بسكويت قرقيعان ♥

السلآم عليكم ورحمة الله وبركاته ..

أخباااااركم يا أؤشط ، واؤشطين وأؤشطات ؟

مبارك عليكم رمضان ، وكل عام وانتم للرحمن  أقرب 

ربي يبلغنا وإياكم ليلة القدر ، ويجعلنا من القائمين العابدين المغفور لهم فيها بإذن الله

 

اخبااار قرقيعاانكم ؟؟

أحنا عندنا مرررره هدوء اليوم ، يمكن بيجون بكرة .. نستنى

أحب اجواء الأطفال في قرقيعان وكيف هم مبسوطين ، واذا طلعت من البيت اشوفهم مالين الحي .. مرره جميل .. مشتهيه اقرقع معاهم *-*

*ملحوظة : الناس اللي عندهم قرقيعان حرام ، انا عندي ديموقراطية .. ودائماً اقول : لكم مصادركم ولي مصادري .. بس الله يخليكم ماله داعي تقولون لي في الكومنتات ، اتفقنا ؟

 

عموماً هذا البسكوت مفروض تنزل طريقته من زمااان ، بس الكاميرا العجيبة ، ضاع سلكها وتوي حصلته ..

فـ فرصة صار بسكوت قرقيعان .. مرره لذيذ وسهل ويسوي كمية  ، انصحكم تجربونه =)

الطريقة اخذتها من مدونة أجنبية .. ترجمت الطريقة لكم

المقادير :

1 ونص كوب زبدة – طرية – 

ثلاث أرباع كوب سكر

3 ملاعق شاي فانيلا – استخدمت فانيلا بودرة –

ربع ملعقة شاي ملح – حطوا ببالكم دائماً وصفات الكيك والبسكوت / الملح لتعزيز النكهة –

3 اكواب و ثلاث ارباع كوب دقيق أبيض – استخدمت دقيق فوم السعودي ، مره ممتاز –

علبة مربى فراولة – كرز – فواكة ..اللي تحبون

وللأيسنق : 4 اكواب سكر بودرة نااعم مرره + 12 ملعقة صغيرة عصير ليمون

( كمية الايسنق بتصير مررره كبيرة لو حابين تقسمونها افضل .. فيصيرون كوبين لـ 6 ملاعق )

الطريقة :

1- نشغل الفرن على 350 درجة فهرنهايت – الرف حق الكيك والبسكوت غالباً يكون اللي قبل الاخير –

2- نضع كل من : الزبدة ، السكر ، الملح والفانيلا في الخلاط .. الى مايتكون عندنا خليط كريمي 

3- ببطء نقوم بإضافة الدقيق تدريجياً للمزيج ، وندعه يمتزج جيداً –حتى يختفي الدقيق ونطء الخلاط .

4- بنلاحظ العجينة لازالت غير متماسكة ، نقوم بعجنها قليلاً باليد حتى تعطي نتيجة أفضل = عجينة متماسكة ، لينة نوعاً ما .

5- نقوم بتقسيم العجينة الى كور صغيرة ، – تقريباً جات عندي 35 الى 40 كرة صغيرة ، ونضعها في قالب – مايحتاج نحط زيت لما نسوي بسكوت لآنه مليان زبدة ، لكن اللي تخاف يلصق ممكن تمسح مسحة خفيفة جداً زيت – انا حطيت ورق في القالب ، نراعي ان البسكويت سيتمدد في الحرارة ، فنتراك مجال كافي بين كل واحدة والأخرى .

      لاحظوا كمية الزيت اللي نزلت من الكور لما حطيتها على الورق ، هذا دليل انه مايحتاج :)

6- نقوم بالضغط في وسط كل كرة لتتسطح قليلاً ونترك مجالاً لوضع المربى . -هنا انا استخدمت الطرف السفلي من الهاون ، تقدرين تستخدين اي طرف لـأي شي –

       ممكن تتشقق عندنا اطراف البسكوته –زي ماصار معاي – تقدرين ترتبين اطرافها بيدك ، وممكن تخلين بعض التشققات .. يطلع شكلها أجمل –

7- نوزع المربى في وسط كل حبة بسكويت ، – تقول صاحبة الوصفة أنه من الافضل وضع كمية مضاعفة من المربى ، لان البسكوتة بتتمدد ، وتتمدد معاها المربى –

8- ندخلها الفرن ، على نفس الحرارة .. لمدة 15 الى 18 دقيقة – اخذت معاي 16 دقيقة وشميت ريحتها وتشقرت من تحت –

على ماتستوي البسكويت .. نسوي الآيسنق . ماصورته لانه سهل

* نخلط السكر مع عصير الليمون بيتكون عندنا مزيج سميك لونه ابيض ، طعمه حامض حلو ، اللي مايحبه يكون حامض مره .. ممكن يخليهم 3 ملاعق ماي ، 3 ملاعق عصير ليمون .

9- نخرج البسكويت من الفرن ، ونتركه ليبرد قليلاً .

        لاحظوا كيف كبر حجمه ، فـحاولوا تكون بسكوتاتكم صغيرة قبل الخبز عشان مايتضخمون واجد

10 – نرش الآيسنق على البسكويت بهيئة خطوط – ضعيه في كيس ليسهل التحكم به –

       انتبهي لآ توزعين الآيسنق والبسكويت حار ، لانه بيذوب عليه ولا بيتشكل كـخطوط ، خلي البسكويت يبرد شوي .

أخيراً .. يوضع في صحن التقديم .. وَيؤكل ، وبألف هنا وعافية =)

قارنوا بين نتيجتي و الطبق الأصلي هنــا ~

أيامكم كلها سعادة وَفرح ..

وقرقع قرقع قرقيعان