًا كبيرة ومهمة. عشان كذا قرر القسم يكون فيه:

واجب أسبوعيًا لكل محاضرة ( قروبات)

الواجب يكون ممكن صفحة – أو حتى 4صفحات اسئلة منوعة. عن كل المحاضرة وبكل الطرق والتسليم يكون المحاضرة اللي بعدها. ابذلوا مجهود فيه واقضوا وقت وانتوا تجاوبون صح. في النهاية كل الواجبات عليها 10%. اضمنوها، لا تضيع حرام. وجاوبها صح عشان تساعدكم في مذاكرة الفاينل.

+ كويز في المحاضرة اللي بعدها مباشرة. مدته 10 دقايق بداية كل محاضرة. لو راح عليك لأنك متأخرة خلاص راح عليك مايعيدونه. يكون قصير. ومجموعهم عليه 10%.

وفعلًا هالشي جدًا جدًا ساعدنا. لولا المذاكرة الأسبوعية والواجبات مااتوقع أحد بيقدر يخلص المادة.

المادة سهلة مش صعبة بالنسبة لي، ممتعة، عجبتني شخصيًا. القسم جدًا جدًا جدًا منظم جدًا ! أرتب قسم ممكن تتعامل معاه في سنة ثانية وهالشي ريحنا كثير. الدكاترة جدًا حبابين وطيبين بغض النظر عن مستوياتهم في التدريس. (فيه توب توب تتمنى يدرسك كل المواد، وفيه الممتاز ، فيه اللي ماشي حاله، وفيه اللي ….. ) –بالنسبة لي وهالشي يختلف من أحد لثاني.

السنة اللي قبلنا كانوا ياخذون السلايدات، بس عمومًا مواد طب الأسنان خلاص صارت ماتعطي سلايدات. تعطي سلايدات كخطوط رئيسية لأيش تذاكر.

وطبعًا هالمادة ساعتين لكنها دسمة جدًا! فكنا في مشكلة! الدراسة كانت من كتاب. لكن الدراسة من كتاب كانت صعبة علينا. فكان في مجموعة التفريغ. 10 بنات لو ندعي لهم للسنة الجاية ما نوفيهم حقهم. كانوا يكتبون في المحاضرة مع الدكتور ويجمعونه وينزلونه لنا ونذاكر منه. اللي يبغى يتعمق أو ما يتطمن كان يذاكر من الكتاب. لكن الأغلب كنا نذاكر منه ومن الـواجبات بعد مانصححها.

المادة عليها ساعتين،  اعمال السنة 60%، والفاينل 40% ( تقريبًا أغلب مواد الأسنان كذا. اغلب الدرجة على أعمال السنة) اختبارين نصفيين وفاينل. نوعية الأسئلة نفسه في الأثنين. منوعة : اختياري، صح وخطأ ، رسم، تعليق على رسم، مصطلح علمي، وتعليلات (جدًا مهمة).

مادة مهمة واساسية في طب الأسنان. ذاكروا لكل كويز لا تطنشونهم لأنه بيسهل لكم الفاينل كثيييير. هالمادة ماتخوف بصراحة، حبابة 3> تتعب فيها طول السنة ويطلع الناتج. أحبها 3>

5- Public health ( الصحة العامة)

مادة مخادعة بعد. تنقسم قسمين : وقاية من الأمراض وتحكم في العدوى + اخلاقيات طبيب الاسنان.

القسم الأول: عبارة عن طرق وقاية من العدوى، كيفية تعقيم العيادة، كيف نتعامل مع المرضى فيهم أمراض خطيرة معدية مثل الايدز والتهاب الكبد الوبائي. فيها جزء عملي رحنا فيه العيادات مرة وحدة بس. طبقنا الأشياء عمليًا وشفنا كيف تتعقم الأدوات وووين نرمي كل نوع نفايات. وبعدها اختبرونا فيها عملي. الاختبار العملي كان عليه 15% ( كيف تغسلين يدك، يجيبون مجموعة ادوات ونفايات مختلفة وكيف تتصرفين فيها) ويكون فيه دكتور\دكتورة يقيمونك على اللي تسوينه.

image

هذا القسم هو المخادع، في المحاضرة كان سهل جدًا. وقت المذاكرة من كتاب طبعًا. ضخم الكتاب جدًا جدًا – طبعًا صورنا من الكتاب الجزئيات اللي نحتاجها من عند الدكتورة او جابوه من المكتبة البنات نسيت- مذاكرته كانت متعبة جدًا، طويييلة الجزئية في الكتاب وفوضى مقارنة بالمحاضرة اللي كانت ماي ! والإختبار النصفي الاول كان فيه، كان غريب شوي، لكن مو مستحيل.

image

القسم الثاني: عبارة عن الأخلاقيات وكيف ممكن يتصرف الدكتور في حالات معينة. ولو تعارضت الأخلاق مع القانون. شي ممتع وجميل هالقسم. عجبني وقريب من القلب، سهل المذاكرة. يمكن لأن الدكتورة اللي درستنا اياه – نفس اللي درستنا مادة “مقدمة لطب الأسنان”- كان اسلوبها ممتاز في الشرح. الاختبار النصفي الثاني كان مفروض-حسب مافهمنا- انه بس منه، بس جاتنا اسئلة من القسم الأول عمومًا مو صعب لكنه مو سهل بعد. فيه اشياء خصوصًا انها قضايا اخلاقية فلما تكتب لك سيناريو وتقول لك مثلًا ايش الشي الغير اخلاقي اللي صار، تبدأ كل بنت تحلل من جهة. ممكن تتضارب بعض القيم الاخلافية. لكنها ممتعة image

النهائي ماذكر شي محدد عنه صراحة فما اتوقع كان صعب ولا كان سهل. شكله يمشي حاله.

المادة عليها وحدة بس. فيها واجب واحد نهاية السنة. اختبارين نصفيين وفاينل.

6- النظام الاقتصادي في الاسلام.

مادة عن الاقتصاد الاسلامي. تتعلق بكول حاقة فيها فلوس. ما أحب الاقتصاد الاسلامي من كنت في المدرسة، سوالف كم الزكاة الواجبة وشروطها ماادري بحبهاش. المهم تعرفون نظام المواد الاسلامية كلها تتعلق بمين يدرسك.

عليها وحدتين. اختبار واحد نصفي وواحد نهائي.

بكذا خلصنا مواد السمستر الأول. طبعًا بتلاحظون هالسنة الدوام كيف يقصر بشكل مو طبيعي. تخلصون 12 الظهر وكم يوم عندكم الى ثلاث. من أخف الدوامات سنة ثانية. لكن رقم 1 : الواجبات والشغل في البيت لأن كثير واجبات بتاكل الوقت. لكن رقم 2:  السنوات الجاية يطول الدوام ونعود للساعة 4 و 5 :)

خلصنا السمستر الأول بخير ومسرات الحمدلله ماكان فيه أحداث مهمة كثيرة. بنات دفعتنا صرنا نحب بعض أكثر، عرفنا بعض أكثر وكنت خايفة من بعض الشخصيات وكانوا جدًا جدًا حبوبات 3>

-مواد السمستر الثاني-

1- Head and neck anatomy ( تشريح الرأس والرقبة)

نفس مادة السمستر الأول، لكنها أكثر تخصص. ندرس الرقبة والرأس بشكل مفصل تمامًا، كل العظام، كل العضلات، كل الأعصاب والأوعية الدموية. نتعمق فيها كون تخصصنا فيها.

نفس الدكتور فنفس النظام تمامًا.

لكن اللي حصل : قرروا الكلية يدخلون مادة جديدة اسمها “ علم الأنسجة العام –General histology) لكنهم ما أضافوه كمادة مستقلة على سنتنا. صار ضمن الأناتومي، فأخذوا ساعتين من ساعات الأناتومي وصاروا يعطونا فيها هيستولوجي!

صرنا ندرس مادتين، تحت مسمى واحد وبدرجة 100 وحدة مقسومة بينهم. في البداية كثيير تذمرنا، لأنها تعتبر كمادة إضافية لكنها في نفس الوقت ما بتنحسب كمادة إضافية في كشف الدرجات! فكأننا بس ننضغط زيادة.

بس الحق يقال/ المادة كُلش سهلة وخفيفة. عن أنواع الأنسجة في الجسم وشكلها تحت المايكروسكوب. الدكتورة اللي تدرس جدًا لطيفة وشرحها ممتاز مما سهل علينا تقبل المادة. خصوصًا أنها قالت بتدرسنا علم الأمراض السنة الجاية، ودراسة علم الأنسجة قبل أفضل بعد ما اكتشفوا انه سنة ثالثة لما ما أخذوا المادة تعبوا فيها. image

على السنة الجاية يقولون بيتقرر التالي: نظام الأناتومي بيكون سنوي مو نصفي –كيف بالضبط ما أعرف- ، والهيستولوجي بيكون مادة مستقلة.

الاختبارات للأناتومي نفس الوضع، للهيستولوجي : اختبارين نصفيين، اختبارين نصفيين عمليين، اختبار نهائي. العملي تكون شرائح إلكترونية عبر البروجكتر كونه مافي معمل جاهز، والاختبارات النظرية اختيار متعدد.

المادة في النهاية ساعدت بعض البنات يرفعون درجات الأناتومي.

 

2- الكيمياء الحيوية ( Biochemistry) – مادة طب

*ضحكة فيها دموع* أنا انسانة ما أحب الكيميا، وما أقدر أتقبلها أبدًا. فهذي المادة ماحبيتها أبدًا أبدًا. خليط عجيب بين الأحياء والكيميا نتج عنه مادة مشوهة.

درسونا أياها دكاترة مختلفين. لكل دكتور اسلوب خاص في الشرح، وفي طريقة الأسئلة ومصدر المذاكرة، بيوضح لكم في النهاية. كثير منهم طيبين. لكن المادة ماكانت حبابة بالنسبة لي. المادة جدًا دسمة وفيها حفظ كثير كثير! التركيز مهم جدًا جدًا في المحاضرة – ماكنت أقدر أركز بالشكل المطلوب وكان شي سيء- والمذاكرة بشكل مستمر. عضيت اصابعي ندم لما ما كنت أذاكر كويس. الاختبار النهائي بيكون في كل شي، فالجزئية طوييييييلة! جدًا !

image

بعض الدكاترة بيسهلون عليكم كثير، وبعضهم بيطالب بكل شي!  فحسبوا حسابكم من بداية السمستر. في نفس الوقت احنا ناخذ المادة بشكل سطحي عن طلاب الطب. فكل هالهم ويعتبر مخفف ههههه الحمدلله. image image

لكن ما اخوفكم منها، ربما لو تحبون الكيميا- والأغلب يحبها- تشوفونها خفيفة دم، يمكن أنا حاطة انطباع مبدأي سيء من البداية لأن فيها كيميا فكرهتها! ربما!

اختبارين نصفيين ، واختبار نهائي واحد. كلها اختيار متعدد + توصيل.

 

3- مادة علم تشكيل الأسنان ( Morphology )

واو! هههههه لو كنتوا تعرفون بنات طب أسنان من دفعتنا، غالبًا أغلب اللي سمعتوه اننا نتكلم عن المورفو ومورفو ومورفو!

المورفولوجي بإختصار, مادة ندرس فيها جزئين

نظري: ندرس شكل كل الـ32 سن في الكبار، والـ20 سن في الأطفال من جميع النواحي ( من فوق كيف شكله، يمين ، يسار، قدام، ورا) لازم نحفظ كل سن ايش شكله، متى يطلع، لازم نعرف لو شفنا صورة سن نميز هذا السن فوق ولا تحت، يمين ولا يسار. الصفات المميزة في كل سن، ومقارنة بين الأسنان، والفروقات الفردية اللي ممكن تتواجد في الأسنان. أيضًا كل سن يلتصق بكل سن في اي جزء، مهام الاسنان، صفات الأسنان، الإطباق وانواعه ومشاكله، الجذر للسن واشكاله وانواعه ومشاكله. فهالجزء تقدرون تتخيلون انه كمية الحفظ فيه هائلة. واجهتنا فيه صعوبة في المذاكرة خصوصًا أننا ماكنا نعرف كيف ندرسه وايش مفروض نحفظ بالضبط+ الاسئلة ماكانت سهلة أبدًا بصراحة.

من وين ذاكرنا للجزء النظري: مادة اسنان فممنوع فيها يعطونا سلايدات. فيه كتاب يعطونكم اسم حقنا “ wheeler’s dental anatomy,physiology and occlusion “ بعض البنات اشتروه لكنه موجود بصيغة PDF + وفوروا لنا سي دي “ 3D tooth atlas” عبارة عن برنامج تفاعلي، نقدر نشوف في الاسنان من كل الجهات، كل سن وصفاته واشكاله وفيه اختبار فردي. كنا ندرس جزئية الأسنان في الكلاس منه (الدكتور\الدكتورة) يشرحون عليه. فكانوا يطلبون منا نجيب لاب توباتنا ونثبت البرنامج بحيث نمشي معاهم. والمذاكرة كل أحد بكيفه هل من الكتاب او من البرنامج. البرنامج كان جدًا مفيد لأنه يثبت الشكل في مخك. والموروفولوجي اهم شي تكونين قادرة على تخيل شكل كل سن من كل جهة.

خطوة السي دي كانت جبارة بصراحة تحسب للكلية، كان برنامج مفيد وساعد في المذاكرة عن هذرة الكتاب. ولما بحثنا عنه في الانترنت، السي دي ينباع بـ 549 $ !!

الجزء العملي من الموروفولوجي عبارة عن عملية نحت للأسنان. يعطونا بلوك من الشمع، ونبدأ نحول هذا الشمع إلى سن . image

في البداية كان اللاب عبارة عن كابوس ههههه ! الدكتورة تسوي السن في ربع ساعة كحد أقصى, واحنا نشتغل ساعتين في اللاب ونقعد طول الأسبوع نشتغل عليه، بعدها نوريه الدكتورة وممكن تقول : أممممم حلو بس هنا قصير، هنا مو مضبوط ، عيديه أحسن. الميليمتر محسوب في النحت. ممكن فجأة تطلع لك فقاعة هوا في وسط الشمع في نص الشغل ومافي شي تقدرين تسوينه غير تعيدين، أحيانًا ينكسر الشمع في يدك، أو يطيح السن وينكسر. عشان كذا كان الموضوع مسبب لنا ضغط نفسي. مع الوقت تصير يدنا خفيفة ونبدأ نصير أسرع، خصوصًا ان الإختبار العملي يعطونا ساعة ونص نرسم فيها وننحت سن كامل.

image image

image

بغض النظر عن الدرجات وطريقة التدريس والتقييم ، المادة ممتعة. لكن ضغط الدرجات وصعوبة الإختبار والدراسة كانت ماتخلينا نستمتع في المادة. طبعًا درجاتنا كانت مرة زفت في الاختبارين النصفيين واحتجنا كيرف أب وصارت سالفة طويلة عريضة على هالمادة. كان القسم شوي متخبط والقرارات ماكانت واضحة. احنا كنا مو عارفين ندرس كيف. يعني مادري ايش المشكلة بصراحة.

لكن الحين، أقول انه هذي المادة هي أ ب ت الأسنان. من أكثر المواد اللي بتحسسك أنك تدرسين طب أسنان. كانت ممتعة بصراحة – لو نسينا العفسة اللي صارت-.

اختبارين نصفيين نظريين: اختيار متعدد + اسئلة مقالية من نوع “ اوصفي السطح الخلفي من القاطع السفلي” وانتِ لازم توصفينه وتكتبين كل شي فيه. + فيه اسئلة صور وتتعرفين على السن.

اختبار نصفي عملي : مثلًا تكونون اخذتوا 4 اسنان امامية نحت، واحد منهم يجي في الاختبار نحته كامل خلال ساعة ونص + رسم لأحد اسطح اي سن ثاني.

الاختبار النهائي: اختيار متعدد+ اسئلة مقالية عن الأسنان + اسئلة مقالية عن باقي المحاضرات + صح وخطأ.

اختبار عملي نهائي : نفس النصفي بالضبط.

 

4- Dental biomaterial ( مواد الاسنان الحيوية)

تشبه مادة مواد الأسنان الأساسية، نفس نظام الاسئلة، نفس طريقة المذاكرة، نفس هيئة التدريس. نفس القسم. لكنها تكون اكثر تخصص بكيفية استخدام المواد في فم المريض ومن ايش تتكون.

 

5- النظام السياسي في الإسلام.

نفس المعلومات عن اي مادة دينية. هي آخر مادة دين ندرسها. بالنسبة لي من أسهل المقررات الدينية. كانت سهلة بشكل عام.

 

6- Behaveoral science ( علم السلوك) ♥♥♥♥♥♥♥♥♥♥♥♥♥♥♥♥

هذي مادة لها ألف قلب♥♥♥♥♥ مادة علم نفس. ولو تتابعوني صح، تعرفون شكثر أنا مهتمة في هذا المجال ♥ أكثر مادة استمتعت فيها وكنت مستحيل افوت أي محاضرة او أسرح فيها 3> تتكلم عن سلوك الإنسان، المكافأة والعقاب، الذاكرة، فوبيا طب الأسنان، الامراض النفسية، القلق 3> كانت مادة مفيدة وممتعة. ياليت تدرس مو بس كورس واحد، لأنها جدًا مهمة بصراحة. كيف الشخص يفهم نفسه ويفهم المجتمع خصوصًا في مجال صحي أمر مهم. الآن مايوظفون بس الشخص اللي جايب A+ لازم يكون عنده مهارات تواصل وفن في فهم الآخرين. هذي المادة كانت من أفضل المواد اللي درستها إلى الآن.

طاقم التدريس 4 أعتقد، كل دكتور درسنا عدد من المحاضرات. ولكن الحق لازم يقال، رئيس القسم د.عبدالعزيز كان أفضلهم ومحاضراته الأمتع ♥ ماشاء الله انسان خلوق ومثقف واسلوبه ممتع. أبدًا ماتحسين نفسك قاعدة في محاضرة في الجامعة، كأنك رايحة ورشة عمل خارجية أو ندوة، شخص ملهم. ♥

الإختبارات : 2 نصفيين، 1 نهائي وكلها اختيار متعدد .

المذاكرة من سلايدات الدكاترة .

وبكذا خلصنا المواد.

– فقرة عشوائية-

  • بعد اختبارات الترم الأول، كان في احتفال صغير دعينا عليه ويترأسه عميد الكلية حيث اقام اجتماع مع الطالبات –ماحنضرته للأسف-
  • العميد د.فهد الحربي. شخص محترم ومتعاون جدًا. يحرص دائمًا يسوي لنا اجتماعات يسمع فيها شكاوينا واقتراحاتنا وفعلًا يطبقها مو بس كلام. من أطرف الأشياء والطفها لما صديقتي آلاء اقترحت عليه انه يكون في مودم في الكلية، ووضحت له انه شي مهم. خلال أسبوعين صار عندنا شبكة انترنت في مبنانا ♥

IMG_5087

  • الترم الثاني كان ترم حافل، كان عندنا أول شي مسابقة درر الكليات ثم درة الجامعة، وحفل التفوق اللي كل دفعتنا تكرميت فيه ماشاء الله ♥
  • كليتنا اللطيفة جدًا جدًا ♥ سوت لنا حفل خاص فينا بعد الحفل الكبير، ليش؟ عشان احنا كلية صغيرة، فيها بس دفعتين وطاقم التدريس والادارة فيه شوي، فكلنا نعرف بعض. سووا لنا حفل خاص “عائلي” شوي :P كل الدكتورات والبنات والادارة اجتمعوا فيه واكلنا كيك وانبسطنا ♥

IMG_5083

  • ايضًا الترم الثاني سووا لنا رحلة لبحر الجامعة، وما أقدر اوصف لكم كيف كان هذا اليوم من أسعد أيام حياتي ♥ وترى من جدي أتكلم، كليتنا دلعتنا فيه، ونظمت الرحلة بشكل ممتاز جدًا وافضل تنظيم مقارنة بباقي الكليات. الدكتورات معظمهم جاو وسووا لنا مسابقات وشوي خفيف وغدا والعاب ♥ كان كسر للحواجز بيننا وبين بنات سنة ثالثة وبين الدكتورات ♥ يوم ممتع جدًا جدًا ♥

IMG_5124

  • من الأشياء اللي بتلاحظونها في كليتنا كثرة الاستبيانات، تقريبًا كل اسبوع استبيان او اثنين، عن مواد التدريس او اي شي ثاني، كثير بنات كانوا يتذمرون من هذا الشي لكني كنت أشوفه مهم وممتاز. معناها الكلية مهتمة تسمع راينا، وكلنا مسؤولين نجاوب بصدق عشان فعلًا تؤخذ آراءنا بعين الإعتبار ونساهم في التغيير. فكنت أتضايق كثير لما البنات يجاوبون بشكل عشوائي. :( امانة هذي بصراحة ! لو ماتبين تعبين لا تعبين لكن لا تخربين نتائج الاستبيان رجاءً.
  • الكلية صغيرة والدفع فيها شوي، ففيها حميمية بين بعض. تحسين بيتكم. انه كل المكان لكم انتوا، عكس مبنى الطب او التحضيري اللي الكل يجي فيه. هنا لأننا وحيدين فخلاص تطيح الميانة بيننا وبين بعض. فيه نوع من الترابط.
  • الدكتورات للآن ماواجهت ولا دكتورة ما قدرت أتعامل معاها، أو اخلاقها سيئة، أو شريرة! بصراحة، الكل محترمين وسهل التعامل معاهم –بغض النظر عن مستوى الشرح-. العلاقة جدًا ودية بيننا وبين دكتورات الآسنان ♥ .
  • من الأشياء الإيجابية في ان مبنى الأسنان معزول، مابتحاتون لو دوامكم من 8، زحمة البوابة بتنلغي وتوصلون بدري.
  • في نفس الوقت المبنى ماله حديقة خاصة بالبنات مثلًا، فالجو صناعي –_- أنا احب الشمس :( + كوننا بروحنا نزهق من روحنا شوي، ونجوع! ماعندنا أكل زي المباني الباقي.
  • كثييييييير كانوا الدكاترة يقارنون بيننا وبين الأولاد وليش مستواكم عالي جدًا مقارنة فيهم، طلعت علينا اشاعات اننا غشاشين واننا عندنا مصادر مختلفة عنهم، وعصبنا وصارت سوالف، فلو صارت لكم هالسوالف طنشوا، واستناسوا انكم اشطر وبس :p

– نصائح عامة –

كثير نصائح قلتها فوق لكن ماعليه نعيد البعض ونخليهم مرتبين أكثر:

  1. المثبطين! أيوا مرة اخرى ابتعدوا عنهم. بداية السنة وعشان الصدمة المعلوماتية في سمنة ثانية، كانوا بنات دفعتنا كثييييييييير يتحلطمون في قروب الدراسة، وانا ما أصدق خبر لو مذاكرة 1000% أتوتر واخاف. وهالشي حرمنا متعة الاستمتاع بالدراسة. هم الأغلب هو الدرجات وبس! بعد فترة حاولت اسيطر على نفسي واطنشهم، اهم شي أنا واثقة شخطتي وكيف أذاكر. ما أدخل القروب واقرأ لو كانوا يتحلطمون. شوي شوي صار كلامهم مايؤثر فيني بأكثر من 10%.
  2. حضروا المحاضرات رجاءً! بغض النظر انها أمانة وحرام التوقيع لبعض والغش. لكن والله بتندمون. حضور المحاضرات مهم جدًا حتى لو مافهمتي كل شي. يكون عندك نظرة عامة عن المحاضرة. والله جدًا جدًا جدًا مهم حضور المحاضرات. لازم يصير عندنا شوي جدية وحس بالمسؤولية، اذا احنا طالبات الحين وموقادرين نلتزم ونزور تواقيع بعدين شبيصير؟
  3. حاولي بقدر الأمكان تتعاملين مع الكل بإحترام. حتى لو ماكانوا محترمين معاك. انتِ تعكسين تربيتك وافكارك من خلال تصرفاتك. تقبلي آراء الجميع لأن بتصير مناقشات كثيرة جدًا جدًا ومعقدة وربما تتعقد الأمور. كوني من الناس اللي تفكك الخيوط ماتزيدها تشابك.
  4. تحملي المسؤولية. هذي السنة كثير أعمال جماعية فيها. 4من6 مواد كلها فيها اعمال جماعية. حاولي ما تكونين عبء على المجموعة وتنجزين جزئك بأفضل شكل وخلال الوقت المطلوب، لو اهملتي في جزءك يمكن الكل ينقص بسببك. (في مادة الدنتال ماتيريال كنت منظمة المجموعة لو نقدر نقول، كان فيه بعض المشكلات مثل” اللي تتأخر في الحل وتأخرنا، أو تحل جواب ماله علاقة بالسؤال، أو تتملص من مهمتها” الشدة لا بأس فيها في هالأمور، ماعليش شدوا على بعض شوي، مساكين البنات اللي معاي تحملوني وانا اعصب عليهم واهزأهم لما يتأخرون أو ماينجزون الشي، لكني كنت مؤدبة والله :P وفي النهاية كانوا خوش مجموعة، كنا نخلص حلنا بأقرب وقت ونسوي مراجعة شاملة لكل الأجوبة ونصححها، وبكذا كنا من المجموعات اللي درجاتها كانت ممتازة بصراحة 3> “)
  5. استمتعي بالدراسة. لا تغلطين غلطتنا. اهتمينا بالدرجات وبالغنا في اهتمامنا وضيعنا متعة كثير مواد. أتمنى ارجع ادرس موروفولوجي او انترودكشن باستمتاع بدل التحلطم اللي كنت فيه. image
  6. شدي على نفسك. هالسنة جدًا مهمة انك تثبتين نفسك فيها. هالشي بيرفع مستوى ثقتك بنفسك اني أنا مكاني صح وانا اقدر أكمل. لا يكون همك الدرجات، وفي نفس الوقت لا تنطشين بحيث بس تنجحين. سنة ثالثة أصعب، حاولي تتعلمين على الجد من الآن وتحافظين على معدلك عشان سنة ثالثة لما تجي ويقال انها “ادسم” سنة تكونين مستعدة.
  7. حاولي تكونين مع دفعتك على قلب واحد. لا تبنين علاقاتك على اساس ظنون واحكام مسبقة على البنات. كثير بنات ماكنت أتوقعهم حبوبات طلعوا من أطيب البنات. خلوا علاقتكم ببعض “ بروفشنال” ابتعدوا عن النزاعات اللي مالها طعمه. كونوا على قلب واحد. تحتها ألف خط.

image

خلصت سنة ثانية الحمدلله، بمعدل راضية عنه، وصديقات جديدات مقربات لطيفات جدًا، دفعة طريفة ومضحكة ومشاغبة وشاطرة، كلية واعدة. ♥♥

سنة ثانية طب أسنان من أمتع السنوات في حياتي. تعرفت فيها على شخصيات مذهلة، تعلمت فيها أشياء كثيرة، حبيت فيها الكلية اللي كنت أتمناها أكثر، ومشيت خطوة في طريقي الطويل.

سنة ثانية ممتعة، جادة، ومفيدة ♥

املئوا قلبكم بالحب لها ولكل الأشخاص اللي بتشوفونهم، بتلقون الحب يرجع لكم ♥

استمتعوا فيها ♥

  • ملاحظة ما قبل النهاية: تتذكرون السنة اللي فاتت كنت أقول لكم ادعوا لصديقتي زهراء؟ الحبيبة زهراء صارت طالبة صيدلة اكلينكية حاليًا ♥ تمنوا لها التوفيق.

ومن أجلي ادعوا لصديقتي واختي وحبيبتي كوثر بأن يوفقها الله فهي ستبدأ مسيرتها الجامعية قريبًا ♥

  • ملاحظة النهاية:  هذي التدوينة طولت فيها كثييير وانا محتارة كيف أكتبها وعن ايش أكتب. لكنها أخيرًا انتهت. اكتبوا لي في التعليقات لو شي ناقص تبون تعرفونه وبإذن باضيفه في التدوينة.

اتمنى أن تكونوا قد استفدتم أو استمتعتم .. أو الاثنين معًا . 

يوم موفق لكم، أسعد باستفساراتكم، آرائكم، دعمكم، تعليقاتكم وكل ماتكتبون ♥

حُييتم ♥

21 thoughts on “تجربة سنة ثانية طب أسنان 3>

  1. اول كومنت قبل لا اخلص التدوينه
    برافو برافو قود جوب سستر👏❤️
    لكن منو قال الاغلب يحبون الكيميا ؟ :( مااحد يحب الكيمياا بس انا وزهراء وفئة مختاره 🏃

  2. *تصفيق طويل وانحناءة*
    عظيمة يا صديقة، من معرفتي بك وسياق التدوينة يتأكد لي انك ما أغفلتي أي من الجوانب والنقاط المهمة
    مجهود لا يستهان به الصراحة، هنيئًا لطالبات كليتكم فيك ♥
    فيه شيء يبعث على السعادة في خلال قراءة تجارب الآخرين فكيف بقراءة أحداث تجربة عشتها شخصيًا بكل تفاصيلها، أحسد بنات دفعتكم.
    بالنسبة لنقطة الملل اللي ركزتي عليها، التدوينة مش مملة أبدًا بل هي انعكاس للسنة، أكثر تخصصًا، أكثر عمقًا.

    موفقة مسددة بيانة القلب، الله يزرع في طريقك زهور التسديد بقد ما أفدتي مئات من الأشخاص وأكثر.
    شكرًا على الإشارة لإنجازي الصغير وشكرًا على كل نقطة مساهمة منك في طريق الوصول إليه ♥
    دعوات القلب للحبيبة كوثر ♥♥

  3. مع اختلاف تخصصي تماما عن تخصصك بس افتكرت أيام الجامعة قد ايه كانت مرهقة بس مع ذلك ممتعة.
    موفقة أنت وزهراء وكوثر ❤

  4. انا سنة اولى حاليا..
    ينتابني حماس و فرحة لمن اقرا تدويناتك بشكل عام
    مع اني ما اميل لطب الاسنان ابدا

    اسلوبك في السرد هو اللي يخليني اقرا مو عنوان الموضوع
    تابعي تدوين تجاربك اول بأول
    فأنا من متابعينها

    انا راسلتك من 5 شهور تقريبا على ايميلك و استفسرت عن كثير اشياء بخصوص جامعة الدمام و انتي ما قصرتي
    و بكره انشاءالله اعلان الدفعة الثالثة و الاخيرة و بإذن الله اكون من المقبولين في المسار الصحي

    بالتوفيق د.بيان علي

  5. تدوينة لطيفة، مع إني توي انقبلت بشري بس استمتعت بقرائتها وتيقتنت إنه كانت خطوة صائبة مني إني ما دخلت أسنان =))
    بالتوفيق دكتورة

  6. جميييييل جداً مرة استمعت بالقراءة ،، مع أني طالبة ثانوي بس أني من النوع اللي أحب اقرأ عن الدراسه وكذا بدخل ثاني ثانوي بإذن الله “علمي” وناوية أدخل جامعة الدمام كونها أقرب جامعة من القطيف وبدخل مسار صحي إن شاء الله بس لحد الحين مو حاطة التخصص اللي في بالي،، و بالتوفيق لش ولاختش وصديقتش وكل من تحبووهم احب اقرأ مدونتاك احس بالانتماء وابدا ما استمل واني اقرأ شكرا لك ،، استفدت من اشياء واجد شكككرا لك ،، و بالتوفيق

  7. شكرا لك بيااان ماعمري قريت مدونات قبل مدوناتك ويوم جتني برابط وفتحته للتحضيري بين فترة وفترة افتحها واستعيد حماااااسي وصج سويت اغلب الأشياء الي قلتيها استانسوا انبسطوا ممكن تتذمرون شوي مو طول السنة لانه بيأثر علينا ذاكروا لخصوا واستمتعوا وانتوا تذاكرون شاركوا تعاونوا وكل شي جميل انا صج كان حلمي اسنان والحمدالله انقبلت في احسن التخصصات في الدمام لكن بوصل لحلمي ان شاء الله وقراءتي لهالمدونة زاد اصراري وبما ان صديقتك زهرااء الجمييلة (قلوب قد الدنيا) أكيد انت من اكثر الناس عطاء وطيبة ومسامحة وتفاهم و كل شييييي ودعواتي لكوثر

    شكرا بيان من القلب

  8. بالبدء حابه اشكرك ع الطاقة الايجايية و تحفيزك + كنت مرره مستثقله الدوام بس الحين حمستيني والحمدلله انك طب اسنان عشان اقرا عن تخصصي من انسانه بمثل روحك الايجابيه 💜 شكراً مره اخرى يا جميلة 💜

  9. حمسسستيني كثيييير انا طالبه اخر سنه ثانوي ، كنت خايفه من كلام كثير اسمعه عن هالمجال بسس الحمدالله طمنتي قلبي نوعاا ماا وحمستيني لاشيياء كثييير .
    الله يوفقك ويسعدك حبابه .

  10. يعطيك العافية بيان . انا طالب سنة ثانية الأن بس ودي استفسر عن البيسك ما عندكم تفريغات فرغتوها في سنتكم لان الاولاد ضايعيين ** مو زي البنات وكما تعرفين الدكتورات عند البنات ويشرحون لهم في الساعات المكتبية ينما احنا كلا يقولون لنا على الايميل و الشرح ما يصلح على الايميل . ياليت تفيديني بشي

  11. مرحبا بيان :) مقال رائع بوركت لاجمالك وتفصيلك عن كل شيء
    انا الان بالسنة الثانية بطب اسنان ومع ان نظام دراستنا بمصر يختلف قليلا عنكم الا اني استمتعت بالقراءة عن الدراسة لديكم
    الكلية فعلا بها لحظات كثير ستجعلك تشعر باليأس لثقلها ولكنها تمضي بفضل الله

    وفقنا الله واياكم

  12. السلام عليكم ورحمة الله وبركاته
    #بس حبيت اعرف الدوام بالضبط الى كم الساعه قلتي انه قصير بس بالضبط ماقلتي مثلا الى الساعه 2 او3
    #هل الجدول موحد وكل بنات الدفعه تكووون بكلاس
    #هل كل يوووم عندنا محاضرات في مبنى الطب

  13. التنبيهات: سنة تالتة طب أسنان (سنة المُنحدر) | مُدونة بيان علي ♥

  14. التنبيهات: سنة تالتة طب أسنان (سنة المنحدر) ♥ | مُدونة بيان علي ♥

  15. التنبيهات: طب اسنان|سنة ثانية – Bashayer

  16. التنبيهات: تجربة سنة ثانية طب أسنان – نوف عبدالعزيز| طب أسنان

  17. الله يقويكي ويقدرك علي الدراسة والشغل من بعدها ويسعدك ويسعد أيامك
    بجد حبيتك من كلامك وأسلوبك المهذب..

    وعندي سؤال
    هل في أسنان بتدرسوا مواد تشخيص من طب بشري زي الباطنة والجلدية ومواد كده ؟؟؟
    لأني سمعت المعلومة دي ومش متأكدة منها
    انا حاليا أولي صيدلة في جامعة فاروس في مصر
    وبجد بتمني ربنا يسهلي الطرق وأحول أسنان الترم التاني
    دعواتك..نفسي فيها ومجموعي وقف علي 0.2 %

  18. الله يقويكي ويعينك ويسعدك ويسعد أيامك😘
    بجد بجد حبيتك من كلامك وأسلوبك المهذب😍
    حبيبتي عندي سؤال
    انتو في أسنان بتدرسوا مواد تشخيص من طب بشري زي الباطنة والجلدية ومواد كده ؟؟؟
    البشري دا بالنسبة لي حاجة لذيذة جداااااا😄😄

    انا حاليا كلية صيدلة جامعة فاروس في مصر
    ويارب يسهلي طريقي واعرف احول اسنان الترم الجاي
    نفسي فيها ومجموعي وقف علي 0.2 %
    دعواتكم يا بنانيت 😍😘😘

ساهِم في التغيير ، أترك لي ردًا ♥

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s